Read tsonga Eklesiasta 8 Bible Online

Eklesiasta 8 - tsonga bible

Eklesiasta 8

¹La fanaka ni lowo tlhariha i mani xana? I mani la tivaka ku hlamusela mhaka xana? Vutlhari bya munhu byi sasekisa mombo wa yena, byi hundzula ku onya ka mombo wa yena.

²Ndzi ri: “Hlayisa ku lerisa ka hosi hikwalaho ka ku hlambanya ka wena eka Xikwembu.

³U nga tshuki u hatlisa ku suka emahlweni ka yona, u nga tiyiseri emhakeni leyo biha, hikuva yi endla hinkwaswo leswi yi swi tsakelaka.

⁴Hikuva rito ra hosi ri ni matimba, kutani i mani la nga ta ku eka yena: ‘U endla yini?’

⁵“La hlayisaka nawu, a nga tivi mhaka yo biha, ni mbilu ya lowo tlhariha yi tiva mikarhi ni timfanelo.

⁶Hikuva hinkwaswo leswi u rhandzaka ku swi endla nkarhi wu kona wa swona, ni mfanelo yi kona ya swona. Hikuva khombo ra munhu ri kulukumba ehenhla ka yena.

⁷A nga tivi niswitsanana leswi nga ta n'wi humelela, hikuva la nga ta n'wi byela leswi nga ta tumbuluka i mani xana?

⁸“Munhu a nga na matimba ya ku arisa moya leswaku a wu sivela, na swona a nga na ku lerisa siku ra rifu, a nga na ku chupuka efun'wini rero, ni ku biha ku nga ka ku nga lweri lava ku endlaka.”

⁹Ndzi swi vonile hinkwaswo swoleswo loko ndzi ri karhi ndzi anakanya mitirho hinkwayo leyi endliwaka ehansi ka dyambu, ni laha vanhu va fumaka ehenhla ka van'wana ku va endla swo biha.

¹⁰Ndzi vona lavo homboloka loko va lahliwa kasi lava endlaka swinene va tshikiwa va ya ekule ni tindhawu leti kwetsimaka, va rivariwa hi va le kaya. Swoleswo, na swona, i swahava.

¹¹Kutani, hikuva ku avanyisa loku avanyisaka mitirho hinkwayo leyo homboloka ku nga hatlisi ku humelela, hikwalaho-ke timbilu ta vana va vanhu ti teleke ku navela ku endla swo biha.

¹²Kambe, hambi mudyohi a nga endla swo biha eka dzana, a andzeriwa masiku, hambiswiritano, ndza swi tiva leswaku lava chavaka Xikwembu va ta endleriwa leswinene, na vona, lava chavaka emahlweni ka mombo wa xona.

¹³Lowo biha a nga ka a nga endleriwi leswinene, kambe a nga ka a nga andzeriwi hi masiku. U ta fana ni ndzhuti, hikuva a nga chavanga emahlweni ka mombo va Xikwembu.

¹⁴Swahava swin'wana leswi nga emisaveni hi leswi: ku na lavo lulama lava humeleriwaka hi hakelo leyi lulameleke mitirho ya lavo homboloka, kutani lavo homboloka va kona lava humeleriwaka hi hakelo leyi lulameleke mitirho ya lavo lulama. Ndzi vurile leswaku swoleswo na swona i swahava.

¹⁵Ndzi dzunisa ku tsaka, ndzi ku: “A ku na lexi sasekeke eka munhu ehansi ka dyambu, loko ku nga ri ku dya, ni ku nwa, ni ku titsakela; hi lexi a xi siyeriweke, eku tikarhateni ka yena hi masiku hinkwawo ya ku hanya ka yena, lawa Xikwembu xi n'wi nyikeke wona ehansi ka dyambu.”

¹⁶Kuteloko ndzi pfumelele mbilu ya mina ku tiva vutlhari, ndzi va ndzi languta mitirho leyi endliwaka emisaveni, hilaha vanhu van'wana va nga nyikiki mahlo ya vona vurhongo ninhlekanhi, hambi byi ri vusiku;

¹⁷kutani ndzi vona mitirho hinkwayo ya Xikwembu, ni leswaku munhu a nga hluleka ku twisisa ntirho, hambi wu ri wun'we lowu endliwaka ehansi ka dyambu, hikuva hambi munhu a nga swi lavisisa leswaku a swi kuma, a nga ka a nga swi kumi; swi tsandza ni lowo tlhariha; a nga ku, wa swi tiva, kambe a nga ka a nga swi kumi.