Read tsonga Swivuriso 23 Bible Online

Swivuriso 23 - tsonga bible

Swivuriso 23

¹Loko u tshamela ku dya ni mufumi, Xiya swinene lexi vekiweke emahlweni ka wena;

²U khoma mukwana enkolweni wa wena Loko u ri wa makolo;

³U nga naveli swakudya swa yena leswi xawulaka; I vuswa byo dyelela.

⁴U nga tikarhati ku hlengeleta rifuwo, Tshika ku anakanya rona.

⁵U swi langutela yini leswi hundzaka? Rifuwo ri ta mila timpapa, Ri haha ehenhla kukotisa gama.

⁶U nga dyi vuswa bya xivondzoki, U nga naveli swakudya swa xona leswi xawulaka;

⁷Hikuva hilaha xi anakanyaka embilwini ya xona, Xi tano, xi ta ku eka wena: “Dyana, u nwa!” Kambe mbilu ya xona a yi kona eka wena;

⁸U ta tlhela u hlanta xipandzwa lexi u xi dyeke, Ni marito layo saseka ya wena u ta lahlekeriwa hi wona.

⁹U nga tshuki u vulavula etindleveni ta xihunguki, Hikuva xi ta sola ku tlhariha ka timhaka ta wena.

¹⁰U nga tshineti ndzilakana wa khale, U nga tshuki u nghena ensin'wini ya xisiwana;

¹¹Hikuva murihiseri wa xona u ni matimba, U ta xi yimela a xi lwela.

¹²Nyiketela dyondzo mbilu ya wena, Ni timhaka to tlhariha tindleve ta wena.

¹³U nga tsoni n'wana ku tshinyiwa; Hambi u n'wi xupula hi nkhavi, a nga ka a nga fi;

¹⁴U ta n'wi ba hi nkhavi u ri wena, Kutani u ta kutsula moya wa yena exivandleni xa vafi.

¹⁵N'wananga, loko mbilu ya wena yi tlhariha, Mbilu ya mina yi ta tsaka;

¹⁶Ndzi ta tsaka endzeni ka mbilu ya mina, Loko u vulavula swo lulama hi nomu wa wena.

¹⁷Mbilu ya wena yi nga tsohoki lavo biha, U hlayisa xichavo xa Yehovha hi masiku,

¹⁸Hikuva leswi taka, swa ta, Ku tshemba ka wena a ku nga endliwi swahava.

¹⁹Yingisa wena, n'wananga, u tlhariha; U fambisa mbilu ya wena endleleni leyo lulama;

²⁰U nga toloveli munwi wa byalwa, Ni vadyi va tinyama;

²¹Hikuva xidakwa ni wa makolo va tivangela vusiwana; Ku rhandza vurhongo i ku tifunengeta hi switlakati.

²²Yingisa tata wa wena la ku velekeke, U nga monyi mana wa wena loko a dyuharile.

²³Xava ntiyiso u nga wu xavisi, Hambi byi ri vutlhari, ni dyondzo ni ku anakanya.

²⁴Tata wa la lulameke u ta tsaka ngopfu, La velekeke n'wana wa vutlhari u ta tsaka ha yena.

²⁵A a tsake tata wa wena, na yena, mana wa wena. A a tsake la ku velekeke!

²⁶N'wananga, ndzi he mbilu ya wena, Mahlo ya wena a ma tsakisiwe hi ndlela ya mina.

²⁷Hikuva nsati wa mbiri i rindzi ra ku enta, Ni nghwavava i khele ra ku manyana.

²⁸U etlelela wanuna, swange i xiharhi, U andzisa timbabva exikarhi ka vanhu.

²⁹Makhombo i ya mani xana? “Yoo! Mina!” I swa mani? Timholovo i ta mani? Mikosi i ya mani? Vuntswaka i bya mani? I ya mani mahlo yo tshuka?

³⁰I swa lava tolovelaka ku nwa, Lava huwelaka vhinyo leyi pfanganeke.

³¹U nga languti vhinyo loko yi tshwukile, Loko yi huhuma xikhuvi, Ni loko yi chuluriwa hi ku olova.

³²Makumu ya yona ma kotisa nyoka leyi lumaka, Yi tlhava kukota mhiri.

³³Mahlo ya wena ma ta languta vasati va timbiri, Mbilu ya wena yi ta kanela swa ku homboloka.

³⁴U ta kotisa munhu loyi a etlelaka exidziveni xa lwandle, Ni loyi a etlelaka exihondzweni xa byatso.

³⁵Hi kona u nga ta ku: “Va ndzi bile â€” a ndzi twanga ku vava; Va ndzi balesile â€” a ndzi twanga nchumu! Ndzi ta pfuka rini? Ndzi ta tlhela ndzi yi lava kambe!”