Read tsonga Yeremiya 11 Bible Online

Yeremiya 11 - tsonga bible

Yeremiya 11

¹Rito leri humaka eka Yehovha ri tshama ri ta eka Yeremiya, ri ku:

²“Yingisani marito ya ntwanano lowo, mi ma byela vanhu va Yuda ni vaaki va Yerusalema.

³U ku eka vona: Yehovha, Xikwembu xa Israele u vula a ku: A ku rhukaniwe munhu la nga yingisiki marito ya ntwanano lowo,

⁴lowu ndzi wu leriseke vatata wa n'wina, siku ndzi va humesaka etikweni ra Egipta, ehondweni ya nhumbu, ndzi ku: Yingisani rito ra mina, mi endla hinkwaswo leswi ndzi mi lerisaka swona; hilaha mi nga ta va tiko ra mina, mina ndzi va Xikwembu xa n'wina;

⁵hi laha ndzi nga ta heta ku hlambanya loku ndzi ku hlambanyeleke vatata wa n'wina va khale, ndzi ku: Ndzi ta va nyika tiko leri pfelelaka ntswamba ni vulombe, kukotisa leswi mi swi vonaka namuntlha.” Kutani ndzi hlamula, ndzi ku: “A swi ve tano, Yehovha!”

⁶Yehovha a ku eka mina: “Twarisa marito lawa hinkwawo emitini ya Yuda ni le mitsendzeleni ya Yerusalema, u ku: ‘Yingisani marito ya ntwanano lowo, mi endla ha wona.

⁷Hikuva ndzi tshama ndzi byela vatata wa n'wina, siku ndzi va humesaka etikweni ra Egipta ku fika namuntlha, ndzi ri karhi ndzi pfuka nimpundzu, ndzi huwelela, ndzi ku: “Yingisani rito ra mina.”

⁸Kambe a va yingisanga a va rhiyanga tindleve, kambe a va ri karhi va famba un'wana ni un'wana eku tinonon'hwiseni ka mbilu ya yena, ku va laha ndzi va humeselaka marito hinkwawo ya ntwanano lowu ndzi nga va lerisa leswaku va wu hlayisa, kambe a va wu hlayisanga.’ ”

⁹Yehovha a ku eka mina: “Ku endliwa makungu hi vanhu va Yuda ni vaaki va Yerusalema:

¹⁰Va tlhelele eku biheni ka vatata wa vona va khale lava tshamaka va ala ku yingisa marito ya mina, kambe va famba va ya tirhela swikwembu swin'wana; yindlu ya Israele, na yona yindlu ya Yuda yi tshovile ntwanano lowu ndzi wu endleke ni vatata wa vona.

¹¹“Hikwalaho, Yehovha u vula a ku: ‘Vonani, ndzi ta va humesela khombo leri va nga taka va nga poni eka rona; va ta huwelela eka mina, kambe ndzi nga ka ndzi nga va yingisi.

¹²Swi tsandza ni miti ya Yuda ni vaaki va Yerusalema, va ta ya huwelela eka swikwembu leswi va nga swi hisela mirhi ya risuna, kambe swi nga ka swi nga va pfuni hi siku ra khombo ra vona.

¹³Hikuva, wena Yuda, nhlayo ya swikwembu swa wena yi ringana ni miti ya wena! Kambe nhlayo ya tialitari ta tingana, ti nga tialitari leti ku hiseriwaka Baali mirhi ya risuna, yi fana ni nhlayo ya mitsendzele ya Yerusalema.’

¹⁴Loko u ri wena, u nga tshuki u khongelela tiko leri, kambe u nga tshuki u tlakusa ku huwelela ni loko xi ri xikhongelo, hikuva siku va vitanaka eka mina hikwalaho ka khombo ra vona, ndzi nga ka ndzi nga va yingisi.

¹⁵“Murhandziwa wa mina wa ha ri ni mhaka yihi endlwini ya mina, loko va ri karhi va endla manyala lamanyingi kona xana? Kambe nyama leyi hlawulekeke yi ta susiwa eka wena. Kakuloko u endla ku biha, hi kona u tsakaka.”

¹⁶Yehovha u ku thyile vito ra mutlhwari lowa rihlaza, lowo saseka, wa mihandzu leyinene. Hi mpfumawulo lowukulu u lunghiseriwe ndzilo, kutani marhavi ya wena ma phatluriwile.

¹⁷Yehovha wa tinyimpi la ku byaleke u lerisile ku biha ehenhla ka wena, hikwalaho ka ku homboloka ka yindlu ya Israele, ni ka va yindlu ya Yuda, kuloku va ku endleke leswaku va ndzi karihisa hi ku hisela Baali mirhi ya risuna.

¹⁸Yehovha u ndzi tivisile, kutani ndzi swi tivile, kutani u ndzi kombisile mitirho ya vona.

¹⁹Loko ndzi ri mina a ndzi kotisa nyimpfu leyo rhula leyi yisiwaka eku tlhaviweni, a ndzi nga swi tivi leswaku va kanerile makungu ehenhla ka mina, lama nge: “A hi dlayeni murhi ni swakudya swa wona Hi wu heta emisaveni ya lava hanyaka, kutani vito ra yena ri nga ha tshami ri tsundzukiwa!”

²⁰Kambe, oho Yehovha wa tinyimpi Mulerisi la lulameke, la ringaka swisuti ni timbilu, ndzi ta vona ku tirihisela ka wena ehenhla ka vona, hikuva ndzi vekile mhaka ya mina emavokweni ya wena.

²¹“Hikwalaho, Yehovha a nga vula, ehenhla ka vanhu va Anatoto, lava lavaka vutomi bya wena, lava nge: ‘U nga ha tshami u profeta hi vito ra Yehovha leswaku, u nga fi hi mavoko ya hina!’

²²Hikwalaho Yehovha wa tinyimpi u vula a ku: ‘Langutani, ndzi ta va ba! Lavantshwa va ta fa hi tlhari, ni vana va vona va xinuna ni va xisati va fa hi ndlala.

²³Ku nga ka ku nga phonyoki na un'we wa vona, hikuva ndzi ta vangela vanhu va Anatoto khombo hi lembe ra ku biwa ka vona.’ ”