Read tsonga Esaya 58 Bible Online

Esaya 58 - tsonga bible

Esaya 58

¹“Huwelela hi matimba, u nga feleri rito ra wena, ri tlakuse tanihi nanga ku tivisa tiko ra mina e vudyoho bya rona, ni yindlu ya Yakobo swivi swa yona!

²Va ndzi lava hi masiku hinkwawo, va lava ku tiva tindlela ta mina; tanihi leswo nge i tiko leri fambaka hi ku lulama, leri nga tshikangiki ku lerisa ka Xikwembu xa rona, va kombela ka mina ku avanyisa ka ku lulama, va lava leswaku Xikwembu xi va tshinelela.

³‘Swa hi pfuna yini ku titsona swakudya, loko u nga swi voni? Ni ku tsongahatisa mimoya ya hina, loko u nga vuri nchumu ha swona?’ Vonani siku lero mi titsonaka swakudya, mi endla leswi mi tsakisaka, mi khoma mitirho ya N'wina hinkwayo.

⁴Vonani, mi titsona swakudya ku lwisana ni ku tengisana, ni ku banana hi swibakela swa tihanyi, a mi titsoni swakudya hilaha swi fanelaka siku lero, leswaku rito ra n'wina ri ta yingisiwa kwale henhla.

⁵Xana hi kona ku titsona swakudya loku nga ndzi tsakisaka, siku munhu a tsongahatisaka moya wa yena ha rona xana? Ku korhamisa nhloko kukotisa rihlanga, ku tilata esakeni, ni le nkumeni, xana hi swona leswi u swi vulaka ku titsona swakudya-ke, siku leri tsakisaka Yehovha xana?

⁶Ku titsona swakudya loku ndzi tsakisaka a hi kuloku xana: Ku susa tiketana ta lunya, ku tshunxa mapindza ya vukhumbi, ku tlherisa lava xanisiwaka va tshunxiwile, ni ku tshova mpingu wihi ni wihi?

⁷Xana a hi ku phamela loyi a nga ni ndlala vuswa bya wena, a hi ku amukela endlwini ya wena xisiwana lexi nga riki na ekaya xana? Ni loko u vona munhu a swerile, u n'wi funengeta-ke? Ni loko u nga hundzukeri loyi a nga nyama ya wena hi xiviri xana?

⁸“Ku vonakala ka wena ku ta ta kukota vurhonga ku hanyisiwa ka wena ku ta hatlisa ku mila ku lulama ka wena ku ta ku rhangela emahlweni; ku twala ka Yehovha ku ta ku heleketa.

⁹U ta vitana, kutani Yehovha u ta hlamula; u ta huwelela, kutani u ta ku: ‘Hi mina loyi!’ Loko u susa mpingu hi le xikarhi ka wena, loko u tshika ku sandza ni ku lumbeta,

¹⁰loko u nyika loyi a nga ni ndlala swakudya swa wena, loko u xurhisa moya lowu tsaneke, ku vonakala ka wena ku ta swa emunyameni, kutani munyama wa wena wu ta kwetsima kukota nhlekanhi.

¹¹Kutani Yehovha u ta ku fambisa hi masiku, u ta xurhisa moya wa wena exikarhi ti ka mananga lama hisaka. Kutani u ta nyika marhambu ya wena matimba u ta va tanihi ntanga lowu cheletiweke swinene, kukotisa xihlovo lexi mati ya xona ma nga phyiki.

¹²Vanhu va wena va ta tlhela va pfuxa marhumbi ya khale; u ta aka masungulo lama nga vekiwa emikarhini ya khale; kutani u ta vuriwa mupfuxi wa swipetlu, mululamisi wa tindlela ku akisa vanhu etikweni.

¹³“Loko u khoma nenge wa wena leswaku u nga tluri nawu wa Savata, hi ku ka u nga endli swa wena hi siku lero ra mina lero kwetsima, loko u vula leswaku siku ra Savata hi kona ku tsaka ka wena, ni leswaku lexi kwetsimeleke Yehovha xi fanekeriwa hi xichavo; loko u ri hlawula hi ku ka u nga fambi hi tindlela ta wena, hi ku ka u nga endli ku rhandza ka wena, u nga vuri timhaka ta swahava,

¹⁴kunene u ta titsakela eka Yehovha ndzi ta ku tlhandlukisa etintshaveni ta tiko, ndzi ta ku nyika ku dya ndzhaka ya Yakobo, tata wa wena,” hikuva nomu wa Yehovha wu vulavurile.