Read tsonga Tipisalema 98 Bible Online

Tipisalema 98 - tsonga bible

Tipisalema 98

¹Yimbelelelani Yehovha risimu lerintshwa, Hikuva u endlile swilo leswi hlamarisaka; Voko ra yena ra xinene lero kwetsima ri n'wi pfunile.

²Yehovha u kombisile ku hlayiseka ka yena, U anekile ku lulama ka yena emahlweni ka matiko,

³U anakanyile tintswalo ta yena, Ni vunene bya yena eka yindlu ya Israele; Makumu hinkwawo ya misava ma vonile ku hlayiseka ka Xikwembu xa hina.

⁴N'wina hinkwenu vaaki va misava, Tlakuselani eka Yehovha huwa ya ku tsaka. Banani huwa ya n'wina, mi yimbelela,

⁵Dzunisani Yehovha hi haripa, Hi haripa ni marito ya tinsimu,

⁶Hi tinanga ni timhalamhala, Mi huwelela hi ku tsaka emahlweni ka Hosi Yehovha.

⁷Lwandle a ri bobome, ni hinkwaswo leswi nga eka rona, Na yona misava, ni vaaki hinkwavo va yona;

⁸Milambu a yi phokotele mavoko, Tintshava hinkwato a ti be mikulungwana hi ku tsaka,

⁹Emahlweni ka Yehovha! Hikuva wa ta ku avanyisa misava; U ta avanyisa misava hi ku lulama, Ni matiko hi vunene bya yena.