Read tsonga Esaya 2 Bible Online

Esaya 2 - tsonga bible

Esaya 2

¹Marito lawa Esaya, n'wana Amotsi, a ma nyikiweke ehenhla ka Yuda na Yerusalema.

²Emikarhini ya makumu, ku ta humelela leswaku ntshava ya yindlu ya Israele yi ta vekiwa enhlohlorhini ya tintshava, yi tlakusiwa ehenhla ka switsunga, kutani matiko hinkwawo ma ta talela kona.

³Matiko layo tala ma ta ta kona, ma ku: “Tanani, hi ta tlhandlukela entshaveni ya Yehovha, endlwini ya Xikwembu xa Yakobo; xi ta hi dyondzisa tindlela ta xona kutani hi ta famba emitileni ya xona.” Hikuva nawu wu ta huma eSiyoni, ni rito ra Yehovha ri ta huma eYerusalema.

⁴Kutani Xikwembu xi ta lamula matiko, xi ta avanyisa matiko layo tala ngopfu. Hi mabanga ya vona va ta fula swikomu, hi matlhari ya vona va ta fula masikeri; tiko ri nga ka ri nga ha lwi ni rin'wana, kutani a ku nga ha dyondzisiwi ku lwa.

⁵Yindlu ya Yakobo, tanani hi famba eku vonakaleni ka Yehovha!

⁶Hikuva wena Yehovha u tshikile tiko ra wena, yindlu ya Yakobo, hikuva va tele hi swa le vuxeni, va ni vungoma tanihi Vafilista, kutani va endla xinakulobye ni vana va vamatiko.

⁷Tiko ra yena ri tele silivhere ni nsuku, xuma xa rona a xi heri; ri tele tihanci, ni tigolonyi ta rona a ti heri.

⁸Ri tele swikwembu swo hemba, va khinsamela ntirho wa mavoko ya vona, ni leswi tintiho ta vona ti swi vatleke.

⁹Kwalaho lowa ku fa u ta tsongahatiwa, lavakulu va ta tsan'wisiwa, kutani u nga ka u nga va rivari.

¹⁰Nghena endzeni ka tintshava, u tumbela entshurini emahlweni ka Xikwembu lexi chavisaka, ni vukulukumba lebyi vangamaka bya xona!

¹¹Mahlo lama honokeke ya lowa ku fa ma ta tsan'wisiwa, ku tikukumuxa ka tinhenha ku ta tsongahatiwa, kutani Yehovha a ri swakwe u ta tlakusiwa siku rero.

¹²Hikuva ku ni siku ra Yehovha wa tinyimpi, ra ku tsongahata hinkwaswo leswi tlakukeke, ni hinkwaswo leswi tikukumuxaka;

¹³ni mirhi hinkwayo ya kedari ya Lebanoni leyi leheke, leyi tlakukeke ni mikuhlu hinkwayo ya Baxani;

¹⁴ra ku tsongahata tintshava hinkwato leti leheke, ni switsunga hinkwaswo leswi tlakukeke,

¹⁵ni makhokholo hinkwawo lama tiyeke,

¹⁶ni rirhangu leri tiyeke, ni tingalava hinkwato ta Tarxixi, ni hinkwaswo leswi tsakisaka mahlo.

¹⁷Ku kukumuka ka lowa ku fa ku ta tsongahatiwa, ku tlakuka ka tinhenha ku ta tsan'wisiwa, kutani Yehovha a ri swakwe u ta tlakusiwa esikwini rero.

¹⁸Swifaniso hinkwaswo swa swikwembu swi ta pfumaleka.

¹⁹Kutani vanhu va ta balekela emabakweni ya tintshava ni le miceleni ya misava, hi ku chava Yehovha ni vukulukumba bya yena lebyi vangamaka, loko a ta yima ku ta chavisa misava.

²⁰Esikwini rero, vanhu va ta cukumeta swikwembu swa nsuku ni swa silivhere leswi va tiendleleke swona ku swi gandzela eka makondlo ni vamangadyani,

²¹loko va balekela emabakweni ya tintshava ni le tinfeni ta maribye, emahlweni ka Xikwembu lexi chavisaka ni vukulukumba bya xona lebyi vangamaka loko xi ta yima ku ta chavisa misava.

²²Hikwalaho-ke, tshikani ku tshemba munhu la nga ni ku hefemula ntsena etinhompfini ta yena, hikuva munhu u pfuna yini xana?