Read tsonga Levhitika 2 Bible Online

Levhitika 2 - tsonga bible

Levhitika 2

¹“ ‘Loko munhu a humesela Yehovha nhlengo wa nyiko, nhlengo wa yena wu ta va wa mapa layo saseka; u ta chela mafurha ni mirhi ya risuna ehenhla ka wona.

²U ta swi yisa eka vaprista, vana va Aroni; kutani va ta teka xandla xa mapa layo saseka, lama cheriweke mafurha, ni mirhi ya risuna hinkwayo; kutani muprista u ta swi hisa ealitarini kukotisa xitsundzuxo, yi va mhamba leyi hisiwaka leyi nga ni risuna eka Yehovha.

³Leswi seleke swa nyiko, i swa Aroni ni vana va yena: i xilo lexi hlawuriweke ngopfu exikarhi ka timhamba leti hiseriwaka Yehovha.

⁴“ ‘Loko u humesa nhlengo wa leswi swekiwaka exitikweni, u ta teka mapa layo saseka, u ma pfuva hi mafurha, u endla swimbundzu leswi nga riki na comela, ni swimbhundzwana leswi nga riki na comela, leswi totiweke hi mafurha.

⁵Loko nhlengo wa wena wu ri wa leswi katingiwaka exirhengeleni; ma ta va mapa layo saseka lama pfuviweke hi mafurha, lama nga riki na comela.

⁶U ta swi fayetela, u swi cheleta hi mafurha: i nyiko.

⁷Loko nhlengo wa wena wu ri wa leswi swekiwaka embiteni, wu ta va wa mapa layo saseka, lama swekiweke hi mafurha.

⁸U ta tisela Yehovha nyiko leyi nga ta lunghisiwa hi swilo leswi, yi ta nyikiwa muprista, yena u ta yi tisa ealitarini.

⁹Muprista u ta pambula eka nyiko xitsundzuxo xa yona, u ta xi hisa ealitarini, yi va mhamba leyi hisiwaka leyi nga ni risuna eka Yehovha.

¹⁰Leswi seleke swa nyiko, i swa Aroni ni vana va yena; i xilo lexi kwetsimaka ngopfu exikarhi ka timhamba leti hiseriwaka Yehovha.

¹¹“ ‘Nhlengo wun'wana ni wun'wana lowu mi wu humeselaka Yehovha, wu nga tshuki wu va wa swinkwa leswi nga ni comela, hikuva mi nga tshuki mi hisela Yehovha comela ni vulombe egandzelweni.

¹²Mi ta swi tisela Yehovha kun'we ni nhlengo wa swirhangana, kambe swi nga ka swi nga vekiwi ealitarini, kukotisa nhlengo lowu nga ni risuna.

¹³U ta lunga hi munyu mihlengo hinkwayo ya wena; munyu wa ntwanano wa Xikwembu xa wena wu nga tshuki wu pfumaleka enhlengweni wa wena: u ta lunga hi munyu mihlengo hinkwayo ya wena.

¹⁴“ ‘Loko u humesela Yehovha nhlengo wa swirhangana swa mihandzu, u ta humesa min'oko leyintshwa leyi oxiweke endzilweni, yi ri min'oko leyinene leyi khumuriweke.

¹⁵U ta yi cheleta hi mafurha, u veka ni mirhi ya risuna ehenhla ka yona: hi wona nhlengo.

¹⁶Muprista u ta pambula tindzhoho leti khumuriweke, ni mafurha, ni mirhi hinkwayo ya risuna, a swi hisa xi va xitsundzuxo; i mhamba leyi hiseriwaka Yehovha.