Read tsonga Risimu Ra Tinsimu 6 Bible Online

Risimu Ra Tinsimu 6 - tsonga bible

Risimu Ra Tinsimu 6

¹Murhandziwa wa wena u ye kwihi, Wena lowo saseka exikarhi ka vavasati? Munghana wa wena u kongome kwihi? Hi ta n'wi lava na wena.

²Murhandziwa wa mina u fambile ensin'wini ya yena, Etindzimeni ta mirhi ya risuna, Leswaku a dyisa ntlhambi wa yena emasikwini, a kha makhon'wa.

³Ndzi wa murhandziwa wanga, ni murhandziwa wanga i wa mina: U dyisa ntlhambi wa yena exikarhi ka makhon'wa.

⁴U sasekile, murhandziwa wanga, ku fana na Tirisa, U sasekile kukotisa Yerusalema, Kambe wa chavisa ku fana ni mavandla lama tameleke mijeko.

⁵Tlherisa mahlo ya wena, hikuva ma ndzi hlurile; Misisi ya wena yi kotisa ntlhambi wa timbuti lowu vonakaka etintshaveni ta Giliyadi.

⁶Meno ya wena ma fana ni ntlhambi wa tinyimpfu Leti pfaka eku hlantswiweni; Hinkwato ka tona ti veleke mahahla, A ku na yin'we exikarhi ka tona leyi nga nyumba.

⁷Tinhlaya ta wena ti fana ni xiphemu xa girenada, Ehansi ka xisirhelo xa wena.

⁸Ku ni makosikazi ya makume ya ntlhanu na rin'we, Ni vavasati lavatsongo va makume ya ntlhanu na manharhu, ni vanhwanyana lava nga riki na ku hlayiwa.

⁹Un'we ntsena wa vona i tuva ra mina muhetiseki wanga; I n'wana la nga swakwe eka mana wa yena, I muhlawuriwa wa loyi a n'wi velekeke. Vanhwanyana loko va n'wi vona, va n'wi vula la katekeke; Makosikazi ni vavasati va vurisa sweswo, va n'wi dzunisa.

¹⁰I mani loyi a humelelaka kukotisa vurhonga. La sasekeke kukotisa n'weti, la tengeke kukotisa dyambu, Kambe a chavisa kukotisa mavandla lama tameleke mijeko xana?

¹¹Ndzi ngirimele entangeni wa mikanyi, Ku ya vona rihlaza ra nkova, Ku ya languta vhinya loko kumbe yi hlukile, Ni mirhi ya magirenada, loko kumbe yi balekile swiluva?

¹²Hambi ndzi nga swi tivi, ku navela ka mina Ku ndzi yisile eka tigolonyi ta tiko ranga ra mafundza.