Read tsonga Risimu Ra Tinsimu 8 Bible Online

Risimu Ra Tinsimu 8 - tsonga bible

Risimu Ra Tinsimu 8

¹Oho! Loko ngi u ri makwerhu, La an'weke emaveleni ya manana! Loko ngi ndzi hlangana na wena ehandle, a ndzi ta ku ntswontswa, Kutani ngi ndzi nga ri na ku soriwa.

²Ingi ndzi ku heleketa, ndzi ku yisa endlwini ya manana; Wena u ta ndzi lerisa, Mina ndzi ku nwisa vhinyo ya ku nandziha, Ni leswi tsokombelaka swa magirenada ya mina.

³Voko ra yena ra ximatsi a ri ve ehansi ka nhloko ya mina, Kutani a a ndzi singarhele hi lera xinene!

⁴Ndza mi lerisa, n'wina vanhwanyana va Yerusalema, Mi nga n'wi hiti, ni loko ku ri ku pfuxa murhandziwa wanga, Loko a nga si swi rhandza.

⁵I mani loyi a tlhandlukaka, a pfa emananga, A tiseketele eka murhandziwa wa yena? Ndzi ku pfuxile u ri ehansi ka mirhi ya maapula, Laha u velekiweke kona hi mana wa wena, U twile ku vaviseka kona loyi a ku velekeke.

⁶Ndzi teke, ndzi va embilwini ya wena kukotisa mfungho, Kukotisa mfungho evokweni ra wena; Hikuva rirhandzu ri ni matimba ku fana ni rifu, Makwanga ma tiya kukotisa xivandla xa vafi. Ku hiseka ka wona i ku hiseka ka ndzilo, I langavi ra Yehovha.

⁷Mati lamakulu ma nga ka ma nga timi rirhandzu, Ni milambu yi nga ka yi nga ri kukuti. Hambi munhu a nga humesela rirhandzu rifuwo hinkwaro ra yindlu ya yena, U ta soriwa ntsena.

⁸Hi ni makwerhu lontsongo wa wanhwanyana, La nga siki va na mavele; Hi ta endla yini hi makwerhu, Siku va nga ta ta n'wi vuta?

⁹Loko ngi ri ri rirhangu, Hi ta aka ehenhla ka rona makhokholo ya silivhere; Loko ngi yi ri nyangwa, Hi ta yi pfala hi rivanti ra kedari.

¹⁰Ndzi rirhangu, ni mavele ya mina ma fana ni makhokholo, Hikwalaho emahlweni ka yena ndzi fana ni loyi a kumeke ku rhula.

¹¹Solomoni a a ri ni nsimu ya vhinya le Baala-Hamoni; A yi vekile emavokweni ya vahlayisi; Un'wana ni un'wana a humesela mihandzu ya yona tixikele ta silivhere ta khume ra madzana.

¹²Vhinya ya mina, leyi nga ya mina kunene, ndzi ta yi hlayisa; Tixikele ta khume ra madzana i ta wena, Solomoni, Ni madzana mambirhi eka lava hlayisaka mihandzu ya yona!

¹³Wena la tshamaka emasin'wini! Vanakulorhi va rhandza ku twa rito ra wena. Wa nga ndzi twisa rona!

¹⁴Suka, u tsutsuma, murhandziwa wanga! Kukotisa ntswele ya mhala, kumbe rhole ra timbavala, Etintshaveni ta mirhi ya risuna!