Read tsonga Esaya 6 Bible Online

Esaya 6 - tsonga bible

Esaya 6

¹Lembe ra ku fa ka hosi Uziya ndzi vonile Yehovha a tshamile exiluvelweni lexikulu lexi tlakukeke; kutani mahlangula ya xifunengelo xa yena a ma tata tempele.

²Kutani tiserafi a ti yimile ehenhla ka yena yin'wana ni yin'wana a yi ri ni timpapa ta ntlhanu na yin'we: ha timbirhi ti funengeta mimombo, ha timbirhi ti funengeta milenge, ha timbirhi tin'wanyana a ti haha ha tona.

³A tihuwelelana, ti ku: “Wa kwetsima, wa kwetsima, wa kwetsima, Yehovha wa tinyimpi! Misava hinkwayo yi tele hi ku kwetsima ka yena.”

⁴Masungulo ya tinyangwa ta tempele ma tsekatseka hi rito ra la huwelelaka, yindlu yi tala musi.

⁵Kutani ndzi ku: “Yo mina! Ndzi lovile! Hikuva ndzi munhu wa milomu ya thyaka, ndzi akile exikarhi ka tiko ra milomu ya thyaka, kutani mahlo ya mina ma vonile Hosi, Yehovha wa tinyimpi!”

⁶Kambe yin'wana ya tiserafi yi hahela eka mina, yi khomile kala lero vuvumela, leri yi ri okeke egandzelweni hi ritlawa.

⁷Kutani yi khumba nomu wa mina hi rona, yi ku: “Vona, kala leri, ri khumbile milomu ya wena, hikwalaho ku homboloka ka wena ku susiwile, xidyoho xa wena xi rihiwile.”

⁸Kutani ndzi twa rito ra Hosi, ri ku: “Ndzi ta rhuma mani, i mani la nga ta famba ematshan'weni ya hina?” kutani ndzi ku: “Hi mina loyi, ndzi rhume.”

⁹Kutani yi ku: “Famba u ya byela tiko leri, u ku: ‘Mi ta yingisa, kambe mi nga ka mi nga twisisi, mi ta vona, kambe mi nga ka mi nga vonisisi.’

¹⁰Nonon'hwisa timbilu ta tiko leri, u siva tindleve ta rona u dlaya mahlo ya rona, leswaku ri nga voni hi mahlo, ri nga twi hi tindleve, kutani ri nga hundzuki, leswaku ri nga horisiwi.”

¹¹Kutani ndzi ku: “Ku ta va ku fika rini, Hosi?” A ku: “Miti yi ko yi mbundzuka, yi pfumatiwa vaaki, ni tindlu ti pfumala vanhu, ni tiko ri onhaka ri va rhumbi;

¹²Yehovha a ko a yisa vanhu ekule, ni tiko ri hundzuka mananga.

¹³Kutani kungakuloko un'wana a nga sala eka va khume va vona, na yena, u ta herisiwa. Kambe tanihi mirhi ya munga ni mikuhlu, hambi yi tsemiwile, ku sala swikundzu, nsinya wa vona wu ta hluka rixaka lero kwetsima.”