Read tsonga Yeremiya 16 Bible Online

Yeremiya 16 - tsonga bible

Yeremiya 16

¹Rito ra Yehovha ri humelele eka mina, ri ku:

²“U nga tshuki u teka nsati, leswaku u nga tshuki u va ni vana va xinuna ni va xisati exivandleni lexi.”

³Hikuva, ku vula Yehovha ehenhla ka vana va xinuna ni va xisati lava velekiwaka exivandleni lexi, ni hikwalaho ka vamana wa vona, ni vatata wa vona lava va va velekeke etikweni leri a ku:

⁴“Va ta fa hi rifu lero biha, va nga ka va nga rileriwi, ni ku yimberiwa va nga ka va nga yimberiwi; kutani va ta va vulongo ehenhla ka misava. Va ta dlawa hi fumu ni ndlala, kambe mitsumbu ya vona yi ta dyiwa hi tinyanyana ta le henhla, ni swivandzana swa misava.”

⁵Hikuva, Yehovha u vula a ku: “U nga tshuki u nghena endlwini ya nkosi, u nga tshuki u ya eka vona ku ya rila na vona, ni loko ku ri ku va twela vusiwana; hikuva ndzi susile ku rhula ka mina ehenhla ka tiko leri, ku vula Yehovha, ni tintswalo ni ku tsetselela ka mina.

⁶Va ta fela etikweni leri, lavakulu ni lavatsongo, va nga ka va nga yimberiwi, va nga ka va nga rileriwi; kambe a va nga titlhaveri, a va nga tibyewuri hikwalaho ka vona.

⁷Kambe a ku na un'we wa vona la nga ta phemeriwa vuswa bya xirilo ku chaveleriwa hikwalaho ka mufi wa yena, kambe va nga ka va nga nwisiwi ndzheko wa ku chavelela hikwalaho ka tata wa vona, kumbe mana wa vona.

⁸Kambe, u nga tshuki u nghena endlwini ya mikhuvo ku ya tshamisa na vona, u dya ni ku nwa na vona.

⁹Hikuva, Yehovha wa tinyimpi, Xikwembu xa Israele u vula a ku: Maswivo, ndzi ta miyeta exivandleni lexi, emahlweni ka n'wina ni le mikarhini ya n'wina, rito ra ku tsaka ni rito ra ku rhula rito ra muteki ni rito ra mutekiwa.

¹⁰Kutakuloko u tivisile tiko leri timhaka teto hinkwato, loko va ku: ‘Xana Yehovha u vula ha yini khombo lerikulu lero tano ehenhla ka hina xana? Kambe ku biha ka hina ku kwihi, ni xidyoho xa hina hi xihi lexi hi nga dyohela Yehovha, Xikwembu xa hina, ha xona xana?’

¹¹U ta ku eka vona: ‘Hi leswi vatata wa n'wina va ndzi tshikeke, ku vula Yehovha, kutani va ya lava swikwembu swin'wana, va swi tirhela kambe va swi khinsamela; kambe, loko ndzi ri mina, va ndzi tshikile, kutani a va hlayisanga milawu ya mina.

¹²Kambe n'wina mi endla mitirho leyo biha ku tlula vatata wa n'wina; kutani mi famba un'wana ni un'wana eku tinonon'hwiseni ka mbilu leyo biha ya yena, leswaku mi nga ti ndzi yingisa.

¹³Hikwalaho, ndzi ta mi hlongola etikweni leri, ndzi mi yisa etikweni leri nga tiviwiki hi n'wina ni vatata wa n'wina, kutani mi ta ya tirhela swikwembu swimbe kona, nhlekanhi ni vusiku, hikuva ndzi nga ka ndzi nga ha mi tweri vusiwana.’

¹⁴“Hikwalaho, maswivo, ku ta masiku lawa, ku vula Yehovha, va nga ha tiki tshama, va ku: ‘Yehovha wa hanya, la humeseke vana va Israele etikweni ra Egipta,’

¹⁵kambe va ta ku: ‘Yehovha wa hanya, la humeseke vana va Israele etikweni ra n'walungu ni le matikweni hinkwawo, laha ingi a va hangalasile kona,’ kutani ndzi ta va tlherisela etikweni ra vona leri ndzi ri nyikeke vatata wa vona.

¹⁶“Vonani, ndzi ta vitana vaphasi lavo tala, ku vula Yehovha, kutani va ta va phasa; kambe ndzhaku, ndzi ta rhuma vahloti lavo tala, va ta va hlota etintshaveni hinkwato ni le switsungeni hinkwaswo ni le mabakweni ya maribye.

¹⁷Hikuva mahlo ya mina ma languta tindlela hinkwato ta vona leti nga tumbelangiki emahlweni ka mina, ni ku homboloka ka vona loku nga funengetiwangiki emahlweni ka mina.

¹⁸Kambe, eku sunguleni, ndzi ta va rihisela kambirhi ku homboloka ka vona ni ku dyoha ka vona, hikuva va nyamisile tiko ra mina hi manyala ya vona, kambe va tatile ndzhaka ya mina hi mitsumbu ya swikwembu swa vona leswi sandzekaka.”

¹⁹Oho Yehovha, matimba ya mina, ni khokholo ra mina, ni xichavelo xa mina hi siku ra mahlomulo! Matiko ma ta ta eka wena, ma huma emakumu ka misava, kutani ma ta ku: “Kunene, vatata wa hina va fuwile vunwa ni vuhava lebyi nga riki na ku pfuna nchumu.

²⁰Xana munhu a nga tiendlela swikwembu xana? Kasi a hi swikwembu!”

²¹“Hikwalaho-ke, langutani sweswi ndzi ta va tivisa voko ra mina ni matimba ya mina, kambe ndza ha ta va tivisa swona; kutani va ta tiva leswaku vito ra mina i Yehovha.”