Read tsonga Esaya 30 Bible Online

Esaya 30 - tsonga bible

Esaya 30

¹“Khombo eka vana lava tiarisaka,” ku vula Yehovha, “lava kanelaka timhaka, kambe ndzi nga ri na vona, va endla xinakulobye, ku nga ri hi ku rhandza ka mina, va ta engeta xidyoho ehenhla ka xidyoho.

²Va xikela eEgipta, va nga si vutisa nomu wa mina, va tsutsumela xisirhelelo xa Faro, va tisirhelela hi ndzhuti wa Egipta!

³Hikuva xisirhelelo xa Faro xi ta va hundzukela tingana, ni ku tiveka endzhutini wa Egipta ku ta va hundzukela xisandzu.

⁴Vakulu va Yuda va fikele eSowani, ni varhumiwa va yena va le Hanesi.

⁵Va ta va ni tingana hikwalaho ka tiko leri nga riki na matimba ku va pfuna ni ku va lwela, kambe ti ta va tingana ta vona ni gome ntsena.”

⁶Va rhwexa swifuwo ku ya le dzongeni, etikweni ra makhombo, ra nhlomulo, ra nghala ya ntswele, ni leya matsune, ya mhiri, ni dragona leyi hahaka; va rhwexa vukosi bya vona etimbhongolweni, ni rifuwo ra vona emihlaneni ya tikamela, ku ya etikweni leri va nga tiki kuma nchumu eka rona.

⁷Hikuva ku pfuna ka Egipta i swahava ni mafenya; hikwalaho ndzi vula sweswo i mpfumawulo lowukulu, lowu nga pfuniki nchumu.

⁸Famba sweswi u ya tsala timhaka leti ehenhla ka tafula emahlweni ka vona u tsala ni le bukwini ti ta hlayiseriwa emikarhini leyi taka, xi va xikombiso, hilaha ku nga heriki.

⁹Hikuva i tiko leri tiarisaka, i vana va mavunwa, vana lava alaka ku yingisa milawu ya Yehovha;

¹⁰va ri eka vavoni: “Mi nga voni!” ni ka vaprofeta: “Mi nga hi profeteli swinene, hi byeleni timhaka leti tsakisaka, mi hi bvumbhela leti xisaka!

¹¹Hambukani ndlela hi le tlhelweni, tshikani ku veka Mukwetsimi wa Israele emahlweni ka hina!”

¹²Hikwalaho, Mukwetsimi wa Israele u ri: “Loko mi sola rito leri, kutani mi titshembisa hi ku nonon'hwa ni ku homboloka, mi va mi titiyisa ha swona,

¹³hikwalaho xidyoho lexi, xi ta sala na n'wina kukotisa khumbi leri tlakukeke, leri nga ni tinfa, leri lavaka ku wa;

¹⁴ku mbundzuka ka rona ku humelela kan'we, ri fayeka tanihi mbita ya vumba loko yi fayiwa ha vomu, leyi ku nga sariki xirhengele lexi munhu a nga okaka ndzilo ha xona, kumbe ku ka mati exihlobyeni ha xona.”

¹⁵Hikuva Hosi Yehovha, Mukwetsimi wa Israele, u ri: “Mi ta kuma ku hlayiseka ka n'wina loko mi tlhela ni loko mi wisa; mi ta kuma matimba eku rhuleni ni le ku tshembeni”; kambe mi arile!

¹⁶A mi ku: “Hi ta baleka hi khandziye tihanci!” Kwalaho mi ta tsutsumisiwa! Kambe mi ku: “Hi to khandziya tihanci leta matsambo! Kwalaho va ta mi hlongorisa hi matsambo.

¹⁷Va khume ra madzana va ta tsutsuma, va chavisa hi munhu a ri un'we; loko lava ntlhanu va mi chavisa, mi ta tsutsuma mi ko mi sala kukotisa mhandze leyi celeriweke enhlohlorhini ya ntshava, ni kukotisa mujeko entsungeni.”

¹⁸Hikwalaho Yehovha u ta mi langutela ku mi tsetselela, u ta tshinela a mi tsetselela, hikuva Yehovha i Xikwembu lexi lulameke, xi katekisa hinkwavo lava xi tshembaka!

¹⁹Hikuva wena tiko leri akeke eSiyoni, ni le Yerusalema, u nga ha rili! Loko u huwelela eka yena, u ta ku tsetselela, loko a twa ku vitana ka wena, u ta ku hlamula.

²⁰Kutani Hosi yi ta mi nyika vuswa enhlomulweni wa n'wina, ni mati ekhombyeni ra n'wina vafundhisi va wena a va nga ha tumberi, u ta languta vafundhisi va wena hi mahlo.

²¹Kutani tindleve ta wena ti ta twa rito endzhaku ka wena, ri ku: “Ndlela hi leyi, fambani ha yona,” mi nga yi hi ra xinene, kumbe hi ra ximatsi!

²²Kutani swifaniso swa n'wina leswi vatliweke leswi namekiweke hi silivhere, ni swifaniso swa n'wina leswi chuluriweke, leswi lemiweke hi nsuku, mi ta swi chela thyaka, mi swi cukumeta kukotisa manyala, mi ku: “Huma!”

²³Enkarhini wolowo u ta nisela timbewu leti mi nga ta byala emasin'wini kutani swakudya swa tinhlampfu leti mirisiweke hi misava swi ta va leswi noneke leswi xurhisaka. Enkarhini wolowo mitlhambi ya n'wina yi ta dyela emadyelweni lama ahlameke.

²⁴Tihomu ni timbhongolo leti rimaka ti ta dya folichi leyi lungiweke hi munyu, leyi hleriweke hi xihlungulo ni rihlelo.

²⁵Kutani ehenhla ka ntshava yin'wana ni yin'wana leyi leheke, ni le henhla ka ntsunga wun'wana ni wun'wana lowu tlakukeke, milambyana ya mati lama khulukaka yi ta va kona siku ra ku dlawa lokukulu siku makhokholo ma waka.

²⁶N'weti wa n'weti wu ta fana ni ku vonakala ka dyambu, ku vonakala ka dyambu ku ta engeteriwa kantlhanu na kambirhi, kukotisa masiku ya ntlhanu na mambirhi, hi siku Yehovha a nga ta ntshuxa mbanga ya tiko ra yena, a horisa mipfembeti ya ku biwa ka yena.

²⁷Vonani, vito ra Yehovha ra ta hi le kule; ri ta hi ndzilo lowo kariha ni ku hisa loku chavisaka; milomu ya yena yi tele ku kariha, ririmi ra yena ri kotisa langavi leri hisaka.

²⁸Ku hefemula ka yena ku kota ndhambi leyi halakaka, yi tlakukile ku fika enhan'wini ya munhu, ku hlela matiko hi rihlelo ra ku onhaka, ni ku veka matomu yo hambuka emilon'wini ya matiko.

²⁹Mi ta yimbelela ku kota loko va ri emikhubyeni va yimbelela nivusiku, kutani timbilu ta n'wina ti ta tsaka hi ku tsaka loku fanaka ni ka lava fambaka va yimba tinanga, loko va ya entshaveni ya Yehovha, eribyeni lero tiya ra Israele.

³⁰Kutani Yehovha u ta twakarisa rito ra yena lerikulu, a komba ku xungeta ka voko ra yena lero leva ni ku kariha ni ndzilo wa langavi leri hisaka, ni xidzedze, ni mpfula leyikulu, ni maribye ya xihangu.

³¹Hikuva Asiriya u ta rhurhumela hi rito ra Yehovha loko a n'wi ba hi nhonga ya yena.

³²Emikarhini hinkwayo leyi nhonga ya Yehovha yi nga ta n'wi ba, swingomana ni madzandzana swi ta pfuma, Yehovha u ta lwa na yena hi matimba.

³³Hikuva khale, tlhelo leri fanaka ni ra Tofete ri lunghisiwile, ku lunghiseriwele hosi xi ri xikhele lexi ahlameke, ni nhulu ya tihunyi leti nga ta n'wi hisa hi ndzilo, ni tihunyi to tala; ku hefemula ka Yehovha ku hisa ku kota nambu wa xivavula.