Read tsonga Esaya 31 Bible Online

Esaya 31 - tsonga bible

Esaya 31

¹Khombo eka lava rilelaka Egipta ku lava ku pfuniwa, va titiyisa hi tihanci, va tshemba tigolonyi, hikuva ti tele va tshemba vakhandziyi va tihanci hikuva va ni matimba kasi a va languti Mukwetsimi wa Israele, a va lavi Yehovha!

²Kasi na yena u ni vutlhari; hikwalaho a tisaka maxangu, a nga tlherisi marito ya yena; u ta pfukela yindlu ya vadyohi, ni ku pfuna ka lava tirhaka swo homboloka.

³Muegipta i munhu, a hi Xikwembu; tihanci ta yena i nyama, a hi moya. Kutakuloko Yehovha a tshambuluta voko ra yena, mupfuni u ta khunguvanyeka ni loyi a n'wi pfunaka, va ta hela swin'we hinkwavo.

⁴Hikuva Yehovha u ndzi byerile, a ku “Kukotisa nghala, kumbe xinghalana; loko xi dzumadzumela xiharhi lexi khomiweke hi xona, xi nga chavi pongo ra varisi lavo tala lava rhambaneke, xi nga baleki hi ku tala ka vona; hi mukhuva wolowo, Yehovha wa tinyimpi u ta xika ku ya hlasela ntshava ya Siyoni ni ripala ra kona.

⁵Kambe kukotisa tinyanyana loko timpapa ta tona ti ku mpaa, Yehovha wa tinyimpi u ta funengeta Yerusalema, u ta lamulela, a tsetselela, a va a hanyisa.”

⁶Hundzulekani eka yena loyi mi n'wi fularheleke swonghasi, n'wina, vana va Israele!

⁷Hikuva siku lero un'wana ni un'wana u ta lahla swikwembu swa yena swa silivhere, ni swikwembu swa yena swa nsuku leswi mi tiendleleke swona ku dyoha ha swona.

⁸“Kutani Asiriya u ta herisiwa hi tlhari leri nga riki ra munhu, ni fumu leri nga riki ra munhu ri ta n'wi dya, a baleka emahlweni ka rona, kutani majaha ya yena ma ta endliwa makhumbi.

⁹U ta sukela khokholo ra yena, kutani tihosana ti ta rhurhumela emahlweni ka mujeko hi ku tshuka,” ku vula Yehovha loyi ndzilo wa yena wu nga le Siyoni, ni hondo ya yena yi nga eYerusalema.