Read tsonga Esaya 57 Bible Online

Esaya 57 - tsonga bible

Esaya 57

¹Loyi a lulameke a fa, kambe a ku na munhu la xiyaxiyaka mhaka leyi, vanhu va vukhongeri va susiwa, kutani a ku na la twisisaka leswaku lowo lulama a susiwa emahlweni ka leswo biha.

²A a nghene hi ku rhula, a wisa evutshan'weni bya yena la nga ta va a tamerile ndlela yo lulama!

³“Kambe n'wina tshinelani halenu, vana va mungoma wa wansati, rixaka ra muoswi ni ra wa mbiri!

⁴Mi hleka mani xana? Mi ahlamisela mani nomu? Mi humesela mani tindzimi? Xana a mi vana va vudyohi, rixaka ra ku hemba,

⁵lava hisekaka emikanyini, ni le hansi ka murhi wun'wana ni wun'wana lowu hlukeke, lava tlhavaka vana emikoveni, ni le mabakweni ya tintshava?

⁶Ku averiwa ka wena ku le maribyeni yo rhideleka ya milambu, hi yona ndzhaka ya wena; hi wona lawa u ma chelelaka mabyalwa, lawa u ma humeselaka mihlengo: Xana a ndzi nga vuri nchumu ha swona-ke?

⁷U andlarile sangu ra wena entshaveni leyo leha leyi tlakukeke kambe hilaha u tlhandlukeleke kona ku humesa magandzelo.

⁸U fihlile xitsundzuxo xa wena endzhaku ka rivanti ni marimba; hikuva, leswi u avaneke na mina, u kombisile vuhava bya wena eka un'wana; u khandziyile ebyetlelweni bya wena; u byi anamisa, u tibohile na vona hi xinakulobye u rhandzile sangu ra vona loko u ri vonile.

⁹U yile ehosini ni mafurha, u andzisile mirhi ya wena ya risuna, u rhumile ekule tintsumi ta wena, u tinyamisile ku yisa exivandleni xa vafi.

¹⁰A wu karhele hi ku famba ngopfu, hambiswiritano, a u nga vuri: A swi pfuni nchumu! Wa ha kumile matimba evokweni ra wena: Hikwalaho u nga heli mbilu.

¹¹A wu tshukisiwa, a wu chavisiwa hi mani ku ndzi landzula, hi ku ka u nga ndzi tsundzukanga, u nga vulanga nchumu ha mina? Xana a ndzi miyelanga ni khale, kasi a ku ndzi chavanga.

¹²Ndzi ta vula ku lulama ka wena, kutani mitirho ya wena, a yi nga ku pfuni nchumu.

¹³Loko u ta huwelela, xana vandla ra swikwembu swa wena ri ta ku ponisa-ke? Mheho yi ta swi hundzisa hinkwaswo, moya wu ta swi susa. Kambe la ndzi tshembaka, u ta dya ndzhaka ya tiko, u ta nyikiwa ntshava ya mina leyo kwetsima.”

¹⁴Va ta ku: “Boxani, boxani, lunghisani ndlela, Susani xikhunguvanyiso xihi ni xihi endleleni ya tiko ra mina!

¹⁵Hikuva ku vuriwa sweswo hi La nge henhlahenhla, loyi xiluvelo xa yena i xa masiku, ni loyi vito ra yena ri kwetsimaka: ndzi tshama exivandleni leswi tlakukeke, eku kwetsimeni; kambe ndzi ni munhu la tisolaka, ni la titsongahataka, leswaku ndzi ta pfuxa mimoya leyi tsongahatiweke, ndzi ta pfuxa ni timbilu leti tlhaviweke.

¹⁶A ndzi rhandzi ku tengisa hi masiku, ni ku hlayisa vukari lebyi nga heriki, mimoya leyi ndzi yi endleke yi nga ti tshuka yi heleriwa hi matimba.

¹⁷Hikwalaho ka ku navela loku nga ni nandzu, ndzi karihile kutani ndzi n'wi bile, ndzi va ndzi tifihla evukarini bya mina; kutani la tiarisaka u landzile ndlela ya mbilu ya yena.

¹⁸Ndzi vonile tindlela ta yena, ndzi ta n'wi hanyisa; ndzi ta n'wi kombisa ndlela, kutani ndzi ta n'wi chavelela ni lava rilaka na yena.”

¹⁹Loyi a vekaka ku khensa emilon'wini ya vanhu, a ku: “Ku rhula, ku rhula eka loyi a nga ekule, ni ka loyi a nga ekusuhi! Ndzi ta va hanyisa.

²⁰Kambe lavo biha va fana ni lwandle leri kariheke, leri nga swi kotiki ku rhula, leri mati ya rona ma tlakusaka sava ni ndzhope;

²¹a ku na ku rhula eka lavo biha,” ku vula Xikwembu xa mina.