Read tsonga Esaya 11 Bible Online

Esaya 11 - tsonga bible

Esaya 11

¹Kutani rhavi ri ta huma ensinyeni wa Yese, hluke ri ta huma etimitswini ta wona, ri veka mihandzu.

²Moya wa Yehovha wu ta tshama ehenhla ka yena, moya wa vutlhari ni wa mianakanyo, moya wa ntsundzuxo ni wa matimba, moya wa ku tiva ni wa xichavo xa Yehovha.

³U ta tsakela xichavo xa Yehovha; a nga ka a nga avanyisi hi nghohe, hambi ku ri ku avanyisa hi ku twa mhaka ya xiri.

⁴U ta avanyisa xisiwana hi ku lulama, a kanela timhaka ta lavatsongo va misava hakunene. U ta ba misava hi nhonga ya nomu wa yena, a lovisa swidyohi hi moya wa nomu wa yena.

⁵Ku lulama ku ta va vamba ra xisuti xa yena, ku tshembeka ku ta va vamba ra matsheve ya yena.

⁶Hlolwa ri ta tshamisa ni xinyimpfana, yingwe yi ta etlela ni ximbutana. Rhole ni xinghalana, ni homu leyi noneke, swi ta va kun'we, swi byisiwa hi wandzisanyana.

⁷Ntswele ya homu ni ya bere swi ta dya swin'we, marhole ya swona ma ta etlela kun'we; nghala yi ta dya byanyi tanihi homu.

⁸Xihlangi lexi an'waka xi ta titlangela enceleni wa mhiri, ni n'wana la lumukeke u ta nghenisa voko enceleni wa xihiridyana.

⁹Ku nga ka ku nga endliwi swo biha, ni ku onhiwa entshaveni hinkwayo leyi kwetsimaka ya mina; hikuva ku tiva Yehovha ku ta eneta misava, tanihi leswi mati ma funengetaka vuento bya lwandle.

¹⁰Enkarhini wolowo rimitsu ra Yese ri ta yimiseriwa matiko tanihi mfungho, matiko ma ta ri lava, kutani vuako bya rona byi ta va ku vonakala ntsena.

¹¹Kambe enkarhini wolowo, Hosi yi ta yimisa ra vumbirhi voko ra yona, yi kutsula masalela ya tiko ra yona, lama siyiweke ematikweni ya Asiriya, ni ya Egipta, ni ya Patroso, ni ya Kuxi, ni ya Elamu, ni ya Xinara, na Hamata ni le swihlaleni swa lwandle.

¹²Yi ta tlakusela matiko mujeko, kutani yi ta hlengeleta lava hlongoriweke va Israele, yi hlengeleta ni lava hangalasiweke va Yuda etinhleni ta mune ta misava.

¹³Kutani mavondzo ya Efrayimi ma ta hela, valala va yena etikweni ra Yuda va ta susiwa. Efrayimi a nga ka a nga vondzoki Yuda, Yuda, yena, a nga ka a nga ha lwi na Efrayimi.

¹⁴Va ta hahela ekhatleni ra Vafilista evupeladyambu, va ta hlasela kun'we vana va le vuxeni; va ta khoma Edomu na Mowabu, ni vana va Amoni, va ta va luva.

¹⁵Yehovha u ta omisa rhavi ra lwandle ra Egipta, u ta tlakusa voko ra yena ehenhla ka nambu wa Yufrata, a huhuta hi matimba ya moya wa yena, a wu tsemakanyisa, a wu endla milambu ya ntlhanu na mimbirhi, va pela va ri ni tintanghu.

¹⁶Kutani mpfutla wu ta va kona eka masalela ya tiko ra yena, lama nga ta va ma tshamile etikweni ra Asiriya, tanihi leswi ingi wu ri kona eka Israele siku a sukeke etikweni ra Egipta.