Read tsonga Esaya 46 Bible Online

Esaya 46 - tsonga bible

Esaya 46

¹Bele u wile, Nebo wa tsekatseka swifaniso swa vona swi rhwariwa hi swifuwo ni tihomu; a mi swi rhwala, kutani sweswi swa tikela swifuwo leswi karheleke.

²Va dedeleka, va wa swin'we va nga ka va nga ponisi ndzhwalo, kutani va ya, na vona, eku bohiweni.

³“Ndzi yingiseni n'wina va yindlu ya Yakobo, na n'wina hinkwenu masalela ya yindlu ya Israele, n'wina lava ndzi mi rhwaleke mpfhuka mi tswariwa, ndzi va ndzi mi veleka loko ma ha ri eveleni ra mana wa n'wina!

⁴Ndzi ta va tano ku fika eku dyuhaleni ka n'wina; ndzi ta mi rhwala ku fika etimpfini ta n'wina. Ndzi mi endlile, kutani ndzi ta tshama ndzi mi rhwala; ndzi ta mi tiyisa, ndzi va ndzi mi ponisa!

⁵“Mi ta ndzi fanisa na mani, mi ta ndzi ringanisa na mani leswaku hi fanana?

⁶Va humesa nsuku enkwameni wa vona, va pima silivhere exikalweni va rhamba mufuri leswaku a fula ha swona xikwembu ku xi khinsamela ni ku xi gandzela.

⁷Va xi tlakula, va xi rhwala ekhatleni, va xi veka endhawini ya xona, kutani xi tshama kona, xi nga suki; hambi va huwelela eka xona a xi hlamuli a xi ponisi munhu enhlomulweni wa yena.

⁸“Anakanyani swilo leswi, kutani mi va vavanuna! N'wina, vatiarisi, tiyingiseni!

⁹Tsundzukani swilo leswi humeleleke khale; hikuva hi mina Xikwembu, a ku na xin'wana; ndzi Xikwembu, kutani a ku na loyi a fanaka na mina.

¹⁰Ndzi tivisa ka ha ri eku sunguleni leswi nga ta humelela eku heteleleni, ni leswi nga siki humelelaka, ndza swi bvumbha. Makungu ya mina ma ta tiya, kutani ndzi ta endla ku rhandza ka mina hinkwako.

¹¹Ndzi vitana gama hi le vuxeni, ni munhu la nga ta endla ku rhandza ka mina le tikweni leri nga ekule. Hilaha ndzi vuleke hakona, ndzi ta endlisa sweswo; ndzi kanerile mhaka, ndzi ta yi hetisa.

¹²“Ndzi yingiseni, n'wina vanhu va timbilu leto nonon'hwa, lava nga ekule ni leswo lulama!

¹³Ndzi tshinetile ku lulama ka mina, ku le kusuhi, kutani ku hlayiseka ka mina ku nga ka ku nga hlweri; ndzi ta veka ku hlayiseka le Siyoni, ni ku twala ka mina ehenhla ka Israele.”