Read tsonga Swivuriso 27 Bible Online

Swivuriso 27 - tsonga bible

Swivuriso 27

¹U nga tidzunisi hi siku ra mundzuku, Hikuva a ku tivi leswi nga ta humelela hi siku rero.

²La ku dzunisaka a ve un'wana ri nga ri ririmi ra wena, A a ve un'wana, wu nga ri nomu wa wena.

³Ribye ra tika, na rona sava, Kambe ku kariha ka xihunguki ku tlula swilo leswimbirhi.

⁴Ku kariha ku ni nsele, ku holova i ku tala ka nambu, Loko ma ri mavondzo i mani a nga ta yima emahlweni ka wona?

⁵Ku tshinya ka le rivaleni, Ku tlula rirhandzu leri fihliweke.

⁶Timbanga leti endliwaka hi munghana ti kombisa rirhandzu ra yena, Kambe ku ntswontswa ka lava ku vengaka ka kanganyisa.

⁷La xurheke u nyenya vulombe; Kambe wa ndlala, swa ku bava swa nandziha eka yena.

⁸Munhu la fambafambaka ekule ni le kaya ka yena, U kotisa nyanyana leyi wongelaka ekule ni xisaka xa yona.

⁹Mafurha, ni leswi nun'hwelaka ku nandziha, swi tsakisa mbilu; Hi sweswo, ku lerisa loku humaka embilwini ya nakulobye, ka nandziha.

¹⁰U nga fularheli nakuloni, hambi a ri munghana wa tata wa wena; U nga ngheni endlwini ya makwenu siku a nga ekhombyeni; Loyi u akeke kun'we na wena u tlula makwenu la nga ekule.

¹¹N'wananga, tlhariha, u tsakisa mbilu ya mina, Ndzi ta kuma rito ku hlamula lava ndzi rhukanaka.

¹²Munhu wa ku anakanya u vona khombo ra ha ta, a tisivelela; Murivali, yena, u hundza emahlweni, a rihiseriwa.

¹³N'wi tekeleni nguvu, hikuva u tibohile hi nandzu wa van'wana, N'wi rihiseni hikwalaho ka va le handle.

¹⁴Loyi a dzunisaka nakulobye wa ha ri mixo hi rito leri tlakukeke, Va ta ku: “Wa n'wi rhuketela.”

¹⁵Yindlu leyi pfutaka hi siku ra mpfula, Ni nsati wa timholovo, i xilo xin'we;

¹⁶La n'wi khomeke, u khomile mheho, Ni voko ra yena ra xinene ri tamele mafurha.

¹⁷Nsimbhi yi lota nsimbhi, Hi sweswo eka munhu, u hlohlotela vukari bya munhu.

¹⁸La rindzaka nkuwa u ta dya mihandzu ya wona, Ni la hlayisaka n'wini wa yena u ta dzunisiwa.

¹⁹Ku kota nghohe leyi voniwaka ematini, yi fana ni n'wini wa yona, Mbilu ya munhu yi fana ni mbilu ya munhukulobye.

²⁰Xivandla xa vafi ni tihele a swi xurhi, Mahlo ya munhu, na wona, a ma xurhi.

²¹Mbita i ya ku nyukisa silivhere, ni fulo ra nsuku; Munhu u ringisa sweswo nomu lowu n'wi dzunisaka.

²²Hambi u kandza xihunguki entshurini, U kandza hi musi u pfanga ni mavele lama siriwaka, Vuhunguki bya xona byi nga ka byi nga n'wi sukeli.

²³Tivisisa swinene tinyimpfu ta wena ha yin'we, U hlayisa swinene mitlhambi ya wena;

²⁴Hikuva ndzalo a hi ya malembe hinkwawo, Ni harhi ya vuhosi a yi tshami hi masiku.

²⁵Byanyi bya susiwa, rihlaza ra humelela, Ku laviwa byanyi etintshaveni.

²⁶Swinyimpfana swi ta va swa tinguvu ta wena, Swiphongo swi ta xava nsimu;

²⁷Ntswamba wa timbuti swi ta va swakudya swa wena ni swa yindlu ya wena, Ni swa malandza ya wena ya xisati.