Read tsonga Swivuriso 22 Bible Online

Swivuriso 22 - tsonga bible

Swivuriso 22

¹Vito lerinene ri tlula rifuwo lerikulu, Ku khensiwa, na kona, ku tlula silivhere ni nsuku.

²Mufuwi ni xisiwana va hlangana kun'we; Loyi a va endleke havambirhi i Yehovha.

³Munhu wa vutlhari u vona khombo, kutani a tumbela, Kambe varivali va ya emahlweni va biwa.

⁴Hakelo ya ku titsongahata ni ya ku chava Yehovha i rifuwo, ni ku kwetsima, ni vutomi.

⁵Mitwa ni mitlhamu yi le ndleleni ya munhu wo homboloka; La hlayisaka moya wa yena u ta yi papalata.

⁶Dyondzisa jaha endleleni leyi a fanelaka ku famba ha yona; Ni loko a dyuhele a nga ka a nga hambuki.

⁷Mufuwi u fuma swisiwana, Ni loyi a lombaka i hlonga ra la n'wi lombeke.

⁸La byalaka ku homboloka u ta tshovela maxangu, Kutani nhonga ya vukari bya yena yi ta hela.

⁹Munhu wa tintswalo u ta kateka, Hikuva u pfuna xisiwana hi swakudya swa yena.

¹⁰Hlongorisa musandzi, timholovo ti ta hela; Ku hambana ni tingana swi ta hela na swona.

¹¹La rhandzaka ku basa ka mbilu, A ri ni milomu yo saseka, i murhandziwa wa hosi.

¹²Mahlo ya Yehovha ma hitekela vutivi, Kambe u herisa timhaka ta mbabva.

¹³Lolo ri ri: “Nghala yi kona ehandle! Ndzi nga dlayiwa erivaleni!”

¹⁴Milomu ya vavasati va timbiri i rindzi le ri enteke, Lowo nyenyetsa eka Yehovha u ta wela kona.

¹⁵Vuhunguki byi bohelela mbilu ya n'wana, Kambe nhonga ya ku laya yi ta byi susa eka yena.

¹⁶La xanisaka xisiwana u engetela rifuwo ra xona, La nyikaka mufuwi, u n'wi wisa evusiwaneni.

¹⁷Rhiya ndleve, u yingisa ku vulavula ka tintlhari; U nyiketa mbilu ya wena evutivini bya mina.

¹⁸Hikuva swi sasekile loko u swi hlayisa embilwini ya wena, Hinkwaswo swi tshama swi ri emilon'wini ya wena.

¹⁹Ndzi ta ku dyondzisa namuntlha wena hi xiviri, Leswaku u veka ku tshemba ka wena eka Yehovha.

²⁰Xana a ndzi ku tsalelanga khale, Mikhongotelo ni ku tsundzuxa,

²¹Ku ku dyondzisa marito ya ntiyiso ni ku tshembeka, U ta tiva ku hlamula swinene eka lava ku rhumaka?

²²U nga dyeleli xisiwana hi leswi xi nga xisiwana, U nga xanisi wa nhlomulo enyangweni ya muti;

²³Hikuva Yehovha u ta va lamulela, Lava va dyeke u ta va tekela vutomi.

²⁴U nga tolovelani na munhu wo kariha, U nga fambi ni lowo hlundzuka,

²⁵U nga ta dyondza mikhuva ya yena, U nga ta kuma ntlhamu wa moya wa wena.

²⁶U nga yi ni lava khomanaka hi mavoko, Va tiboha hi milandzu ya van'wana;

²⁷Va nga ku tekela yini sangu ehansi ka wena, Loko u pfumala swa ku riha ha swona-ke?

²⁸U nga tshineti ndzilakana wa khale, Lowu nga vekiwa hi vatatana wa khale.

²⁹Xana u tsundzukile munhu la gingiritekaka emitirhweni ya yena-ke? U ta yima emahlweni ka tihosi, A nga ka a nga yimi emahlweni ka vanhu ntsena.