Read tsonga Esaya 53 Bible Online

Esaya 53 - tsonga bible

Esaya 53

¹Ku pfumerile mani lexi hi nga byerisa xona, kutani voko ra Yehovha ri kombisiwe eka mani?

²U mirile emahlweni ka yena tanihi hluke, tanihi rimitsu leri humaka emisaveni leyi omeke. A a nga ri na xivumbeko ni ku saseka loku kokaka mahlo ya hina; ni nghohe ya yena a yi nga ri na nchumu wa ku hi tsakisa.

³A soriwa, a tshikiwa hi vanhu, munhu wa mahlomulo, la tivaka maxangu, la soriweke tanihi xilo lexi yilaka, kutani a hi vulanga nchumu ha yena.

⁴Kunene u rhwele mavabyi ya hina, u hi tekerile mahlomulo ya hina, kasi hina a hi ku: Wa biwa, wa xupuriwa hi Xikwembu, wa tsongahatiwa!

⁵Kambe yena, u tlhaviwile hikwalaho ka swidyoho swa hina, u tshoviwile hikwalaho ka ku homboloka ka hina, mimpfembeti leyi hi nyikaka ku rhula, yi le henhla ka yena, kutani hi tshunguriwa hi timbanga ta yena.

⁶Hinkwerhu a hi pepetseka tanihi tinyimpfu, a hi famba un'wana ni un'wana endleleni ya yena, kutani Yehovha u n'wi rhwexile ku dyoha ka hina hinkwerhu.

⁷Va n'wi xanisa, va n'wi tsongahata, a nga pfuli nomu. Kukota xinyimpfana lexi yisiwaka eku tlhaviweni, ni nyimpfu leyi miyelaka emahlweni ka lava yi tsemelaka voya a nga pfulanga nomu.

⁸U susiwile hi ku xaniseka ni ku biwa, kutani exikarhi ka vanhu va rixaka ra yena, i mani la tsundzukeke leswaku a susiwa emisaveni ya lava hanyaka, ni leswaku a biwa hikwalaho ka swidyoho swa tiko ra mina?

⁹Va n'wi vekile esirheni ra vadyohi, kambe eku feni ka yena a a ri ni mufuwi, hikuva a nga dyohanga nchumu, kutani a nga xisanga hi nomu wa yena.

¹⁰Xikwembu xi rhandzile ku n'wi tshova hi vuvabyi; loko a ta va a endlile vutomi bya yena mhamba ya swidyoho, u ta vona vatukulu, u ta lehisa masiku ya yena, kutani ntirho wa Yehovha wu ta kateka emavokweni ya yena.

¹¹Hikwalaho ka ntirho wa moya wa yena, u ta tsaka, a xurha; hi ku tiva ka yena, nandza wa mina wa ku lulama u ta khanisa vanhu vo tala, kutani yena hi xiviri xa yena u ta tirhwalela ku dyoha ka vona.

¹²Hikwalaho ndzi ta n'wi nyika ku avela ka yena swin'we ni vakulukumba; u ta avelana rifuwo ni vanhu lava fumaka, hikuva a tinyiketele rifu, kutani u hlayiwa exikarhi ka swidyohi; kambe yena, hi xiviri xa yena, u rhwele nandzu wa vanhu vo tala, u ta khongelela swidyohi.