Read tsonga Esaya 41 Bible Online

Esaya 41 - tsonga bible

Esaya 41

¹“N'wina swihlale, miyelani, mi ndzi yingisa! Matiko a ma ve ni matimba lamantshwa, a ma tshinele, ma vulavula! A hi fambeni swin'we hi ya ehubyeni.

²I mani la pfuxeke, le vuxeni loyi ku lulama ku nga emitileni ya yena xana? I mani la n'wi nyiketeke matiko ni la tsongahateke tihosi ehansi ka yena? I mani la hundzuluxeke tlhari ra tona ntshuri, ni vurha bya tona mungu lowu hahaka?

³A va hlongorisa, a famba a tsakile endleleni leyi a nga siki fambaka eka yona.

⁴La heriseke swilo sweswo i mani? Hi yena la vitaneke tinxaka ta vanhu ni le ku sunguleni, mina Yehovha, lowo rhanga ni la nga hundzukiki ku ya fika ni makumu.”

⁵Swihlale swi n'wi vona, swi ri karhi swi chava, makumu ya misava ma rhurhumela; va tshinelela, va ta,

⁶va pfunana, un'wana ni un'wana a khongotela makwavo, a ku: “Tiyisa mbilu!”

⁷Muvatli u khongotela munyukisi, la vangamisaka hi nyundzu u khongotela la baka xikalanyundzu. U khensa murhi lowu hlanganisaka tinsimbhi, a ku: “Wu nene!” Kutani u tiyisa xifaniso hi swipikiri leswaku xi nga tsekatseki.

⁸“Kambe wena Israele, nandza wa mina, wena Yakobo, loyi ndzi ku hlawuleke, xaka ra Abrahama leri ndzi ri rhandzeke!

⁹Ndzi ku tekile emakun'wini ya misava, ndzi ku vitanile etikweni leri nga ekule, ndzi ku byerile, ndzi ku: ‘U nandza wa mina,’ ndzi ku hlawurile, a ndzi ku nyenyanga!

¹⁰U nga chavi, ndzi na wena. U nga tshuki hikuva ndzi Xikwembu xa wena. Ndza ku tiyisa, ndza ku lwela, ndzi ku khoma hi voko ra mina ra xinene leri hlulaka.

¹¹Vonani! Va ta chava, va va ni tingana hinkwavo lava ku karihelaka, va ta herisiwa, va ta lova hinkwavo lava kanetanaka na wena;

¹²u ta va lava, kutani u nga ha va kumi lava nga ku pfukela; va ta herisiwa va hundzuka swahava, lava nga valala va wena.

¹³Hikuva ndzi Xikwembu xa wena la tiyisaka voko ra wena ra xinene, la ku byelaka: U nga chavi, ndza ta ku ta ku lamulela.

¹⁴U nga chavi, xivungunyana xa Yakobo, masalela lamatsongo ya Israele; ndzi ta ku lwela, ku vula Yehovha; Muhlawuleki wa Israele i muponisi wa wena.

¹⁵“Vonani, ndzi endla ha wena xileyi lexi tlhavaka, lexintshwa. U ta faya, u va u sila tintshava, u endla switsunga leswi kotisaka mungu,

¹⁶u ta swi hlela, moya wu va wu swi susa, kutani xihuhuri xi swi hangalasa; kambe wena u ta titsakela eka Yehovha, u ta tidzunisa eka Muhlawuleki wa Israele.

¹⁷Swisiwana ni vapfumari va lava mati va nga ma kumi, ririmi ra vona ri omile hi torha. Mina Yehovha, ndzi ta va yingisa, mina Xikwembu xa Israele ndzi nga ka ndzi nga va tshiki.

¹⁸Ndzi ta pfelerisa milambu emitsungeni, ni miseledyana exikarhi ka mikova, ndzi ta hundzula mananga tiva, ni misava leyi omeke mati lama khulukaka.

¹⁹Ndzi ta mirisa emananga kedari, ni munga, ni mirta, ni mutlhwari, ndzi ta mirisa kipresi, ni nkuhlu, ni seringa ekwandzasini;

²⁰leswaku vanhu va vona ni ku tiva, va va va xiya, kutani va anakanya leswaku i voko ra Xikwembu leri nga endla swilo sweswo ni leswaku Muhlawuleki wa Israele, hi yena Muendli wa swona.

²¹“Kanelani timhaka ta n'wina,” ku vula Yehovha. “Tilweleni,” ku vula hosi ya Yakobo.

²²“Humesani timhaka ta n'wina, mi bvumbha leswi nga ta humelela! Mi bvumbhile tihi khale? Vulani, hi ta swi tiva, hi ta vona ku humelela eka swona, kumbe mi hi byele leswi nga ta humelela.

²³Vulani timhaka leti nga ta ta emahlweni, hi ta tiva leswaku mi swikwembu. Endlani xilo xo biha kumbe xo saseka, hi ta xi vona, hi xi hlalela swin'we.

²⁴Vonani, a mi nchumu, ntirho wa n'wina i wa hava, swa yila ku titsakela ka n'wina.

²⁵“Ndzi n'wi vitanile, a huma en'walungwini, kutani u ta hi le vuxeni, a khongela hi vito ra mina. U kandziyela va matimba endzhopeni, tanihi vumba lebyi muvumbi a byi kandziyelaka.

²⁶Xi kombisiwe i mani ka ha ri eku sunguleni leswaku hi swi tiva; i mani la swi vuleke khale, hi ta ku: ‘Swi tano xana?’ A ku na munhu la vuleke ta yena, a ku na munhu la kombiseke ta yena. Marito ya n'wina a ma twiwanga hi munhu.

²⁷Hi mina lowo rhanga la byeleke Siyoni, ndzi ku: ‘Hi volavo, hi volavo!’ Ndzi rhumela eYerusalema, ntsumi ya timhaka to nandziha!

²⁸Ndza tshama ndzi languta; kutani a ku na munhu, a ku na munhu exikarhi ka vona la bvumbhaka, la kotaka ku hlamula loko ndzi n'wi vutisa.

²⁹Vonani, hinkwavo i swahava, mitirho ya vona a hi ya nchumu, swifaniso swa vona i moya wa hava ntsena!