Read tsonga Tipisalema 95 Bible Online

Tipisalema 95 - tsonga bible

Tipisalema 95

¹Tanani, hi yimbelela tinsimu eka Yehovha! Hi huwelela hi ku tsaka eka ribye ra ku hlayiseka ka hina.

²A hi tikombeni emahlweni ka yena hi ku vonga, Hi n'wi dzunisa hi tinsimu.

³Hikuva Yehovha i Xikwembu lexikulu, I hosi leyikulu leyi tlulaka swikwembu hinkwaswo.

⁴Ku enta ka misava ku le xandleni xa yena. Ni tinhlohlorhi ta tintshava ta yena.

⁵Lwandle i ra yena, i ntirho wa yena, Na yona misava leyi tiyeke, yi vumbiwile hi mavoko ya yena.

⁶Tanani, hi khinsama, a hi korhameni, Hi khinsamela Yehovha, muvumbi wa hina,

⁷Hikuva hi yena Xikwembu xa hina. Kutani hina hi tiko leri risiwaka hi yena. Ntlhambi lowu fambisiwaka hi voko ra yena. Namuntlha loko mi yingisa rito ra yena,

⁸Mi nga nonon'hwisi timbilu ta n'wina, kukotisa le Meriba, Tanihi emasikwini ya Masa le mananga,

⁹Laha vatata wa n'wina va nga ndzi ringa kona, Va ndzi ringa, hambi va vonile mitirho ya mina.

¹⁰Ndzi phiriwa hi rixaka leri hi mune wa makume ya malembe, Ndzi ku: “I tiko leri mbilu ya rona yi lahlekeke, A va tivi tindlela ta mina,”

¹¹Hi laha ndzi nga hlambanya evukarini bya mina, Leswaku va nga ka va nga ngheni eku wiseni ka mina!