Read tsonga Levhitika 10 Bible Online

Levhitika 10 - tsonga bible

Levhitika 10

¹Vana va Aroni, Nadabu na Abihu, va teka un'wana ni un'wana mbita ya yena ya mirhi ya risuna, va okela ndzilo eka tona, va veka ehenhla ka wona mirhi ya risuna, kutani va humesa emahlweni ka Yehovha ndzilo wa xiri, va endla lexi va nga xi lerisiwangiki.

²Kutani ndzilo wu huma emahlweni ka Yehovha, wu va hisa, va fa emahlweni ka Yehovha.

³Muxe a ku eka Aroni: “Hi lexi Yehovha a xi leriseke, loko a ku: ‘Ndzi ta kwetsimisiwa hi lava ndzi tirhelaka, ndzi dzunisiwa emahlweni ka tiko hinkwaro.’ ” Kambe Aroni a miyela.

⁴Kutani Muxe a vitana Mixaele, na Elisafani, vana va Uziele, makwa wa tata wa Aroni, a ku eka vona: “Tshinelani, mi susa vamakwenu emahlweni ka vukwetsimelo mi va yisa ehandle ka mixaxa.”

⁵Kutani va tshinela va va phutsela etingubyini ta vona va va yisa ehandle ka mixaxa, hilaha Muxe a leriseke hakona.

⁶Muxe a ku eka Aroni na Eliyazara na Itamara, vana va Aroni: “Mi nga tshuki mi funungula tinhloko ta n'wina ni ku handzula tinguvu ta n'wina, mi nga ta fa, Yehovha a nga tshuki a karihela nhlengeletano hinkwayo. Vamakwenu, va yindlu hinkwayo ya Israele hi vona lava nga ta rila hikwalaho ka ritshwa leri hisiweke i Yehovha.

⁷Mi nga tshuki mi huma enyangweni ya tabernakela ya nhlengeletano mi nga ta fa; hikuva mafurha ya ku tola ya Yehovha ma le henhla ka n'wina.” Kutani va endla hilaha Muxe a va byeleke hakona.

⁸Yehovha a engeta a byela Aroni a ku:

⁹“Mi nga tshuki mi nwa vhinyo ni byalwa, hambi u ri wena, hambi va ri vana va wena, loko mi ta nghena etabernakeleni ya nhlengeletano, mi nga ta fa; i nawu lowu nga heriki etinxakeni hinkwato,

¹⁰leswaku mi ta tiva ku hlawula lexi kwetsimaka eka lexi nga kwetsimangiki, ni lexi nyameke eka lexi tengeke;

¹¹mi ta tiva ku dyondzisa vana va Israele milawu hinkwayo leyi Yehovha a va leriseke hi nomu wa Muxe.”

¹²Muxe a byela Aroni, na Eliyazara, na Itamara, vana va yena lava n'wi saleleke, a ku: “Tekani leswi seleke swa timhamba leti hiseriweke Yehovha, mi dya swona swi nga ri na comela, mi ri ekusuhi ni alitari, hikuva i xilo lexi kwetsimaka ngopfu.

¹³Mi swi dya evukwetsimelweni, hikuva i ku averiwa ka wena ni ka vana va wena swi huma etimhambeni leti hiseriwaka Yehovha, hikuva ndzi lerisiwile sweswo.

¹⁴Loko xi ri xifuva lexi ndziwitiweke, ni voko leri pamburiweke, u ta swi dya exivandleni lexi tengeke, wena ni vana va wena va xinuna ni va xisati, hikuva mi nyikiwile swona; i ku averiwa ka wena ni ka vana va wena, swi huma etimhambeni ta ku khensa ta vana va Israele.

¹⁵Va ta tisa ni mafurha lama fanelaka ku hisiwa hi ndzilo, ni voko leri pamburiweke, ni xifuva lexi ndziwitiweke va swi tlakusa emahlweni ka Yehovha kutani swi ta va swa wena ni swa vana va wena; i nawu lowu nga heriki, hilaha Yehovha a leriseke hakona.”

¹⁶Muxe a vutisa leswi va swi endleke hi xiphongo xa gandzelo ra nandzu; kutani maswivo a xi hisiwile. Kavaloko a karihela Eliyazara na Itamara vana lava saleleke Aroni, a ku eka vona:

¹⁷“A mi dyanga ha yini gandzelo ra nandzu evukwetsimelweni? Hikuva i xilo lexi kwetsimaka ngopfu; mi nyikiwile xona leswaku mi rhwala nandzu wa nhlengeletano mi va phahlela mhamba emahlweni ka Yehovha.

¹⁸“Maswivo, kuteloko ngati ya xifuwo xa gandzelo yi nga yisiwanga evukwetsimelweni, a mi fanela ku xi dya evukwetsimelweni, hilaha ndzi leriseke hakona.”

¹⁹Kutani Aroni a ku eka Muxe: “Waswivo, namuntlha va humesile gandzelo ra nandzu wa vona, ni holokosta ya vona emahlweni ka Yehovha; kutani leswi ndzi humeleriweke hi mhaka leyi namuntlha, ndzi nga dyisa ku yini gandzelo ra nandzu, xana yi ta va mhaka leyinene emahlweni ka Yehovha, xana?”

²⁰Muxe, kuteloko a twile marito lawa, a khensa.