Read tsonga Eklesiasta 9 Bible Online

Eklesiasta 9 - tsonga bible

Eklesiasta 9

¹Kunene hinkwaswo leswi, ndzi swi xiyisisile, kutani ndzi swi vona eku vonakaleni leswaku lavo lulama ni lavo tlhariha va le vokweni ra Xikwembu kun'we ni mitirho ya vona; vanhu va nga ka va nga swi tivi leswaku va rhandziwa kumbe va vengiwa; hinkwaswo swi le mahlweni ka vona.

²Hinkwavo va humeleriwa hi leswi fananaka: khombo ri ri rin'we ri tumbulukela la lulameke ni lowo biha, lonene, la tengeke, ni wa thyaka, la gandzelaka, ni la nga gandzeriki. Lonene u kotisa mudyohi, la rhuketelaka u fana ni la chavaka ku rhuketela.

³Ku biha loku ku le henhla ka hinkwaswo leswi endliwaka ehansi ka dyambu, hikuva khombo ri ri rin'we ri humelela hinkwavo; timbilu ta vana va vanhu ti tele hi ku biha timbilu ta vona ti tele vuhunguki eku hanyeni ka vona, endzhaku ka sweswo va tiyela eka vafi. Hikuva i mani la hlawuriweke?

⁴Loko va ri lava hanyaka, ku tshemba ku kona eka vona, hikuva mbyana leyi hanyaka yi tlula nghala leyi feke.

⁵Hikuva lava hanyaka va swi tiva leswaku va ta fa, kambe vafi a va tivi nchumu, kambe va nga ka va nga ha vi na hakelo emisaveni, hikuva ku tsundzuxiwa ka vona ku rivariwile.

⁶Rirhandzu ra vona, ni ku venga ka vona, ni mona wa vona swi lahlekile a va ha ri na ku averiwa eka hinkwaswo leswi endliwaka ehansi ka dyambu ni siku ni rin'we.

⁷Famba, u ya dya swakudya swa wena hi ku tsaka, u nwa vhinyo ya wena hi mbilu leyi titsakelaka hikuva Xikwembu xi tsakisiwile hi mitirho ya wena.

⁸Tinguvu ta wena ti va leti baseke hi masiku, ni mafurha ma nga tshuki ma pfumaleka enhlokweni ya wena.

⁹Hanya swinene ni nsati lo u n'wi rhandzaka hi masiku hinkwawo ya wena ya swahava hikuva hi kona ku averiwa ka wena evutomini ni le ku karhaleni hinkwako ka wena loku u tikarhataka ha kona ehansi ka dyambu.

¹⁰Hinkwaswo leswi voko ra wena ri nga swi kumaka ku tirha, swi tirhe hi matimba ya wena hikuva exivandleni xa vafi laha u yaka kona, a ka ha ri na ntirho, hambi makungu, ni ku tiva, hambi vutlhari.

¹¹Ndzi tlherile kambe ndzi vona ehansi ka dyambu leswaku eku siyisaneni, switsutsumi a swi siyi van'wana hi masiku kumbe tinhenha a ti hluri hi masiku ni swakudya a hi swa lavo tlhariha hi masiku, ni rifuwo a hi ra lava nga ni ku twisisa hi masiku, ni ku fundziwa a hi ka tintlhari hi masiku, hikuva nkarhi ni khombo, i swa hinkwavo.

¹²Hikuva munhu a nga tivi nkarhi wa yena, kukota tinhlampfi leti phasiwaka hi rikoka, ni tinyanyana leti phasiwaka hi mitlhamu; vana va vanhu va phasisiwa sweswo na vona, hi nkarhi wa khombo, loko ri va wela hi xipuku.

¹³Ndzi vonile vutlhari byin'wana kambe ehansi ka dyambu, i vutlhari lebyikulu loko ndzi byi vona.

¹⁴A ku ri ni mutinyana lowu nga riki na vanhu vo tala, wu pfukeriwa hi hosi leyikulu, yi wu sivelela, yi wu rhendzela hi mixaxa leyikulu.

¹⁵A ku ri ni munhu kona wa xisiwana la tlhariheke, hi yena la poniseke muti hi vutlhari bya yena; hambiswiritano, munhu yeloyi wa xisiwana a nga anakanyiwanga hi munhu.

¹⁶Kutani ndzi ku: “Vutlhari byi sasekile ku tlula matimba, hambiloko vutlhari bya xisiwana byi sandziwa, ni loko marito ya xona ma nga yingisiwi.”

¹⁷Marito ya lavo tlhariha ma yingisiwa eku rhuleni, ku tlula ku huwelela ka hosi leyi fumaka swihunguki.

¹⁸Vutlhari byi sasekile ku tlula matlhari, kambe mudyohi a ri un'we u onha vunene lebyinyingi.