Read tsonga Eklesiasta 3 Bible Online

Eklesiasta 3 - tsonga bible

Eklesiasta 3

¹Xilo xin'wana ni xin'wana xi ni nkarhi wa xona, kutani nkarhi wu kona wa hinkwaswo leswi endliwaka ehansi ka tilo.

²Nkarhi wu kona wa ku velekiwa wu kona nkarhi wa ku fa, nkarhi wu kona wa ku simeka, wu kona nkarhi wa ku tsuvula leswi simekiweke.

³Nkarhi wu kona wa ku dlaya, wu kona nkarhi wa ku horisa; nkarhi wu kona wa ku hlanhla, wu kona nkarhi wa ku aka.

⁴Nkarhi wu kona wa ku rila, wu kona nkarhi wa ku hleka, nkarhi wu kona wa ku kolola, wu kona nkarhi wa ku cina.

⁵Nkarhi wu kona wa ku hoxa maribye wu kona nkarhi wa ku rholela maribye, nkarhi wu kona wa ku ntswontswa, wu kona nkarhi wa ku tshika ku ntswontswana.

⁶Nkarhi wu kona wa ku lava, wu kona nkarhi wa ku lahlekeriwa;

⁷nkarhi wu kona wa ku handzula, wu kona nkarhi wa ku rhunga; nkarhi wu kona wa ku hlayisa, wu kona nkarhi wa ku cukumeta; nkarhi wu kona wa ku miyela, wu kona nkarhi wa ku vulavula;

⁸nkarhi wu kona wa ku rhandza, wu kona nkarhi wa ku venga; nkarhi wu kona wa nyimpi, wu kona nkarhi wa ku rhula.

⁹La tirhaka u kuma yini hi ntirho lowu a tikarhataka ha wona xana?

¹⁰Ndzi vonile mitirho leyi Xikwembu xi yi nyikeke vana va vanhu leswaku va tikarhata ha yona.

¹¹Xi endlile hinkwaswo swi sasekile hi nkarhi wa swona, xi vekile ku anakanya ka vutomi lebyi nga heriki etimbilwini ta vona; hambiswiritano, a ku na munhu la twisisaka mitirho leyi endliweke hi Xikwembu eku sunguleni ka yona ku yisa eku heteleleni.

¹²Hikwalaho ndza swi tiva leswaku a ku na vunene eka vona, loko ku nga ri ku titsakela ni ku tiendlela vunene eku hanyeni ka vona.

¹³Ni leswaku loko munhu a dya, a nwa, a tsakela ntirho hinkwawo wa ku tikarhata ka yena, na swona i ku nyika ka Xikwembu.

¹⁴Ndza swi tiva leswaku hinkwaswo leswi endliweke hi Xikwembu swi tshama hilaha ku nga heriki; a ku na xilo lexi nga engeteriwaka kona ni lexi nga susiwaka kona; kutani Xikwembu xi endla sweswo leswaku nchavo wu va kona emahlweni ka xona.

¹⁵Lexi humelelaka sweswi, a xi ri kona ni khale, kutani lexi nga ta humelela a xi ri kona khale, na xona; Xikwembu xi humesa ni leswi ngi swi hundzile.

¹⁶Ndzi engeta kambe ndzi vona ehansi ka dyambu leswaku ku homboloka a ku ri kona endhawini ya ku avanyisa ni ku homboloka a ku ri kona endhawini ya ku lulama.

¹⁷Ndzi ku embilwini ya mina: Xikwembu xi ta avanyisela la lulameke ni lowo biha, hikuva hinkwaswo leswi endliwaka, ni mitirho hinkwayo swi vekeriwe nkarhi wa kona.

¹⁸Ndzi tlhela kambe ndzi ku embilwini ya mina: Timhaka ti tano hikwalaho ka vana va vanhu, Xikwembu xi ta va ringa, va ta tiva va ri vona leswaku va fana ni swiharhi.

¹⁹Hikuva khombo leri humelelaka vana va vanhu, ri humelela ni swiharhi havambirhi va humeleriwa hi khombo rin'we. Mukhuva lowu munhu a faka ha wona, na xona xiharhi xi fisa sweswo; moya wa hinkwaswo i wun'we, a ku na laha munhu a tlulanaka ni xiharhi, hikuva hinkwaswo i vuhava.

²⁰Hinkwaswo swi ya exivandleni xin'we. Hinkwaswo swi huma entshurini, kutani hinkwaswo swi tlhelela entshurini.

²¹I mani la tivaka leswaku moya wa vana va vanhu wu tlhandlukela ehenhla. Kumbe loko moya wa xiharhi wu ngirimela ehansi emisaveni xana?

²²Loko swi ri tano, ndzi vonile leswaku a ku na vunene lebyi tlulaka leswaku munhu a tsakela mitirho ya yena, hikuva hi kona ku averiwa ka yena. Hikuva a nga tlherisiwa hi mani ku ta tsakela leswi nga ta sala endzhaku ka yena?