Read tsonga Swivuriso 28 Bible Online

Swivuriso 28 - tsonga bible

Swivuriso 28

¹Lowo biha u tsutsuma hambi a nga landziwi, Kambe lowo lulama u tsakile kukota xinghalana.

²Loko tiko ri ngheniwile hi ku onhaka, tihosi ti tele, Kambe ku fuma ku tiyisiwa hi wanuna wa ku twisisa ni wa vutivi.

³Munhu wo pfumala la tikerisaka swisiwana, I xihuhuri lexi nga siyiki swakudya.

⁴Lava nga vuriki nchumu hi milawu va dzunisa lavo biha, Kambe lava yi hlayisaka va lwa na vona.

⁵Lavo biha a va twisisi swo lulama, Kambe lava lavaka Yehovha, va twisisa timhaka hinkwato.

⁶Xisiwana lexi fambaka hi ku lulama ka xona, Xi tlula wa tindlela to homboloka hambi a fuwile.

⁷La hlayisaka milawu i n'wana wa ku twisisa, Kambe la tolovelanaka ni swipombolo, u khomisa tata wa yena tingana.

⁸La andzisaka rifuwo ra yena hi bindzu leri tlulaka mpimo U hlengeletela munhu la nga ta tsetselela swisiwana.

⁹La pfalaka tindleve leswaku a nga twi milawu, Xikhongelo xa yena i manyala.

¹⁰La hambukisaka lavo lulama endleleni yo biha, U ta wela erindzini leri a ri celeke; Vona vo lulama va ta dya ndzhaka yo kateka.

¹¹Mufuwi u tlharihile emahlweni ya yena, Kambe u pimiwa hi xisiwana xa ku anakanya.

¹²Siku lavo lulama va hlulaka, ku twala lokukulu ku kona; Kambe lavo biha loko va tlakuka, vanhu va tumbela.

¹³La fihlaka swidyoho swa yena, a nga ka a nga kateki, Kambe la swi vulaka, a tshika, u ta kuma tintswalo.

¹⁴Ku katekile munhu la nga ni ripfalo hi masiku! Kambe la tinonon'hwisaka mbilu u ta wela eku biheni.

¹⁵Hosi ya mona leyi fumaka tiko ra vapfumari, I nghala leyi dzumadzumaka, ni bere leyi nga ni ndlala.

¹⁶Mufumi la kalaka miehleketo i muxanisi lonkulu, Kambe la vengaka ku dya vanhu u ta engeteleriwa masiku ya yena.

¹⁷Munhu la tikeriwaka hi ngati ya vanhu, U ta baleka ku fikela esirheni; a nga tshuki a yimisiwa.

¹⁸La fambaka eku lulameni u ta hlayiseka; Kambe wa ku homboloka, wa tindlela timbirhi, u ta wa xikan'we.

¹⁹La rimaka nsimu ya yena u ta xurha swakudya, Kambe la tolovelaka xihunguki u ta xurha vusiwana.

²⁰Munhu la tshembekaka u fuwile mikateko, Kambe la navelaka ku fuwa hi ku hatlisa, a nga ka a nga pfumali nandzu.

²¹Ku ya hi nghohe ya vanhu a swi sasekanga. Hikwalaho ka xipandzwa xa vuswa munhu a nga tlula milawu.

²²Munhu wa tihlo lero biha, u tsutsumela rifuwo, Kasi a nga tivi leswaku ndlala yi ta n'wi wela ehenhla.

²³La tshinyaka vanhu, endzhaku u ta kuma tintswalo Ku tlula wa ririmi ra ku sasela van'wana.

²⁴La yivelaka tata wa yena ni mana wa yena, A ku: “A swi na nandzu!” I warikwavo eka vadyohi.

²⁵Moya lowu tikukumuxaka wu pfuxa mholovo, Kambe la tshembaka Yehovha u ta xurha.

²⁶La tshembaka mbilu ya yena i xihunguki, Kambe la fambaka evutlharini u ta hlayiseka.

²⁷La pfunaka vapfumari a nga ka a nga pfumali, Loko a ri loyi a tipfalaka mahlo, u ta talela hi ku rhukaniwa.

²⁸Loko ku tlakuka lavo biha, vanhu va tumbela; Siku va lovaka, lavo lulama va tala.