Read tsonga Levhitika 12 Bible Online

Levhitika 12 - tsonga bible

Levhitika 12

¹Yehovha a byela Muxe, a ku:

²“Byela vana va Israele, u ku: ‘Kutakuloko wansati a velekile n'wana wa wanuna a ta va la nga tengangiki hi masiku ya ntlhanu na mambirhi; u ta yila kukotisa emasikwini ya tin'hweti ta yena.

³Siku ra ntlhanu na manharhu va ta yimbisa n'wana,

⁴kutani hi masiku ya makume manharhu, wansati u ta tshama ekaya hikwalaho ka ngati ya yena, a ri karhi a hlamba; a nga tshuki a khumba xilo lexi kwetsimeke, a nga ka a nga yi evukwetsimelweni ku ko ku hela masiku ya ku tibasisa ka yena.

⁵Loko a velekile wanhwanyana u ta va la nga tengangiki hi mavhiki mambirhi, kukotisa emasikwini ya tin'hweti ta yena, kutani u ta tshama ekaya hi masiku ya 66, hikwalaho ka ngati ya yena, a ri karhi a hlamba.

⁶“ ‘Kutakuloko masiku ya ku hlamba ka yena ma herile, hambi ma ri ya n'wana wa wanuna, kumbe ya wanhwanyana, u ta tisa eka muprista, enyangweni ya tabernakela ya nhlengeletano, xinyimpfana xa lembe rin'we, xi ri xa gandzelo leri hisiwaka, ni vondlo, kumbe tuva, ku endla gandzelo ra nandzu ha swona.

⁷Muprista u ta swi humesa emahlweni ka Yehovha, a n'wi phahlela mhamba, kutani u ta basisiwa hikwalaho ka ngati ya yena. Hi wona nawu wa lava velekeke, hambi n'wana wa wanuna, hambi wanhwanyana.

⁸Kambe kutakuloko a nga swi koti ku humesa xinyimpfana, u ta teka matuva mambirhi, kumbe mavondlo mambirhi ya swigugurwana, yin'wana ya gandzelo leri hisiwaka, yin'wana ya gandzelo ra nandzu. Muprista u ta n'wi phahlela mhamba, kutani u ta va a basile.’ ”