Read tsonga Yeremiya 10 Bible Online

Yeremiya 10 - tsonga bible

Yeremiya 10

¹Yingisani rito leri Yehovha a mi byelaka rona, n'wina va yindlu ya Israele:

²Yehovha u vula, a ku: “Mi nga tshuki mi titoloveta mikhuva ya matiko, kambe mi nga tshuki mi chavisiwa hi swikombiso swa le tilweni hikuva matiko ma tshukisiwa hi swona.

³Hikuva mikhuva ya matiko i swahava hikuva va ya tsema rhavi emurhini, kutani ri tirhiwa hi mavoko ya muvatli hi xihloka;

⁴va ri bombisa hi silivhere ni nsuku, va ri bela swipikiri hi nyundzu leswaku ri nga tsekatseki.

⁵Swifaniso leswi swi kotisa mhandze leyi sasekisiweke kambe a swi vulavuri; swa rhwariwa, hikuva a swi tivi ku famba; mi nga tshuki mi swi chava, a swi endli swo biha; na swona swa tsandzeka ku endla leswo lulama.”

⁶A ku na la fanaka na wena Yehovha; u nkulukumba; vito ra wena ri tlakukile hikwalaho ka matimba.

⁷I mani la nga ku chaviki, wena hosi ya matiko? Hikuva u fanela hi ku chaviwa, hikuva exikarhi ka lava tlhariheke hinkwavo eka vamatiko, ni le xikarhi ka ku fuma hinkwako ka kona, a ku na la fanaka na wena.

⁸Hinkwavo va hungukile va rivele; dyondzo ya swifaniso swa vona i murhi ntsena, ni silivhere leyi furiweke leyi pfaka Tarxixi, ni nsuku lowu humaka eUfazi;

⁹i ntirho wa mavoko ya muvatli ni wa munyukisi; swifunengelo swa swona i swa xivunguvungu ni swa rihlaza ni leswa ribungu; hinkwaswo swilo sweswo i ntirho wa lavo tlhariha.

¹⁰Kambe Yehovha i Xikwembu xo lulama, i Xikwembu lexi hanyaka, ni Hosi ya mikarhi ni mikarhi. Misava yi tsekatseka hi ku kariha ka xona, kutani matiko ma nga ka ma nga yimi emahlweni ka ku kariha ka xona.

¹¹“Mi ta va byerisa sweswo, mi ku: ‘Swikwembu leswi nga ka swi nga endli tilo ni misava, swona swi ta susiwa emisaveni ni le hansi ka matilo.’ ”

¹²Hi xona xi nga endla misava hi matimba ya xona, xi tiyisile ntumbuluko hi vutlhari bya xona, kutani hi ku twisisa ka xona, xi andlarile matilo.

¹³Loko xi tlakusa rito, mati ma hlengeletana ematilweni; kambe xi humesa tihunguva emakun'wini ya misava hi ku hatima xi nisa mpfula, kutani xi humesa moya eku fumeni ka wona.

¹⁴Munhu un'wana ni un'wana u hungukile hi ku pfumala ku tiva; kutani munyukisi un'wana ni un'wana a khomisiwa tingana hi xifaniso xa yena, hikuva xifaniso xa yena i vunwa ntsena, a ku na ku hefemula ka xona.

¹⁵Swilo sweswo i vuhava, i mitirho ya ku kanganyisa; siku swi tshinyiwaka swi ta hela.

¹⁶Ku averiwa ka Yakobo a ku kotisi leswo tano, hikuva hi yena la vumbeke swilo hinkwaswo, kutani Israele i tiko leri nga ndzhaka ya yena; Yehovha wa tinyimpi i vito ra yena.

¹⁷Boha nhundzu ya wena, kutani u suka etikweni leri, wena la tshameke emahlomulweni.

¹⁸Hikuva Yehovha u vurisile, a ku: “Vonani sweswi ndzi ta cukumeta vaaki va tiko hi xipelupelu, kambe ndzi ta va rivata leswaku va khomiwa.”

¹⁹Yo! Yowee! Ndzi tshovekile! Mbanga ya mina ya pandza! Kambe ndzi ri: “Hakunene, hi rona khombo ra mina, swi ndzi fanele ku swi yingisela.”

²⁰Tende ra mina ri onhakile, ni tingoti ta mina hinkwato ti tsemekile; vana va mina va ndzi tshikile, kutani a va ha ri kona; a ka ha ri na loyi a nga yimisaka tende ra mina, ni loko ku ri ku pfuxa mitsonga ya mina.

²¹Hikuva varisi va hungukile, a va lavanga Yehovha; hikwalaho a va tlharihanga, kutani mitlhambi hinkwayo ya vona yi hangalasiwile.

²²Ku twakala mpfumawulo; maswivo i dzolonga lerikulu leri humeke etikweni ra n'walungu ku ta hundzula miti ya Yuda marhumbi, ni xivandla xa timhungubye.

²³Oho Yehovha, ndza swi tiva, ndlela ya munhu a yi le matimbeni ya yena, kambe munhu la fambaka a nga ka a nga lulamisi riendzo ra yena.

²⁴Yehovha, ndzi tshinye, kambe ku va hi mpimo, ku nga vi hi ku kariha ka wena, swi nga ri leswaku u ndzi heta.

²⁵Wa nga halata ku kariha ka wena ematilweni lama nga ku tiviki, ni le tinxakeni leti nga khongeriki vito ra wena; hikuva va dyile Yakobo, va n'wi dyile va va va n'wi heta, kambe va hetile vuako bya yena.