Read tsonga Swivuriso 1 Bible Online

Swivuriso 1 - tsonga bible

Swivuriso 1

¹Marito ya Solomoni, n'wana Davhida, Hosi ya Israele:

²Ku tiva vutlhari ni tidyondzo, Ni ku hlamusela marito ya vutlhari;

³Ku amukela dyondzo ya ku anakanya swo lulama, Ya ku tivisisa ku lulama ni mfanelo;

⁴Ku tlharihisa varivali, Ni ku nyika lavantshwa ku tiva ni ku anakanya.

⁵La tlhariheke, a a yingise, u ta tiengetela ku tiva; La nga ni ku twisisa u ta tikumela mano

⁶Ya ku twisisa swivuriso ni marito ya ku enta, Ni timhaka ta lavo tlhariha, ni dyondzo ya vona leyi fihlekeke.

⁷Ku chava Yehovha, i masungulo ya vutivi hinkwabyo; Kambe lavo rivala va tsan'wa vutlhari ni dyondzo.

⁸N'wananga, yingisa dyondzo ya tata wa wena, U nga fularheli ku laya ka mana wa wena;

⁹Hikuva swi ta va xibombiso lexo saseka enhlokweni ya wena, Ni sindza ra nkoka enhan'wini ya wena.

¹⁰N'wananga, loko vadyohi va ku kanganyisa, U nga pfumeli.

¹¹Loko va ku: “A hi fambeni swin'we! Hi ya etlelela, Hi rhiya lava nga riki na nandzu, hi halata ngati ya vona,

¹²Hi va mita va ha hanya, kukotisa xivandla xa vafi, Hinkwavo va ta fana ni lava hojomelaka ekheleni;

¹³Hi ta kuma swo saseka hinkwaswo, Hi tata tindlu ta hina hi leswi hi swi phangeke;

¹⁴U ta kuma ku averiwa swin'we na hina, Hi ta hlanganisa mali enkwameni wun'we!”

¹⁵N'wananga, u nga tshuki u famba hi tindlela ta vona, U hambukisa nenge wa wena emitileni ya vona.

¹⁶Hikuva milenge ya vona yi tsutsumela eku biheni, Va hatlisa ku halata ngati.

¹⁷Kunene ntlhamu wu rhiyiwile mahala emahlweni ka tinyanyana hinkwato,

¹⁸Kasi vona va halata ngati ya vona, Va tirhiya vutomi bya vona.

¹⁹Hi yona mhaka ya hinkwavo lava tinyiketaka rifuwo, Hikuva ri khoma moya wa lava ri fuwaka.

²⁰Vutlhari byi huwelela ehandle, Byi tlakusa rito emitsendzeleni,

²¹Byi huwelela emindyangwini ya pongo. Enyangweni ya muti, byi dyondzisa timhaka, byi ku:

²²“N'wina, varivali, mi ta rhandza ku rivala ku yisa kwihi? Xana vasandzi va ta tsakela ku sandza, Ni va rihuhu va ta venga vutivi ku yisa kwihi xana?

²³Hundzukani hi ku tshinya ka mina! Maswivo, ndzi ta mi chelela moya wa mina, Ndzi mi dyondzisa timhaka ta mina.

²⁴Kungakuloko ndzi vitana, mi ala ku yingisa, Ndzi kondza ndzi tshambuluta voko ra mina, ku nga ri na munhu la tsundzukaka.

²⁵Mi munyile ku tsundzuxa ka mina, A mi yingisanga ku tshinya ka mina;

²⁶Na mina, ndzi ta hleka emakhombyeni ya n'wina, Ndzi sandza siku mi humelelaka hi ku chava,

²⁷Siku ku chava ku mi humelelaka kukotisa xidzedze, Ni makhombo ma mi tsutsumela kukotisa xihuhuri; Kutani mahlomulo ni mbitsi ya mbilu swi mi wela ehenhla,

²⁸Enkarhini wolowo va ta vitana eka mina, kambe ndzi nga ka ndzi nga hlamuli; Va ta ndzi lava, kambe va nga ka va nga ndzi kumi.

²⁹Hikuva va vengile vutivi, A va tihlawulelanga ku chava Yehovha,

³⁰Va arile ku lerisa ka mina, Va sandzile ku tshinya ka mina,

³¹Va ta dya mihandzu ya mikhuva ya vona, Va ta xurha hi makungu ya vona.

³²Hikuva ku hambuka ka varivali ka va dlaya, Kutani ku tsaka ka varihuhe ka va lovisa.

³³Kambe la ndzi yingisaka u ta tiakela hi ku rhula, A nga chavi khombo.”