Read tsonga Tipisalema 92 Bible Online

Tipisalema 92 - tsonga bible

Tipisalema 92

¹Ku dzunisa Yehovha, i mhaka leyo saseka, Ni ku twarisa vito ra wena, La nge henhlahenhla,

²Ku tivisa vunene bya wena nimpundzu, Ni ku tshembeka ka wena nivusiku,

³Hi xitendze xa tingoti ta khume, ni psalteri, Ni mimpfumawulo leyi nandzikaka ya haripa.

⁴Hikuva wa ndzi tsakisa hi mitirho ya wena, Yehovha! Ndzi va ndzi huvela hi ku tsaka mitirho ya mavoko ya wena.

⁵A hi ku kula ka mitirho ya wena, Yehovha! Ni miehleketo ya wena yi entile swonghasi!

⁶Xihunguki xi nge yi tivi, Ni wa rihlanyi a nge yi twisisi.

⁷Hambi vadyohi va mila tanihi byanyi, Ni vahomboloki loko va andza, Va ta herisiwa ni makumu.

⁸Kambe wena Yehovha, u tlakukile hi laha ku nga heriki!

⁹Hikuva vona, valala va wena, Yehovha Valala va wena va ta fa. Hinkwavo lava endlaka swo biha va ta hangalasiwa.

¹⁰U tlakusa rimhondzo ra mina kukota ra nyarhi; Ndzi totiwile hi mafurha lamantshwa ya munyatsi.

¹¹Mahlo ya mina ma ta tsakela ku vona valala va mina, Ni tindleve ta mina ku yingisa lava ndzi pfukelaka.

¹²Lava lulameke va mila kukota murhi wa ncindzu, Va kula kukota murhi wa kedari ya Lebanoni.

¹³Loko va simekiwa endlwini ya Yehovha, Va hluka erikupakupeni ra Xikwembu xa hina,

¹⁴Va ha veleka vana eku dyuhaleni ka vona, Va ta tala hi mongo va va lavantshwa,

¹⁵Va ta twarisa ku lulama ka Yehovha. Hi yena ribye ra mina, a ku na ku homboloka eka yena.