Read tsonga Levhitika 15 Bible Online

Levhitika 15 - tsonga bible

Levhitika 15

¹Yehovha a byela Muxe na Aroni, a ku:

²“Byelani vana va Israele, mi ku eka vona: ‘Wanuna un'wana ni un'wana la nga ni ndzundzwana, u yirile ha wona.

³Hi wona nawu lowu vekeriweke lava nga ni ndzundzwana; loko wu hume emirini wa vona, ni loko wu sivekile va yirile.

⁴Swilawu hinkwaswo leswi loyi a nga ni ndzundzwana a etleleke eka swona, swi yirile, ni swilo hinkwaswo leswi a tshamiseke eka swona, swi yirile.

⁵La khumbeke xilawu xa yena, u ta hlantswa tinguvu ta yena a hlamba ematini, kambe u ta va la yilaka ku fika nimadyambu.

⁶La tshamisaka ehenhla ka nchumu lowu munhu, a nga ni ndzundzwana a tshamiseke eka wona, u ta hlantswa tinguvu ta yena, a hlamba ematini kambe u ta va la yilaka ku fika nimadyambu.

⁷La khumbeke miri wa muvabyi loyi, u ta hlantswa tinguvu ta yena a hlamba ematini kambe u ta va la yilaka ku fika nimadyambu.

⁸Kutakuloko muvabyi loyi a tshwutela marhi ehenhla ka loyi a tengeke, munhu loyi u ta hlantswa tinguvu ta yena, a hlamba ematini kambe u ta va la yilaka ku fika nimadyambu.

⁹Xihlalu xin'wana ni xin'wana lexi khandziyiweke hi munhu la nga ni ndzundzwana, xi ta va lexi yilaka.

¹⁰Mani na mani la khumbeke xilo xihi ni xihi lexi ngi xi ri ehansi ka yena, u ta va la yilaka ku fika nimadyambu kutani mani na mani la rhwaleke xona u ta hlantswa tinguvu ta yena, a hlamba ematini, kambe u ta va la yilaka ku fika nimadyambu.

¹¹La khumbiweke hi muvabyi loyi, kambe a nga hlambanga, u ta hlantswa tinguvu ta yena, a hlamba ematini, kambe u ta va la yilaka ku fika nimadyambu.

¹²Loko yi ri mbita ya vumba leyi khumbiweke hi la nga ni ndzundzwana, yi ta fayiwa, loko wu ri ndyelo yi ta hlantswiwa ematini.

¹³“ ‘Kutakuloko a horile, u ta hlaya masiku ya ntlhanu na mambirhi ya ku tibasisa; kutani u ta hlantswa tinguvu, a hlamba ematini lama kulukaka, kutani u ta va la tengeke.

¹⁴Hi siku ra ntlhanu na manharhu u ta tilavela matuva mambirhi, kumbe mavondlo mambirhi ya matuva, a ya tikombisa emahlweni ka Yehovha enyangweni ya tabernakela ya nhlengeletano, a ya nyika muprista.

¹⁵Muprista u ta ma humesa, rin'wana ri va gandzelo ra xidyoho, rin'wana yi va holokosta; kutani muprista u ta n'wi phahlela mhamba emahlweni ka Yehovha hikwalaho ka ndzundzwana wa yena.

¹⁶“ ‘Kungakuloko eka wanuna ku hume mbewu ya ku veleka, u ta hlamba miri hinkwawo ematini, kambe u ta va la yilaka ku fika nimadyambu.

¹⁷Tinguvu hinkwato ni madzovo hinkwawo leswi nga nyamisiwa, swi ta hlantswiwa ematini kambe swi ta va leswi yilaka ku fika nimadyambu.

¹⁸Loko a ri nsati la etleleke ni nuna loyi, u ta yila na yena, un'wana ni un'wana u ta hlamba ematini, kambe va ta va lava yilaka ku fika nimadyambu.

¹⁹“ ‘Kungakuloko wansati un'wana a ri ni tin'hweti ta yena, hileswaku ngati yi huma eka yena, u ta tshama eku nyameni ka yena hi masiku ya ntlhanu na mambirhi; un'wana ni un'wana la nga ta n'wi khumba, u ta va la yilaka ku fika nimadyambu.

²⁰Xilawu xin'wana ni xin'wana lexi a etleleke eka xona loko a ri ethyakeni ra yena, xi ta va lexi yilaka, ni swilo hinkwaswo leswi a tshamiseke eka swona, swi ta va leswi yilaka.

²¹Mani na mani la khumbaka xilawu xa yena, u ta hlantswa tinguvu ta yena a hlamba ematini, kambe u ta va la yilaka ku fika nimadyambu.

²²Un'wana ni un'wana la khumbaka nchumu wihi ni wihi lowo a tshamiseke eka wona, u ta hlantswa tinguvu ta yena, a hlamba ematini, kambe u ta va la yilaka ku fika nimadyambu.

²³Kungakuloko xivati xi ri kona exilawini, kumbe exitshan'weni laha a tshameke kona, kutani loku munhu a swi khumbile, u ta va la yilaka ku fika ri madyambu.

²⁴Kungakuloko wanuna a etlele na yena, ni loko masangu ya yena ma n'wi namarhela u ta va la yilaka hi masiku ya ntlhanu na mambirhi, kutani swilawu hinkwaswo leswi a etleleke eka swona, swi ta va leswi yilaka.

²⁵“ ‘Kungakuloko wansati a ri ni xitlhandla, loko ku nga ri hi nkarhi wa tin'hweti ta yena, kumbe loko masangu ya yena ma tlurisa nkarhi wa ku teka ka yena, u ta va la yilaka hi nkarhi hinkwawo wa xitlhandla xa yena, kukotisa enkarhini wa ku teka ka yena.

²⁶Swilawu hinkwaswo leswi a etleleke ka swona enkarhini wa xitlhandla xa yena, swi ta yirisiwa kukota swilawu swa ku teka ka yena; kutani switshamo hinkwaswo leswi a tshamiseke eka swona swi ta va leswi yilaka kukotisa enkarhini wa ku teka ka yena.

²⁷Mani na mani la khumbaka swona u ta va la yilaka; u ta hlantswa tinguvu ta yena, a hlamba ematini kambe u ta va la yilaka ku fika nimadyambu.

²⁸Kuteloko xitlhandla xa yena xi khawukile, u ta hlaya masiku ya ntlhanu na mambirhi, kutani u ta va a tengile.

²⁹Hi siku ra ntlhanu na manharhu, u ta teka matuva mambirhi, kumbe mavondlo mambirhi ya magugurhwana, a ma tisa eka muprista enyangweni ya tabernakela ya nhlengeletano.

³⁰Muprista u ta humesa rin'wana ri va gandzelo ra xidyoho, rin'wana ri va holokosta: kutani muprista u ta phahla mhamba emahlweni ka Yehovha hikwalaho ka xitlhandla lexi n'wi yiriseke.

³¹“ ‘Mi ta susa sweswo ku yila ka vana va Israele va nga tshuki va fa hikwalaho ka thyaka ra vona, loko va nyamisa yindlu ya mina leyi nga exikarhi ka vona.’ ”

³²Hi wona nawu lowu vekeriweke la nga ni xitlhandla; hambi loyi a nga ni ku teka ka yena, hambi loyi a nga ni masangu ya yena,

³³ni munhu un'wana ni un'wana la nga ni ndzundzwana, hambi a ri wanuna, hambi a ri wansati, ni wanuna la etleleke ni wansati la yilaka.