Read tsonga Swivuriso 15 Bible Online

Swivuriso 15 - tsonga bible

Swivuriso 15

¹Ku hlamula lokunene ka rheleta vukari, Kambe ku vulavula loku tlhavaka ku pfuxa timholovo.

²Nomu wa lavo tlhariha wu nandzihisa ku tiva, Kambe nomu wa swihunguki wa humesa vuhunguki.

³Mahlo ya Yehovha ma languta hinkwako, Ma xiya lavo biha ni lavo lulama.

⁴Nomu wa ku olova i murhi wa vutomi, Loko wu ri wo homboloka wu soholota moya.

⁵Xihunguki xi monya dyondzo ya tata wa xona, Kambe la yingiselaka ku layiwa wa tlhariha.

⁶Endlwini ya la lulameke ku ni xuma lexo tala, Kambe rifuwo ra lowo biha i ku kanakana.

⁷Milomu ya lavo tlhariha yi hlwanya vutivi, Kambe mbilu ya lavo hunguka a yi lulamanga.

⁸Magandzelo ya lavo biha i manyala eka Yehovha, Kambe u tsakisiwa hi xikhongelo xa vanhu vo lulama.

⁹Ndlela ya lowo biha i manyala eka Yehovha, Kambe u rhandza la landzelaka ku lulama.

¹⁰Ku laya ku vavisa la hambukeke ndlela; La vengaka ku tshinyiwa u ta lova.

¹¹Xivandla xa vafi ni xidziva swi le mahlweni ka Yehovha; Ngopfungopfu timbilu ta vana va vanhu!

¹²Musandzi a nga rhandzi ku tshinyiwa A nga hlangani ni lavo tlhariha.

¹³Mbilu leyi tsakeke yi basisa mombo, Kambe moya wo tshoveka, i ku vava ka mbilu.

¹⁴Mbilu ya munhu wo tlhariha yi lava vutivi, Kambe milomu ya swihunguki yi dya vuhunguki.

¹⁵Eka munhu wa nhlomulo, masiku ma bihile hinkwawo; Kambe mbilu leyi tsakeke i nkhuvo wa masiku.

¹⁶Rifuwonyana leri nga ni ku chava Yehovha, Ri tlurisa rifuwo lerikulu leri nga ni mikarhateko.

¹⁷Ku dya matsavu ntsena laha ku nga ni rirhandzu, Ku tlula homu ya ku nona laha ku nga ni ku vengana.

¹⁸Munhu la karihaka u pfuxa ku hambana; Kambe la hlwelaka ku hlundzuka u tima timholovo.

¹⁹Ndlela ya lolo i rihlampfu ra mitwa, Kambe ndlela ya lavo lulama i ntila lowu khuriweke.

²⁰N'wana la yingisaka u tsakisa tata wa yena, Kambe xihunguki xi dyisa mana wa xona mbitsi.

²¹Vuhunguki i ku tsaka ka la pfumalaka ku twisisa, Kambe munhu wa ku anakanya u famba hi ku lulama.

²²Laha ku tsundzuxana ku nga hava, makungu ma hangalaka, Kambe ma tiya hi ku kanela ka lavo tala.

²³Munhu u kuma ku tsaka hi ku hlamula ka nomu wa yena, Kutani rito leri humesiwaka hi nkarhi lowu fanekelaka ra nandziha swonghasi!

²⁴Eka munhu lonene, ndlela ya vutomi yi tlhandlukela ehenhla, Yi n'wi tingawukisa xivandla xa vafi ehansi.

²⁵Yehovha u mbundzuxa yindlu ya lava tikurisaka, Kambe u tiyisa ndzilakana ya nsimu ya noni.

²⁶Meehleketo leyo biha i manyala eka Yehovha, Kambe marito lamanene ma tengile emahlweni ka yena.

²⁷La navelaka bindzu ra ku phanga u karhata yindlu ya yena, Kambe la vengaka tinyiko u ta hanya.

²⁸Mbilu ya la lulameke yi anakanya a nga si hlamula, Kambe milomu ya lavo biha yi humesa swo biha!

²⁹Yehovha u tshama ekule ni lavo biha, Kambe u yingisa mikhongelo ya lavo lulama.

³⁰Leswi tsakisaka mahlo swi tsakisa mbilu, Ku byeriwa swo nandziha ku tiyisa marhambu.

³¹Ndleve leyi yingisaka ku layiwa loku yisaka evutomini, Yi ta tshama exikarhi ka lavo tlhariha.

³²La alaka ku layiwa u sola moya wa yena, Kambe la yingiselaka ku tshinyiwa u fuwa vutlhari.

³³Xichavo xa Yehovha i xikolo xa va vutlhari, Ku titsongahata ku rhangela ku dzunisiwa.