Read tsonga Levhitika 8 Bible Online

Levhitika 8 - tsonga bible

Levhitika 8

¹Yehovha a lerisa Muxe, a ku:

²“Teka Aroni ni vana va yena, ni tinguvu, ni mafurha yo tola, ni nkunzi ya gandzelo ra nandzu, ni makhuna mambirhi, ni xirhundzu xa swinkwa leswi nga riki na comela,

³kutani u vitana nhlengeletano hinkwayo enyangweni ya tabernakela ya nhlengeletano.”

⁴Muxe a endla hilaha Yehovha a n'wi leriseke hakona, nhlengeletano yi hlengeletana enyangweni ya tabernakela ya nhlengeletano.

⁵Kavaloko Muxe a ku eka nhlengeletano: “Lexi Yehovha a xi leriseke ku xi endla, hi lexi.”

⁶Kavaloko Muxe a tshineta Aroni ni vana va yena, a va hlantswa hi mati.

⁷Kutani a ambexa Aroni hembe, a n'wi boha hi vamba, a n'wi ambexa ni rhoko, kutani a veka efodi ehenhla ka yena, a yi tiyisa hi ngoti ya yona.

⁸A n'wi ambexa ni nguvu ya xifuva, a veka eka yona Urimi na Thumimi.

⁹A n'wi vehela xihuku enhlokweni, ni le mahlweni ka xihuku, a bohela xiphepherhele xa nsuku, wu nga musingasoro lowo kwetsima, hilaha Yehovha a leriseke Muxe hakona.

¹⁰Kutani Muxe a teka mafurha ya ku tola, a tota Yindlu ni swilo hinkwaswo leswi nga ka yona, a swi hlawula.

¹¹A xuva ha yona kantlhanu na kambirhi ealitarini, kutani a tota alitari ni swibya hinkwaswo swa yona, ni xihlambelo ni xikhato xa rona leswaku swi hlawuriwa.

¹²A chela mafurha ya ku tola enhlokweni ya Aroni ku n'wi hlawula.

¹³Kutani Muxe a vitana vana va Aroni, a va ambexa tinguvu, a va tsimba hi mavamba, a va bohelela swihuku, hilaha Yehovha a leriseke Muxe hakona.

¹⁴A tshineta nkunzi ya gandzelo ra nandzu, Aroni ni vana va yena va tlhandleka mavoko enhlokweni ya nkunzi ya gandzelo ra nandzu.

¹⁵Muxe a yi tlhava, a teka ngati ya yona kuteloko a petile ritiho ra yena engatini, a tota timhondzo ta alitari hinkwako; a tengisa alitari; kutani a chela ngati ehansi ka alitari, a yi hlawula leswaku ku ta phahliwa timhamba ehenhla ka yona.

¹⁶Muxe a teka mafurha hinkwawo ya mpambana, ni mpambana wa xivindzi, ni tinswo timbirhi, ni mafurha ya tona, a swi hisa ealitarini.

¹⁷Loko yi ri nkunzi, ni dzovo ra yona, ni nyama ya yona, ni swanyi wa yona, a swi hisa ehandle ka mixaxa, hilaha Yehovha a leriseke Muxe hakona.

¹⁸Kavaloko a tshineta khuna ra holokosta; kutani Aroni ni vana va yena va tlhandleka mavoko enhlokweni ya khuna.

¹⁹Va yi tlhava, kutani Muxe a chela ngati ealitarini, hi matlhelo hinkwawo.

²⁰Va hahula khuna hi swirho swa rona, kutani Muxe a hisa nhloko, ni swirho, ni mafurha.

²¹Va hlantswa marhumbu ni masondzo ematini, kutani Muxe a hisa khuna hinkwaro ealitarini; a yi ri holokosta ya ku nun'hwela ku saseka; a ri ri gandzelo leri hiseriwaka Yehovha, hilaha Yehovha a leriseke Muxe ha kona.

²²A tshineta ni khuna ra vumbirhi khuna ra ku veka muprista, kutani Aroni ni vana va yena va tlhandleka mavoko enhlokweni ya khuna.

²³Va ri tlhava, kutani Muxe a teka ngati yin'wana ya rona, a tota ha yona ripewapewani ra ndleve ya xinene ya Aroni, ni le khudzwini ra voko ra xinene ra yena, ni le khudzwini ra nenge wa xinene wa yena.

²⁴A vitana vana va Aroni, kutani Muxe a tota hi ngati timpewapewani ta tindleve ta xinene ta vona, ni le tikhudzwini ta mavoko ya xinene ya vona, ni le tikhudzwini ta milenge ya xinene ya vona, kutani Muxe a xuva hi ngati matlhelo hinkwawo ya alitari.

²⁵A teka mafurha ni ncila, ni mafurha hinkwawo ya mpambana, ni mpambana wa xivindzi, ni tinswo letimbirhi ni mafurha ya tona, ni voko ra xinene.

²⁶A engeta a teka ni ximbundzu lexi nga riki na comela, ni ximbundzu lexi pfuviweke hi mafurha, ni xinkwa xa ximphampha exirhundzwini xa swimbundzu leswi nga emahlweni ka Yehovha; a swi veka ehenhla ka mafurha ni le henhla ka voko ra xinene;

²⁷kutani a veka swilo leswi hinkwaswo eswandleni swa Aroni, ni le swandleni swa vana va yena, kutani a swi ndziwita emahlweni ka Yehovha.

²⁸Kutani Muxe a swi teka emavokweni ya vona, a swi hisa ealitarini, ehenhla ka holokosta. A ri ri gandzelo ra ku veka leri nga ni risuna; a yi ri mhamba leyi hiseriwaka Yehovha.

²⁹Kutani Muxe a teka xifuva xa khuna ra ku veka, a xi ndziwita kukotisa nhlengo lowu humesiweke emahlweni ka Yehovha; ku va ku averiwa ka Muxe hilaha Yehovha a leriseke Muxe hakona.

³⁰Kutani Muxe a teka mafurha yo tola, ni ngati leyi nga ealitarini, a xuva ha swona Aroni ni vana va yena swin'we ni tinguvu ta vona; a hlawula sweswo Aroni, ni vana va yena, ni tinguvu ta vona.

³¹Muxe a byela Aroni ni vana va yena, a ku: “Swekani nyama enyangweni ya tabernakela ya nhlengeletano, mi yi dyela kona ni swinkwa leswi nga exirhundzwini xa gandzelo ra ku veka hilaha ndzi leriseke hakona, ndzi ku Aroni ni vana va yena va ta dya swona.

³²Leswi nga ta sala swa nyama ni swa swinkwa, mi ta swi hisa endzilweni.

³³Hi masiku ya ntlhanu na mambirhi, mi nga tshuki mi huma enyangweni ya tabernakela ya nhlengeletano, ku ko ku hela masiku ya ku vekiwa ka n'wina; hikuva ku vekiwa ka n'wina ku ta endliwa hi masiku ya ntlhanu na mambirhi.

³⁴Leswi endliweke namuntlha, Yehovha u swi lerisile leswaku mi phahleriwa mhamba.

³⁵Mi ta tshama masiku ya ntlhanu na mambirhi enyangweni ya tabernakela ya nhlengeletano, nhlekanhi ni vusiku, mi endla leswi Yehovha a mi leriseke swona, mi nga ti fa; hikuva ku lerisiwile sweswo.”

³⁶Aroni ni vana va yena va endla sweswo hinkwaswo leswi Yehovha a swi leriseke ha Muxe.