Read tsonga Esaya 39 Bible Online

Esaya 39 - tsonga bible

Esaya 39

¹Enkarhini wolowo, Merodaka-Baladani, n'wana Baladani, hosi ya Babilona, a rhumela Hezekiya papila ni nyiko; hikuva a a twile leswaku Hezekiya a a vabyile a va a hanya.

²Hezekiya a tsaka hakona, kutani a kombisa tintsumi vuhlayiselo bya xuma xa yena, wu ri nsuku ni silivhere, ni mirhi ya risuna, ni mafurha yo saseka, ni matlhari ya yena hinkwawo, ni hinkwaswo leswi ngi swi ri exumeni xa yena. A ku salanga nchumu wa leswi Hezekiya a va kombiseke endlwini ya yena ni le ku fumeni hinkwako ka yena.

³Esaya, muprofeta, a ya eka hosi Hezekiya, a ku eka yena: “Vanhu lava teke eka wena, va vule yini, va pfa kwihi xana?” Hezekiya a hlamula, a ku: “Va pfa etikweni leri nga ekule, eBabilona.”

⁴Kutani a ku: “Va vonile yini endlwini ya wena-ke?” Hezekiya a ku: “Va vonile hinkwaswo leswi nga endlwini ya mina; a ku na nchumu exumeni xa mina lexi ndzi nga va kombisangiki xona.”

⁵Kutani Esaya a ku eka Hezekiya: “Yingisa rito ra Yehovha!

⁶Waswivo, masiku ma ta, lawa hinkwaswo leswi nga endlwini ya wena, ni hinkwaswo leswi vatata wa wena va swi hlengeleteke ku fika siku leri, swi ta yisiwa eBabilona, ku nga ka ku nga sali nchumu, ku vula Yehovha.

⁷Kutani va ta teka vana va wena lava humaka eka wena, lava u va velekeke, va ta va matsheniwa endlwini ya hosi ya Babilona.”

⁸Hezekiya a ku eka Esaya: “Rito ra Yehovha leri u ri vuleke, ri nene!” A engeta a ku: “Hikuva ku rhula ku ta va kona ni ku etlela ka tiko eku hanyeni ka mina.”