Read tsonga Levhitika 23 Bible Online

Levhitika 23 - tsonga bible

Levhitika 23

¹Yehovha a byela Muxe, a ku:

²“Byela vana va Israele, u ku eka vona: ‘Hi yona mikhuvo ya Yehovha leyi mi nga ta yi lerisa leswaku ti va tinhlengeletano leti hlawuriweke. Hi yona mikhuvo ya mina.

³“ ‘Ku ta tirhiwa hi masiku ya ntlhanu na rin'we; kambe siku ra ntlhanu na mambirhi, i Savata, siku ra ku wisa leri nga ni nhlengeletano leyi hlawuriweke; mi nga tshuki mi tirha ntirho ni wun'we; i ku wisa loku hlawuleriweke Yehovha emitini hinkwayo ya n'wina.

⁴“ ‘Hi leyi mikhuvo ya Yehovha, hileswaku tinhlengeletano leto kwetsima leti mi nga ta ti lerisa emikarhini ya tona:

⁵“ ‘En'hwetini yo sungula, hi siku ra khume na mune, nimadyambu, i Paseka ya Yehovha;

⁶kutani siku ra khume na ntlhanu ra n'hweti, i nkhuvo wa swinkwa leswi kalaka comela lowu endleriwaka Yehovha; mi ta dya swinkwa leswi kalaka comela hi masiku ya ntlhanu na mambirhi.

⁷Hi siku ro rhanga, mi ta va ni nhlengeletano leyo kwetsima; mi nga tshuki mi tirha ntirho ni wun'we lowo tika.

⁸Hi masiku ya ntlhanu na mambirhi mi ta humesela Yehovha magandzelo lama hisiwaka hi ndzilo. Hi siku ra ntlhanu na mambirhi, nhlengeletano leyo kwetsima yi ta va kona kambe mi nga tshuki mi endla ntirho ni wun'we lowo tika.’ ”

⁹Yehovha a byela Muxe, a ku:

¹⁰“Byela vana va Israele, u ku eka vona: ‘Kutakuloko mi nghenile etikweni leri ndzi mi nyikaka rona, loko mi va mi tshovela, mi ta tisa eka muprista nyandza leyo rhanga ya ku tshovela ka n'wina.

¹¹U ta ndziwita nyandza leyi emahlweni ka Yehovha, leswaku mi amukeriwa ha yona; muprista u ta yi ndziwita siku leri tlhandlamaka Savata.

¹²Siku mi nga ta ndziwita nyandza, mi ta humesa xinyimpfana lexi nga riki na xivati, xa lembe rin'we, yi va holokosta eka Yehovha.

¹³Mi ta yi engetela hi nhlengo wa mipimo mimbirhi ya vukhume bya efa ya mapa layo saseka lama pfuviweke hi mafurha; swi ta humesiwa yi ri mhamba leyi hisiwaka leyi nga ni risuna eka Yehovha; mi ta chela ku avanyisa ka vumune bya hino ya vhinyo.

¹⁴Mi nga tshuki mi dya vuswa, hambi ti ri tindzhoho leti oxiweke, kumbe leti siriweke, ku ko ku fika siku rolero mi tisaka nhlengo wa Xikwembu xa n'wina; i ku lerisa loku nga heriki etinxakeni ta n'wina ematikweni hinkwawo laha mi nga ta aka kona.

¹⁵“ ‘Ku suka siku leri tlhandlamaka Savata, siku leri mi nga ta tisa ha rona nyandza yo ndziwita, mi ta hlaya mavhiki lama hetisekeke ya ntlhanu na mambirhi.

¹⁶Mi hlaya masiku ya ntlhanu wa makume ku fika siku leri tlhandlamaka Savata ra ntlhanu na mambirhi, kutani mi ta humesela Yehovha nhlengo lowuntshwa.

¹⁷Mi ta tisa swinkwa swimbirhi swa nhlengo lowu ndziwitiweke, swi ri leswi humaka etindlwini ta n'wina, swi va swa mipimo mimbirhi ya vukhume bya efa ya mapa yo saseka lama swekiweke hi comela; hi swona swirhangana swa Yehovha.

¹⁸Swin'we ni swinkwa, mi ta humesa swinyimpfana swa ntlhanu na swimbirhi swa lembe rin'we, leswi nga riki na xivati, ni xinkuzana, ni makhuna mambirhi, yi va holokosta eka Yehovha, ni mihlengo ya swona, ni vhinyo ya swona; yi va mhamba leyi hisiwaka, leyi nga ni risuna eka Yehovha.

¹⁹Mi ta humesa ni xiphongo, ri va gandzelo ra xidyoho, ni swinyimpfana swimbirhi swa lembe rin'we, ri va gandzelo ra ku khensa.

²⁰Muprista u ta swi ndziwita ni swinkwa swa swirhangana, wu va nhlengo lowu ndziwitiwaka emahlweni ka Yehovha; swi ta hlawuleriwa Yehovha swin'we ni swinyimpfana swimbirhi, kutani swi ta va swa muprista.

²¹Hi siku rolero mi ta tivisa nkhuvo, kutani mi ta va ni nhlengeletano leyi hlawuriweke; mi nga tshuki mi tirha ntirho ni wun'we lowo tika. I ku lerisa loku nga heriki ka vatukulu va n'wina, ematikweni hinkwawo lawa mi nga ta aka eka wona.

²²“ ‘Kutakuloko mi tshovela etikweni ra n'wina, u nga tshuki u fika endzilakaneni wa nsimu; kambe u nga rholeli leswi seleke. U swi tshikela xisiwana ni muluveri. Hi mina Yehovha Xikwembu xa n'wina.’ ”

²³Yehovha a byela Muxe, a ku:

²⁴“Byela vana va Israele, u ku eka vona: ‘Hi n'hweti ya ntlhanu na timbirhi, siku ro rhanga ra n'hweti, ri ta va siku ro wisa leri tivisiwaka hi mpfumawulo wa tinanga, ni nhlengeletano leyi hlawuriweke.

²⁵Mi nga ka mi nga tirhi ntirho ni wun'we lowo tika, kambe mi ta humesela Yehovha magandzelo lama hisiwaka.’ ”

²⁶Yehovha a byela Muxe, a ku:

²⁷“Hi siku ra khume ra n'hweti leyi ya ntlhanu na timbirhi, ri ta va siku ra magandzelo ya ku riha; mi ta va ni nhlengeletano leyi hlawuriweke mi titsongahata emimoyeni ya n'wina kutani mi humesela Yehovha magandzelo lama hisiwaka.

²⁸Mi nga tshuki mi tirha ntirho ni wun'we hi siku lero, hikuva i siku ra magandzelo ya ku riha, leri ku riha ka n'wina ku humesiwaka ha rona emahlweni ka Yehovha, Xikwembu xa n'wina.

²⁹Munhu un'wana ni un'wana la nga titsongahatiki esikwini leri, u ta susiwa etikweni ra yena.

³⁰Mani na mani la tirhaka hi siku leri ntirho, hambi wu ri wihi ni wihi, ndzi ta n'wi lovisa etikweni ra yena.

³¹Mi nga tshuki mi tirha ntirho ni wun'we. I nawu lowu nga heriki wa vatukulu va n'wina ematikweni hinkwawo laha mi nga ta aka kona.

³²Ri ta va Savata eka n'wina ni siku ra ku wisa, mi ta titsongahata emimoyeni ya n'wina; ku suka nimadyambu ya siku ra ntlhanu na mune, ku fika nimadyambu ya siku leri tlhandlamaka, mi ta hlayisa Savata ra n'wina.”

³³Yehovha a byela Muxe, a ku:

³⁴“Byela vana va Israele, u ku eka vona: ‘Hi siku ra khume na ntlhanu ra n'hweti leyi ya ntlhanu na timbirhi, ku ta va nkhuvo wa mitsonga lowu endleriwaka Yehovha hi masiku ya ntlhanu na mambirhi.

³⁵Hi siku ro sungula, nhlengeletano leyi hlawuriweke yi ta va kona; mi nga tshuki mi tirha ntirho ni wun'we lowo tika. Hi masiku ya ntlhanu na mambirhi, mi ta humesela Yehovha magandzelo lama hisiwaka.

³⁶“ ‘Hi siku ra ntlhanu na manharhu, mi ta va ni nhlengeletano leyi hlawuriweke, kutani mi ta humesela Yehovha magandzelo lama hisiwaka: i nkhuvo wa makumu, mi nga tshuki mi tirha ntirho ni wun'we lowo tika.

³⁷“ ‘Hi yona mikhuvo ya Yehovha, ti nga tinhlengeletano leti hlawuriweke, mi ta ti tivisa leswaku ku humeseriwa Yehovha magandzelo lama hisiwaka, ti nga tiholokosta, ni mihlengo, ni timhamba, ni vhinyo; xilo xin'wana ni xin'wana xi ta humesiwa hi siku ra xona.

³⁸Ehenhla ka swona, mi ta hlayisa Tisavata ta Yehovha, kutani mi ta tshama mi tisela Yehovha mihlengo ya n'wina, ni magandzelo hinkwawo ya ku tiyisa marito, ni tinyiko hinkwato ta ku tirhandzela ka n'wina.

³⁹“ ‘Hi siku ra khume na ntlhanu ra n'hweti ya ntlhanu na timbirhi, kutakuloko mi tshoverile mihandzu ya misava, mi ta endla nkhuvo wa Yehovha hi masiku ya ntlhanu na mambirhi. Siku ro rhanga ri va siku ro wisa, ni siku ra ntlhanu na manharhu, i siku ro wisa na rona.

⁴⁰Hi siku ro rhanga mi ta teka mihandzu yo saseka ya mirhi ni marhavi ya mirhi ya micindzu, ni marhavi ya mirhi ya swihlahla, ni ya mirhi ya milambu, mi va mi titsakela emahlweni ka Yehovha, Xikwembu xa n'wina hi masiku ya ntlhanu na mambirhi.

⁴¹Lembe rin'wana ni rin'wana mi ta endlela Yehovha nkhuvo lowo hi masiku ya ntlhanu na mambirhi. I ku lerisa loku nga heriki ka vatukulu va n'wina. Mi ta endla nkhuvo hi n'hweti ya ntlhanu na timbirhi.

⁴²Hi masiku ya ntlhanu na mambirhi, mi ta tshama emitsongeni; hinkwavo lava tswariweke eIsraeleni va ta tshama emitsongeni;

⁴³vatukulu va n'wina va ta tiva leswaku ndzi akisile vana va Israele emitsongeni loko ndzi va humesa etikweni ra Egipta: hi mina Yehovha, Xikwembu xa n'wina.’ ”

⁴⁴Kutani Muxe a tivisa vana va Israele mikhuvo ya Yehovha.