Read tsonga Esaya 5 Bible Online

Esaya 5 - tsonga bible

Esaya 5

¹Ndzi ta yimbelela eka murhandziwa wa mina, risimu ra murhandziwa wanga ematshan'weni ya nsimu ya yena ya vhinya. Murhandziwa wanga a a ri ni nsimu ya vhinya exitsungeni lexi noneke.

²Kutani a yi rima, a susa maribye, a simekela vhinya leyi hlawuriweke, a aka tshala exikarhi ka yona, kutani a cela kona xikhuvuto; kutani a tshembile leswaku yi ta veka mihandzu leyo nandziha, kasi yi vekile leyo bava.

³Kutani sweswi, n'wina vaaki va Yerusalema, na n'wina vanhu va Yuda, avanyisani exikarhi ka mina ni vhinya ya mina.

⁴Lexi nga fanela ku endliwa, lexi ndzi nga xi endlangiki i yini? Leswi ndzi languteleke leswaku yi ta veka mihandzu leyo nandziha, i yini leswi yi vekeke leyo bava xana?

⁵Sweswi, ndzi nga mi tivisa lexi ndzi nga ta xi endla eka vhinya ya mina: ndzi ta simula rihlampfu ra yona, ndzi yi endla madyelo, ndzi mbundzumuxa rirhangu ra yona kutani yi ta kandziyeriwa.

⁶Ndzi ta yi endla fusi yi nga ha hlakuriwi, yi nga ha rimiwi, ku ta mila mitwa ni swigatlu ntsena; kutani ndzi ta lerisa mapapa leswaku ma nga ha tshami ma nisa mpfula ehenhla ka yona.

⁷Hikuva vhinya ya Yehovha wa tinyimpi i yindlu ya Israele, kutani vavanuna va Yuda i swimudyana leswi ngi a tsakeke ha swona; a tshembile ku lulama, kasi i ku halatiwa ka ngati; a tshembile ku tenga, kasi i ku vovola.

⁸Va ni khombo lava engetelaka tindlu eka tindlu, lava hlanganisaka masimu hi masimu, mpfhuka wu ko wu hela, mi va n'wina mi ri swenu vini va tiko!

⁹Yehovha wa tinyimpi u vurile etindleveni ta mina, a ku: “Kunene tindlu leto tala leti, ti ta hundzuka rhumbi, tindlu leto saseka letikulu leti, ti ta pfumala vaaki.

¹⁰Hikuva khume ra tindzima ta vhinya ti ta veka khuwana ri ri rin'we; saka rin'we ra mbewu ri ta veka xirhundzu xin'we ntsena.”

¹¹Va ni khombo lava vindzukaka ku tsutsumela swakunwa leswi pyopyisaka, ni lava hitekaka nivusiku, va hisiwa hi vhinyo.

¹²Gubu ni timbila, swingomana, ni nanga, ni vhinyo, hi yona mikhuvo ya vona, kambe a va xiyi ntirho wa Yehovha, a va voni swiendlo swa mavoko ya yena.

¹³Hikwalaho tiko ra mina ri yisiwaka eku bohiweni ri nga swi tivi; vakulukumba va rona i vandla leri khomiweke hi ndlala; vunyingi bya rona byi oma hi torha.

¹⁴Hikwalaho xivandla xa vafi xi ahlamisa khele ra xona, xi pfula nomu hi ku tlurisisa vubombi bya Yerusalema, byi ta xikela kona swin'we ni ntshungu wa yena lowu endlaka dzolonga ni lowu endlaka xikhiri xa ku tsaka.

¹⁵Lowa ku fa u ta tsongahatiwa, ni vakulukumba va ta tsan'wisiwa, mahlo ya vatikurisi ma ta langutisiwa ehansi.

¹⁶Kutani Yehovha wa tinyimpi u ta tikurisa hi ku avanyisa, kutani Xikwembu lexi kwetsimaka xi ta tidzunisa hi ku lulama.

¹⁷Tinyimpfu ti ta dya kona tanihi loko ti ri emadyelweni ya tona, kutani vamatiko va ta phanga masimu lama onhiweke ya vafuwi.

¹⁸Va ni khombo lava kokaka ku homboloka hi mapindza ya vumbabva, ni swidyoho hi tinghole leti fanaka ni ta golonyi;

¹⁹lava nge: A a hatlise, a hatlisisa ntirho wa yena hi ta wu vona! Makungu ya Mukwetsimi wa Israele a ma tshinelele ma humelela, hi ta tiva leswaku i yini!

²⁰Va ni khombo lava vulaka leswaku swo biha swi sasekile, ni swo saseka leswaku swi bihile, lava endlaka munyama ku vonakala ni ku vonakala munyama, ni lava vulaka swo bava leswaku swa nandziha, ni swo nandziha leswaku swa bava!

²¹Va ni khombo lava tiendlaka lavo tlhariha emahlweni ya vona lava titshembaka emiehleketweni ya vona!

²²Va ni khombo lava nga ni matimba eku nweni ka vhinyo ni lava nga ni matimba eku kandzeleni ka byalwa;

²³lava khanisaka lowo biha hikwalaho ka hakelo, kutani va hikelaka lava lulameke ku lulama ka vona!

²⁴Hikwalaho, tanihi malangavi ya ndzilo loko ma dya tinhlanga, ni loko ma wisa byanyi lebyi omeke, rimitsu ra vona ri ta fana ni leswi hehliweke, ni vulangi bya vona byi ta dzudzeka tanihi ntshuri, hikuva va cukumetile nawu wa Yehovha wa tinyimpi, va sandzile rito ra Mukwetsimi wa Israele.

²⁵Hikwalaho vukari bya Yehovha byi pfurhele tiko ra yena, kutani u tshambulutile voko ra yena, a ri ba; tintshava ti tsekatseka, mitsumbu ya vona yi tata mitsendzele tanihi vulongo. Hambiswiritano, a nga tlhelanga evukarini bya yena, ni voko ra yena ra ha tshama ri tshambulutiwile.

²⁶U tlakusela matiko lama nga ekule mujeko, u va bela miloti leswaku va huma emakun'wini ya misava. Vonani, kan'we va fika, va nga tikeriwi.

²⁷A ku na la karheleke, la khunguvanyekaka, ni la khudzihelaka, ni la etlelaka. Mavamba ya vona ma nga ka ma nga tshunxeki eswisutini swa vona, ni tinghole ta tintanghu ta vona ti nga ka ti nga tshunxeki.

²⁸Miseve ya vona ya kariha, mavurha ya vona ma kungiwile masondzo ya tihanci ta vona ma fana ni maribye, mavhilwa ya tigolonyi ta vona ma haha tanihi xidzedze.

²⁹Ku dzumadzuma ka vona ku fana ni ka ntswele ya nghala, va phandza tanihi nghala leyi ntshwa. Ya phandza, ya bvanyangeta, yi vutla, ku hava la yi namurhutaka!

³⁰Siku rero ku ta dzuma ehenhla ka Yuda tanihi loko ku dzuma lwandle, kambe loko ku langutiwa emisaveni ku ta voniwa munyama wa mahlomulo, ku vonakala ku ta siveriwa hi munyama!