Read tsonga Esaya 34 Bible Online

Esaya 34 - tsonga bible

Esaya 34

¹Tshinelani, n'wina matiko mi ta yingisa! N'wina vanhu yingiselani! Misava a yi yingise ni swa yona hinkwaswo; misava, ni leswi humaka eka yona hinkwaswo!

²Hikuva Yehovha u karihele matiko hinkwawo, u karihele tinyimpi ta wona hinkwato; u va yirisile u va nyiketile rifu.

³Lava tlhaviweke va vona va cukumetiwa ntsena, mitsumbu ya vona ya nun'hwa, kutani ngati ya vona yi khuluka etintshaveni.

⁴Mavandla hinkwawo ya matilo ma nyuka, kutani matilo ma ta songiwa kukota buku, vandla hinkwaro ra wona ri wela ehansi kukota matluka ya vhinya loko ma hlanhleka, ni kukota matluka ya murhi wa nkuwa loko ma vunile.

⁵Hikuva fumu ra mina ri pyopyiwile etilweni, kutani, vonani, ri ta xikela ehenhla ka Edomu, ni le henhla ka tiko leri ndzi nga ri yirisa ku ri avanyisa.

⁶Fumu ra Yehovha ri tele ngati, ri omelele mafurha, ni ngati ya swinyimpfana ni ya swiphongo, ni mafurha ya mipambana ya tinyimpfu; hikuva Yehovha u ni xitlhavelo eBosira, ni xitlhavelo lexikulu etikweni ra Edomu.

⁷Tinyarhi, ni tinkunzi, ni tihavi ti wa na tona kutani tiko ri ta cheleriwa hi ngati, ni misava yi ta nyuka hi mafurha.

⁸Hikuva Yehovha u vekile siku ro rihisa ni lembe ro rihisa, leri a nga ta rihisa Siyoni ha rona.

⁹Milambu ya Edomu yi ta hundzuka nhlaka, ni misava xivavula, kutani tiko ra kona ri va tiko ra tinhlaka leti tshwaka,

¹⁰ti nga ka ti nga timiwi hi munhu vusiku ni nhlekanhi; musi wa tona wu ta mbuluka hilaha ku nga heriki, ku ta va mananga hi masiku ni masiku, kutani a ku na munhu, ni loko a ri un'we, la nga ta hundza kona.

¹¹Gumba ni nhloni swi ta ri fuma, kutani swikotlwana ni mawukuwuku swi ta aka kona; va ta tshandzavuta kona pindza ra ku onha ni xiringaniso xa ku herisa.

¹²Vakulukumba va kona va ta pfumaleka ku hlawula hosi, ni tindhuna hinkwato ta kona ti ta herisiwa.

¹³Mitwa yi ta mila etindlwini ta tihosi ta kona, mahlwehlwe ni swigatlu swi ta mila emakhokholweni ya kona, kutani ri va tiko ra timhungubye ni rivala ra tiyimbhu.

¹⁴Ku ta va laha swivandzana swa nhova swi hlengeletanaka kona swin'we ni timhisi; swiphongo swi ta vitanana kona; byi ta va vuako bya makhuhunhu ya vusiku ntsena, ma ta kuma ku wisa kona.

¹⁵Hilaha nyoka leyi tlulaka yi nga ta endla yindlu ya yona kona, yi tshikela mandza, yi alama, yi kurisa mavondlo ya yona endzhutini. Makoti hinkwawo ma ta hlangana kona.

¹⁶Lavani ebukwini ya Yehovha, mi hlaya! A ku na un'we wa vona la nga ta pfumaleka; a ku na un'we la nga ta pfumala nakulobye; hikuva nomu wa yena wu vurile, kutani moya wa yena wu va hlengeletile.

¹⁷Hikuva u kanele hikwalaho ka vona, kutani voko ra yena ri va pambulele tiko, ri ri pimile hi ngoti, kutani va ta ri fuma hilaha ku nga heriki, va aka kona hi masiku.