Read tsonga Swivuriso 19 Bible Online

Swivuriso 19 - tsonga bible

Swivuriso 19

¹Xisiwana lexi fambaka hi ku lulama ka xona, Xi tlula wa ku homboloka emilon'wini ya yena, xi nga xihunguki.

²Ku hiseka loku nga riki na ku tiva, a ku sasekanga, Ni la angwetlisaka mikondzo ya yena u wela exidyohweni.

³Vuhunguki bya munhu byi n'wi hambukisa ndlela, Mbilu ya yena yi hlunamela Yehovha.

⁴Rifuwo ri humesa maxaka yo tala, Kambe xisiwana xi sukeriwa hi warikwavo.

⁵Mbhoni yo hemba yi nga ka yi nga huluki ku biwa, Ni la vulaka mavunwa a nga ka a nga poni.

⁶Lavo tala va sasela munhu lonkulu; Na swona un'wana ni un'wana i nakulobye wa la hananaka.

⁷Vamakwavo va xisiwana va xi venga hinkwavo, Ni tintangha ta xona ti ta hatla ti xi sukela, Loko xi vulavula, va hangalaka, va xi siya.

⁸La lavaka vutlhari u rhandza moya wa yena, La hlayisaka mianakanyo u ta vona ku kateka.

⁹Mbhoni yo hemba yi nga ka yi nga huluki ku biwa, Kambe la vulaka mavunwa u ta lova.

¹⁰Ku tsaka a ku lulameri xihunguki; Swi nga tshuna ngopfu loko nandza a fuma tihosi.

¹¹Munhu wa vutlhari u hlwela ku kariha, Ku twala ka yena i ku yingisela ku dyoheriwa.

¹²Ku kariha ka hosi ku fana ni ku dzuma ka nghala, Kambe rirhandzu ra yena ri fana ni mberha ebyanyini.

¹³N'wana wo hunguka i nhlomulo eka tata wa yena, Ni nsati wa ku leva i yindlu leyi pfutaka hi masiku.

¹⁴Yindlu ni rifuwo i ndzhaka ya vatata wa munhu, Kambe nsati wa ku anakanya i nyiko ya Yehovha.

¹⁵Vulolo byi wisela munhu evurhongweni, Kutani moya wa lolo wu ta va ni ndlala.

¹⁶La hlayisaka milawu u hlayisa moya wa yena, Kambe la nga siyiki ndlela ya yena u ta fa.

¹⁷La tsetselaka xisiwana u lomba Yehovha, Kutani Yehovha u ta hakela ku endla ka yena.

¹⁸Laya n'wana wa wena loko ku tshemba ka ha ri kona, Kambe u nga holovi ku n'wi dlaya.

¹⁹Munhu wo kariha u ta rhwala ku biwa ka kona, Loko u n'wi kutsula u ta fanela ku engetela.

²⁰Yingisela ku byeriwa, u amukela ku laya, U ta tlhariha mundzuku.

²¹Meehleketo yo tala yi le mbilwini ya munhu, Kambe makungu ya Yehovha hi wona lama tiyeke.

²²Lexi sasaka munhu i vunene bya yena; Munhu wa xisiwana u tlula lowa vunwa.

²³Xichavo xa Yehovha xi yisa evutomini, U ta xurha, a etlela, a nga humeleri hi khombo.

²⁴Lolo ri peta voko enkambaneni, Kutani a nga ri tlherisi enon'wini.

²⁵Bana musandzi, murivali a ta tlhariha, Holovela munhu wa ku anakanya, u ta twisisa vutivi.

²⁶La hangalasaka xuma xa tata wa yena, a va a hlongola manana, I n'wana lowo biha la khomisaka tingana.

²⁷N'wananga, tshika ku yingisela tidyondzo Loko ti ku fularhelisa timhaka ta vutlhari.

²⁸Mbhoni ya hava yi sandza ku lulama, Nomu wa vadyohi wu mita ku homboloka.

²⁹Ku biwa ku vekeriwa vasori, Ni nhonga enhlaneni wa swihunguki.