Read tsonga Eklesiasta 11 Bible Online

Eklesiasta 11 - tsonga bible

Eklesiasta 11

¹Cukumeta vuswa bya wena ehenhla ka mati, hikuva endzhaku ka masiku layo tala u ta tlhela u byi kuma.

²Byi nyike ka vanhu va ntlhanu na vambirhi, kumbe ka va ntlhanu na vanharhu; hikuva a ku tivi khombo leri nga ta humelela emisaveni.

³Loko mapapa ma tele mpfula, ma yi halatela emisaveni; kutani hambi murhi wu wela etlhelo ra le dzongeni kumbe en'walungwini, laha wu welaka kona hilaha wu tshamaka kona.

⁴La xiyaka moya a nga ka a nga byali, ni la langutaka mapapa a nga ka a nga tshoveri.

⁵Kukotisa loko u nga tivi ndlela ya moya, hambi ku ri hilaha marhambu ma vumbiwaka hakona ekhwirini ra wansati la tikeke, a ku tivi mitirho ya Xikwembu lexi endlaka hinkwaswo.

⁶Byala mbewu ya wena ka ha ri mixo; mavoko ya wena u nga tshuki u ma nyiketa nkarhi nimadyambu hikuva a ku tivi leswaku ku ta mila yihi, kumbe leyi, kumbe liya, kumbe loko ti ta mila ha timbirhi.

⁷Hakunene ku vonakala ka nandziha, kutani mahlo ma rhandza ku vona dyambu.

⁸Hambi munhu a nga hanya malembe layo tala, u fanele ku tsaka ha wona, kambe, na swona, u fanele ku anakanya masiku ya munyama, hikuva ma ta va lamanyingi. Hinkwaswo leswi nga ta humelela i swahava.

⁹Jaha, tsakela vuntshwa bya wena, mbilu ya wena yi ku tsakisa hi masiku ya vuntshwa bya wena, u famba hi ku rhandza ka mbilu ya wena, ni ku languta ka mahlo ya wena;

¹⁰kambe tiva leswaku Xikwembu xi ta ku avanyisa eka sweswo hinkwaswo. Susa tingana embilwini ya wena, u yisa ku biha ekule ni nyama ya wena; hikuva vuntshwa ni vurhonga i swahava!