Read tsonga Esaya 10 Bible Online

Esaya 10 - tsonga bible

Esaya 10

¹Khombo eka lava vekaka milawu leyi nga lulamangiki, lava tsalaka mapapila yo homboloka;

²va alela swisiwana mfanelo ya swona, va dya vapfumari va tiko ra mina, va endla tinoni ku tshumba ka vona, va dya swisiwana.

³Mi ta endla yini hi siku ra ku kambiwa ni loko ku lova loku humaka ekule ku ta mi wela ehenhla? Mi ta tsutsumela eka mani ku pfuniwa? Mi ta veka kwihi xuma xa n'wina xana?

⁴A ku salanga nchumu loko ku nga ri ku tsongahatiwa exikarhi ka lava bohiweke, kumbe ku wa exikarhi ka lava dlayiweke. Hambiswiritano, vukari bya yena a byi tlhelanga, ni voko ra yena ra ha tshambulutiwile.

⁵Khombo eka Asiriya, nkhavi wa vukari bya mina! Nkhavi lowu ndzi wu vekaka evokweni ra yena, wu ta ndzi rihisela.

⁶Ndza n'wi rhuma ku ya lwa ni tiko lero homboloka, ndzi n'wi lerisa ku ya lwa ni tiko leri ndzi ri kariheleke, a ta tshumba swilo swa rona, a phanga xuma, a ri kandziyela tanihi ndzhope wa mitsendzele.

⁷Kambe yena a nga xiyi, mbilu ya yena a yi tsundzuki leswaku swi tano, hikuva a ehleketa ntsena ku onha ni ku lovisa matiko layo tala.

⁸Hikuva a ku: “Tindhuna ta mina a hi tihosi hinkwato xana?”

⁹A ndzi ku: “Kalino a nga onhiwanga tanihi Karkemixi, na Hamata tanihi Aripadi, na Samariya tanihi Damaska xana?

¹⁰Hilaha voko ra mina ri fikeke eku fumeni ka swikwembu, kasi swifaniso swa kona a swi tlula swa Yerusalema, ni swa Samariya,

¹¹xana ndzi nga ka ndzi nga endli Yerusalema, ni swifaniso swa yena, hilaha ndzi endleke Samariya ni swikwembu swa yena xana?”

¹²Kambe kutakuloko Hosi yi hetile ntirho wa yona hinkwawo entshaveni ya Siyoni na Yerusalema, ndzi ta ba hosi ya Asiriya hikwalaho ka mihandzu ya ku tikurisa ka mbilu ya yona, ni ku tiarisa ka mahlo ya yona lama tlakukeke;

¹³hikuva u te: “Ndzi endlile sweswo hi matimba ya voko ra mina ni vutlhari bya mina, hikuva ndzi tlharihile! Ndzi tshinetile mindzilekana ya matiko, ndzi titshumbele xuma xa wona; tanihi nhenha, ndzi wisile lava tshameke eswiluvelweni!

¹⁴Voko ra mina ri tshumbile xuma xa matiko kukotisa leswi nga exisakeni xa tinyanyana, tanihi leswi ku oleriwaka mandza lama tshikiweke ndzi tihlengeletele misava hinkwayo hi sweswo. A ku na la bubumeleke hi timpiko, ni la ahlamiseke nomu, ni la rileke.”

¹⁵Xana xihloka xi nga tidzunisa eka la tsemaka ha xona, ni saha yi nga tikurisa eka la sahaka ha yona xana? Kukotisa leswo nge nkhavi wu nga tsekatsekisa voko ra loyi a wu yimiseke, ni loko nhonga yi nga tlakusa loyi a nga riki murhi!

¹⁶Hikwalaho Hosi ya tinyimpi yi ta ondzisa swihontlovila swa Asiriya, kutani ehansi ka ku vangama ka yena ku ta pfukeka ku pfurha kukotisa ku pfurha ka ndzilo.

¹⁷Ku vonakala ka Israele ku ta hundzuka ndzilo, ni Mukwetsimi wa yena ri ta va langavi leri hisaka, ri va ri heta mitwa ni swigatlu swa yena hi siku rin'we.

¹⁸U ta herisa sweswo ku vangama ka xihlahla xa yena ni xa masimu ya yena ku hela moya ni miri, swi va tanihi munhu loko a vabya hi mfambo.

¹⁹Mirhi ya xihlahla xa yena leyi nga ta sala yi ta va leyi nga hlayiwaka, n'wana u ta tiva ku tsala ntsengo wa yona.

²⁰Enkarhini wolowo, masalela ya Israele ni lava poneke va yindlu ya Yakobo va nga ka va nga ha tshami va tshemba mubi wa vona, kambe va ta tshemba kunene Yehovha, Mukwetsimi wa Israele.

²¹Masalela ya Yakobo ma ta hundzukela eka Xikwembu xa matimba.

²²Hikuva, hambi tiko ra wena, oho Israele, ri nga ringana ni sava ra lwandle, ma ta va masalela ya rona ntsena lama nga ta vuya; ku lovisa ku kaneriwile, ku ta andzisa ku lulama.

²³Hikuva Hosi, Yehovha wa tinyimpi, u ta hetisa etikweni hinkwaro ku onha loku a ku kaneleke.

²⁴Hikwalaho, Hosi, Yehovha wa tinyimpi, u te: “Wena tiko ranga la akeke eSiyoni, u nga chavi Asiriya, hambi a ku ba hi nkhavi, ni loko a tlakusa nhonga ehenhla ka wena, tanihi leswi ku endliweke khale hi Vaegipta.

²⁵Hikuva ku nga ha ri kungani, ku kariha ka mina ku ta hundza, ni vukari bya mina byi ta hambuka eka vona, byi va lovisa.

²⁶Yehovha wa tinyimpi u ta tlakusa nkharisa ehenhla ka Asiriya, tanihi leswi a nga endla Midiyani, eribyeni ra Orebe; u ta tlakusa nhonga ehenhla ka lwandle tanihi leswi a swi endleke eEgipta khale!

²⁷“Enguveni yoleyo ndzhwalo wa Asiriya wu ta susiwa ekhatleni ra wena, ni joko ra yena enhan'wini ya wena, kutani joko ri ta tshoveka hi ku nyuhela ka wena.”

²⁸U tile eAyata, a hundzela eMigirono, a siya xuma xa yena eMikamaxa.

²⁹Tinyimpi ta yena ti hundzile exiphandzeni, nivusiku va gova eGeba; Rhama wa tshuka Gibeya wa Sawulo wa baleka.

³⁰Kolola, wena, n'wana wa Galimi! Tivone, wena Layixi! Anatoto u ni khombo!

³¹Madimena wa hangalaka, lava akeke eGebimi va nyenga.

³²Hi siku rin'we u ta fika eNobo, u ta tlakusa voko ra yena eka ntshava ya n'wana wa Siyoni, ni ka xitsunga xa Yerusalema!

³³Langutani, Hosi, Yehovha wa tinyimpi, u ta tshova hi matimba lamakulu swicapila swa mirhi; leyi leheke yi ta tsemiwa, kutani leyi tlakukeke ku tlurisa yi ta wisiwa ehansi.

³⁴Wa tsema hi nsimbhi swihlahla leswi tlhumeke, Lebanoni u ta wisiwa hi Lowa matimba!