Read tsonga Yeremiya 1 Bible Online

Yeremiya 1 - tsonga bible

Yeremiya 1

¹Marito ya Yeremiya, n'wana Hilkiya, un'wana wa vaprista va Anatoto, etikweni ra Benjamini.

²Rito ra Yehovha ri humelele eka yena emikarhini ya Yosiya, n'wana Amoni, hosi ya Yuda, hi lembe ra khume na manharhu ra ku fuma ka yena;

³ri va kona ni le mikarhini ya Yoyakimi, n'wana Yosiya, hosi ya Yuda, ku yisa eku heteleleni ka lembe ra khume na rin'we ra ku fuma ka Sedekiyasi, n'wana Yosiya, hosi ya Yuda, enkarhini lowu va Yerusalema va yisiwaka evukhumbini, hi n'hweti ya vuntlhanu.

⁴Rito ra Yehovha ri humelele eka mina, ri ku:

⁵“Ndzi ku tivile ndzi nga si ku vumba ekhwirini ra mana wa wena, kambe u nga si huma enyimbeni, ndzi ku hlawurile, kutani ndzi ku vekile muprofeta wa matiko.”

⁶Ku va laha ndzi nge: “Oho! Hosi Yehovha! Vona, a ndzi tivi ku vulavula, hikuva ndza ha ri xihlangi.”

⁷Yehovha a ku eka mina: “U nga tshuki u ku: ‘Ndzi xihlangi!’ Hikuva u ta famba eka hinkwavo lava ndzi nga ta ku rhuma eka vona, kambe u vulavula hinkwaswo leswi ndzi nga ta ku lerisa swona.

⁸U nga chavi, hikuva ndzi na wena ku ku lwela,” ku vula Yehovha.

⁹Ku va laha Yehovha a tshambulutaka voko ra yena, kutani a khumba nomu wa mina, a ku eka mina: “Vona, ndzi veka marito ya mina enon'wini wa wena.

¹⁰Languta, hi siku leri, ndza ku lerisa eka matiko ni vuhosi, ku tsuvula ni ku hlanhla, ni ku onha ni ku herisa, ni ku aka ni ku simeka.”

¹¹Kambe rito ra Yehovha ri ta eka mina, ri ku: “U vona yini, Yeremiya?” Ndzi ku: “Ndzi vona rhavi ra murhi wa alimondi.”

¹²Yehovha a ku eka mina: “U vonisisile, hikuva ndzi hitekele rito ra mina leswaku ri endleka.”

¹³Rito ra Yehovha ri ta eka mina ra vumbirhi, ri ku: “U vona yini?” Ndzi ku: “Ndzi vona mbita leyi vilaka, kambe nomu wa yona wu le tlhelo ra n'walungu.”

¹⁴Yehovha a ku eka mina: “Khombo leri taka ehenhla ka vaaki hinkwavo va misava ri ta huma etlhelo ra n'walungu.

¹⁵Kambe vonani, ndzi ta rhamba matiko hinkwawo ya ku fuma ka le n'walungwini,” ku vula Yehovha, “leswaku rin'wana ni rin'wana ri ta veka xiluvelo xa rona emitsendzeleni ya tinyangwa ta Yerusalema, ni le mahlweni ka marhangu hinkwawo ya kona, hi ku rhendzela, ni le mahlweni ka miti hinkwayo ya Yuda.

¹⁶Kutani ndzi ta vula ku avanyisa ka mina ehenhla ka ku homboloka hinkwako ka vona, hikuva va ndzi tshikile va ri karhi va hisela swikwembu swin'wana magandzelo, kambe va khinsamela mitirho ya mavoko ya vona.

¹⁷Wena-ke, tibohe xisuti, u yima, u va byela hinkwaswo leswi ndzi nga ta ku lerisa swona; u nga chavi emahlweni ka vona, ndzi nga ti tshuka ndzi ku chavisa emahlweni ka vona.

¹⁸Languta, namuntlha, mina ndzi ku endla muti wa khokholo, ni mhandze ya nsimbhi, ni rirhangu ra koporo emahlweni ka tiko hinkwaro, ni le mahlweni ka tihosi ta Yuda, ni le mahlweni ka vakulukumba va kona, ni le mahlweni ka vaprista va kona, ni le mahlweni ka vanhu va tiko.

¹⁹Va ta lwa na wena, kambe va nga ka va nga ku hluri, hikuva ndzi na wena ku ku lwela,” ku vula Yehovha.