Read tsonga Eklesiasta 5 Bible Online

Eklesiasta 5 - tsonga bible

Eklesiasta 5

¹Xiyisisa milenge ya wena, loko u nghena endlwini ya Xikwembu, u tshinelela ku yingisa timhaka, ku nga ri ku humesa gandzelo ra swiphukuphuku hikuva a swi tivi leswaku swi endla swo biha.

²U nga tshuki u hatlisisa nomu wa wena, mbilu ya wena yi nga tshuki yi hatlisa ku vulavula mhaka emahlweni ka Xikwembu, hikuva Xikwembu xi le matilweni kasi wena u la emisaveni; loko swi ri tano, marito ya wena ma nga tshuki ma tala.

³Hikuva kukotisa loko norho wu huma evunyingini bya timhaka, nomu wa xihunguki wu tiviwa hi vunyingi bya marito.

⁴Loko u tibohile eka Xikwembu hi ku hlambanya u nga hlweri ku hetisa, hikuva a xi tsakisiwi hi swihunguki. Hetisa ku hlambanya loku u ku hlambanyeke.

⁵Lexi lulameke i ku ka u nga hlambanyi, ku ri ni ku hlambanya loko u nga hetisi ku hlambanya ka wena.

⁶U nga tshuki u tshiketa nomu wa wena wu yisa nyama ya wena exidyohweni, u nga tshuki u vula emahlweni ka ntsumi [ya Xikwembu] leswaku u hoxile ntsena. Hikuva Xikwembu a xi ta karihela yini rito ra wena, a xi ta onhela yini ntirho wa mavoko ya wena-ke?

⁷Hikuva kukotisa loko milorho leyo tala swi ri swahava, swi tano ni ka marito layo tala. Loko swi ri tano, chava Xikwembu.

⁸Loko u nga vona etikweni rin'wana xisiwana xi xanisiwa, ni ku lulama ni ku avanyisa loko swi hombolokisiwa, u nga tshuki u hlamala ha swona, hikuva la tlakukeke ehenhla ka un'wana la tlakukeke u kona la langutelaka, ni Muungameri u kona la nga ehenhla ka vona.

⁹Ku saseka lokukulu ka tiko hileswaku hosi yi va kona leyi tikarhatelaka mitirho ya masimu.

¹⁰La rhandzaka mali, a nga ka a nga kolwi hi mali; la rhandzaka ku hanya hi ndzalo, na yena, a nga ka a nga kolwi ha yona. Na swona i vuhava.

¹¹Loko xuma xi andza, na vona lava xi dyaka va andza, loko swi ri tano, n'wini wa xona u fuwa yini ha xona loko ku nga ri ku xi languta hi mahlo ntsena?

¹²Vurhongo bya munhu la tirhaka bya nandziha, hambi a dya ngopfu, hambi a dya switsanana; kambe ku xurha ka mufuwi a ku n'wi nyiki vurhongo.

¹³Ku ni khombo lero biha leri ndzi ri voneke ehansi ka dyambu: i rifuwo leri hlayiseriweke n'wini wa rona, kambe ra n'wi vavisa.

¹⁴Rifuwo rero ri onhiwa hi khombo rin'wana; kakuloko a velekile n'wana ku nga ha sali nchumu evokweni ra yena.

¹⁵Ku kotisa loko a humile ekhwirini ra mana wa yena a nga ri na nchumu, u ta titlhelela a ri ntsena, a tifambela kukotisa loko a tile, kambe, eku karhatekeni ka yena, u ta ya a nga tamelanga nchumu, lexi a nga fambaka ha xona a xi fumbarhele hi voko.

¹⁶Sweswo na swona i khombo leri vavisaka: hilaha a nga ta hakona, a tifambela sweswo, kasi a fuwa yini hi ku tikarhata ka yena hi swahava?

¹⁷Kutani u dya hi masiku hinkwawo vuswa bya yena emunyameni, a ri ni tingana letikulu, a karihile hi ku vaviseka ka yena.

¹⁸Lexi ndzi xi voneke hi lexi: hi lexinene ni lexo saseka ku dya ni ku nwa, ni ku titsakela hi ku karhateka hinkwako loku munhu a tikarhataka hakona ehansi ka dyambu, hi masiku hinkwawo ya vutomi bya yena lawa Xikwembu xi n'wi nyikeke wona, hikuva hi kona ku averiwa ka yena.

¹⁹Kunene loko Xikwembu xi nyikile munhu un'wana rifuwo ni xuma, xi n'wi nyikile ni mfanelo ya ku swi dya ni ku titekela swona, ni ku tsakela ku karhateka ka yena, sweswo i ku nyika ka Xikwembu.

²⁰Hikuva a nga ka a nga anakanyi ngopfu masiku ya ku hanya ka yena, hikuva Xikwembu xi n'wi hlamula hi ku n'wi tsakisa mbilu.