Read tsonga Esaya 21 Bible Online

Esaya 21 - tsonga bible

Esaya 21

¹Tanihi swidzedze swa dzonga leswi hungaka emananga, wa ta, u huma emisaveni leyi chavisaka.

²Ndzi kombiwile leswi chavisaka ngopfu: Muxanisi u tirha hi ku xanisa ka yena, muphangi wa phanga! Tlhandluka Elamu! Rhendzela, wee Mediya! Ndzi herisa ku konya hinkwako!

³Hikwalaho swisuti swa mina swi tele ku vaviseka; ku lun'wa ku ndzi khomile tanihi loko wansati a veleka; ndza solovanya loko ndzi n'wi twa, ndzi tshukile loko ndzi n'wi vona.

⁴Mbilu ya mina ya titivala, gome ra ndzi khoma; vusiku lebyi ndzi nga byi navela, byi tele ku chavisa.

⁵Swakudya swi vekiwile etafuleni, mulanguteri wa langutela, va dya, va nwa! Sukani mi yima, n'wina tindhuna! Totani switlhangu!

⁶Hikuva Hosi yi ndzi byerile, yi ku: “Famba, u veka mulanguteri, a ta vula lexi a xi vonaka!

⁷U vone ntlawa wa vakhandziyi va tihanci va famba havambirhi, ni vakhandziyi va timbhongolo, ni vakhandziyi va tikamela; kutani a languta, a rhalarhala!”

⁸Kutani a huwelela, a ku: “Hosi, ndza wonga tanihi nghala hi siku hinkwaro, ndzi mulanguteri wa vusiku hi masiku hinkwawo:

⁹Vonani, ku humelele vakhandziyi va tihanci lava fambaka havambirhi.” Kambe a huwelela a ku: “U wile Babilona, u wile swin'we ni swifaniso hinkwaswo leswi vatliweke swa swikwembu swa yena, swi fayiwile ehansi.”

¹⁰Oho! Tiko ranga leri huriweke tanihi koro exivuyeni! Leswi ndzi swi tweke eka Yehovha wa tinyimpi, Xikwembu xa Israele, ndzi swi vurile eka n'wina.

¹¹Rito ri huwelela ri huma eSeyira, ri fika eka mina, ri ku: “Mulanguteri, timhaka ta vusiku hi tihi? Mulanguteri, timhaka ta vusiku hi tihi?”

¹²Mulanguteri a ku: “Vurhonga bya humelela, na byona vusiku. Loko mi rhandza ku vutisa, vutisani! Vuyani mi ta!”

¹³Mi ta govela exihlahleni lexo tlhuma xa Arabiya, n'wina timpfhumba ta Dedani!

¹⁴Tanani ni mati, mi hlanganisa la nga ni torha; n'wina vaaki va tiko ra Tema, phamelani mubaleki vuswa!

¹⁵Hikuva va balekile emahlweni ka fumu, emahlweni ka ripanga leri hlumuriweke, emahlweni ka vurha lebyi kungiweke, ni le mahlweni ka ku leva ka ku lwa ka nhenha ya nyimpi.

¹⁶Hikuva Hosi yi te eka mina: “Ka ha sele lembe rin'we, leri fanaka ni lembe ra mutirhi, kutani ku ta hela ku vonakala hinkwako ka Kedari;

¹⁷Eka mavurha layo tala ya tinhenha ta Kedari, ku ta sala xitsanana ntsena; hikuva Yehovha, Xikwembu xa Israele u vurisile.”