Read tsonga Esaya 9 Bible Online

Esaya 9 - tsonga bible

Esaya 9

¹Kambe a ku nga ha vi na munyama emisaveni leyi ngi yi ri ni maxangu. Tanihi leswi emikarhini yo sungula, tingana ti funengeteke tiko ra Zebuloni ni tiko ra Neftali, emikarhini ya ku hetelela ku ta twarisiwa tiko leri lulamaka ni lwandle, entsungeni wa ehase ka Yordani, tiko ra Galeliya wa vamatiko.

²Tiko leri nga famba emunyameni ri vona ku vonakala lokukulu. Lava akeke etikweni ra ndzhuti wa rifu va voningiwa hi ku vonakala.

³U andzisile tiko, u kurisile ku tsaka ka rona! Ri tsakile emahlweni ka wena kukota lava tshovelaka, tanihi lava avanelaka xuma lexi phangiweke.

⁴Hikuva mpingu lowu ngi ri wu rhwala, ni nkhavi lowu ngi wu ba makatla ya rona, ni nhonga ya muxanisi wa rona, u swi tshovile kukotisa esikwini ra Midiyani.

⁵Hikuva ntanghu yin'wana ni yin'wana leyi munhu a yaka enyimpini ha yona, ni nguvu leyi pfulunganeke engatini, swi ta hoxiwa emalangavini swi hisiwa hi ndzilo.

⁶Hikuva hi velekeriwe n'wana, hi nyikiwe n'wana wa wandzisanyana, vuhosi byi vekiwile ekhatleni ra yena. U ta thyiwa Muhlamarisi, Mutsundzuxi, Xikwembu xa matimba, Tatana la nga riki na ku hela, Hosi ya ku rhula;

⁷ku kurisa ku fuma, ni ku nyika xiluvelo xa Davhida ni ku fuma ka yena ku rhula loku nga heriki, ni ku xi tiyisa, ni ku xi seketela hi ku avanyisa ni ku lulama, sweswi ni hilaha ku nga heriki; ku hiseka ka Yehovha wa tinyimpi ku ta endla sweswo!

⁸Hosi yi rhumile rito eka Yakobo, ri wela eka Israele.

⁹Tiko hinkwaro ri ta ri tiva, a nga Efrayimi ni vaaki va Samariya, lava tiarisaka ni lava tikukumuxaka etimbilwini ta vona, va ku:

¹⁰“Switina swi mbundzuxiwile, hi ta aka hi maribye lama vatliweke; mikuwa yi tsemiwile, hi ta simeka tikedari ematshan'weni ya yona.”

¹¹Yehovha u ta pfuxela tiko valala va Resini, u ta hlanganisa tinyimpi ta vona,

¹²va ri Vasiriya, tlhelo ra le vuxeni, ni Vafilista tlhelo ra vupeladyambu; va ta holongela Israele hi nomu lowu ahlameke. Hambiswiritano, vukari bya yena a byi si tlhela, ni voko ra yena ra ha tshambulutiwile.

¹³Kambe tiko a ri tlhelelanga eka loyi a ri baka, a ri lavi Yehovha wa tinyimpi.

¹⁴Hikwalaho Yehovha u ta tsema eka Israele nhloko ni ncila, nala ni rihlanga, hi siku rin'we.

¹⁵Nkulukumba ni ndhuna i nhloko kutani muprofeta la dyondzisaka mavunwa, i ncila.

¹⁶Varisi va tiko leri va ri hambukisa, lava risiwaka va ya eku loveni.

¹⁷Hikwalaho Hosi yi nga ka yi nga tsakeri timbhuri ta rona, yi nga ka yi nga tsetseleri swisiwana ni tinoni ta rona; hikuva hinkwavo i vadyohi ni vabihi, milomu hinkwayo yi vulavula swisandzu ntsena. Hambiswiritano, vukari bya yena a byi si tlhela, ni voko ra yena ra ha tshambulutiwile.

¹⁸Hikuva vudyoho byi pfurha tanihi ndzilo lowu hisaka mitwa ni swigatlu byi pfurha laha ku tlhumeke ni le swihlahleni, laha ku mbulukaka musi.

¹⁹Hi vukari bya Yehovha wa tinyimpi, misava ya hisiwa; tiko ri tshwa hi ndzilo, a ku na munhu la tsetselelaka makwavo.

²⁰Ka phangiwa hitlhelo ra xinene, kambe va fa hi ndlala; va dya hitlhelo ra ximatsi, kambe a va xurhi. Un'wana ni un'wana u ta dya nyama ya voko ra yena.

²¹Manase a dya Efrayimi na Efrayimi a dya Manase; havambirhi va wela Yuda. Hambiswiritano, vukari bya yena a byi tlhelanga, ni voko ra yena ra ha tshambulutiwile!