Read tsonga Esaya 56 Bible Online

Esaya 56 - tsonga bible

Esaya 56

¹Yehovha u vurisa sweswo, a ku: “Hlayisani leswinene, mi endla leswo lulama, hikuva ku hlayiseka ka mina ku nga ka ku nga hlweri ku ta, ni ku lulama ka mina ku le kusuhi ni ku humelela.

²Ku katekile munhu loyi a endlaka sweswo, ni n'wana wa munhu la tiyiselaka ka swona, a ri karhi a hlayisa Savata hi ku ka a nga ri nyamisi, a ri karhi a tlhariha leswaku voko ra yena ri nga tshuki ri endla swo biha!”

³N'wana wa matiko la namarhelaka Yehovha, a nga tshuki a vula, a ku: “Yehovha u ta ndzi hambanyisa ni tiko ra yena!” Mutsheniwa a nga tshuki a vula, a ku: “Waswivo ndzi murhi wa ku oma!”

⁴Hikuva Yehovha u vurisa sweswo, a ku: “Eka vatsheniwa lava nga ta hlayisa Tisavata ta mina, lava nga ta hlawula leswi ndzi tsakisaka, lava nga ta tiyisela entwananweni wa mina,

⁵ndzi ta va nyika endlwini ya mina ni le rihlampfini ra mina vutshamo ni vito leri nga ta tlula ra vafana ni vanhwana; ndzi ta va nyika vito leri nga heriki leri nga hlanguriwiki.

⁶Kutani vamatiko lava nga ta namarhela Yehovha ku n'wi tirhela, ni ku rhandza vito ra Yehovha, ku va malandza ya yena, hinkwavo lava nga ta hlawula Savata hi ku ka va nga ri nyamisi, lava nga ta tiyisela entwananweni wa mina,

⁷ndzi ta va fikisa entshaveni ya mina leyo kwetsima, kutani ndzi va tsakisa endlwini leyi va ndzi khongelaka eka yona; tiholokosta ta vona, ni magandzelo ya vona swi ta amukeriwa ealitarini ya mina; hikuva yindlu ya mina yi ta vuriwa yindlu ya ku khongela eka matiko hinkwawo.”

⁸Ku vula Hosi Yehovha, la hlengeletaka Vaisraele, lava nga ya evukhumbini a ku: “Ndzi ta hlanganisa kambe van'wana eka Israele, swin'we ni lava hlengeletiweke.”

⁹N'wina hinkwenu, swiharhi swa nhova, tanani mi dya, na n'wina hinkwenu swivandzana swa xihlahla!

¹⁰Varisi va vona, va file mahlo hinkwavo, a va na mano; hinkwavo i timbyana ta timbheveve, leti tsandzekaka ku vukula, lava nga ni mihahamu eku etleleni ka vona, lava rhandzaka ku khudzehela.

¹¹O! I timbyana ta makolo, leti nga xurhiki; i varisi lava nga tiviki ku twisisa nchumu; hinkwavo va famba hi mitila ya vona, un'wana ni un'wana u lava bindzu ra yena.

¹²“Tanani, ndzi ta lava vhinyo, kutani hi ta nwa leswi nga vila swinene! Mundzuku hi ta endlisa sweswo, ni ku tlurisa!”