Read tsonga Yeremiya 2 Bible Online

Yeremiya 2 - tsonga bible

Yeremiya 2

¹Rito ra Yehovha ri humelele eka mina, ri ku:

²“Yana u ya huwelela etindleveni ta Yerusalema, u ku: ‘Ku vula Yehovha a ku: “Ndzi karhi ndzi anakanya ku lulama ka vuntshwa bya wena, ni rirhandzu ra ku teka ka wena, loko u ri karhi u ndzi landza endzhaku emananga, etikweni leri nga rimiwangiki.

³Israele a a hlaseriwile emahlweni ka Yehovha, a swi ri swirhangana swa rifuwo ra yena, hinkwavo lava n'wi dyaka a va ri na nandzu, a va humeleriwa hi khombo,” ’ ” ku vula Yehovha.

⁴Yingisani rito ra Yehovha, n'wina yindlu ya Yakobo, na n'wina tinxaka hinkwato ta yindlu ya Israele.

⁵Ku vula Yehovha a ku: “Vatata wa n'wina va tshama va kuma ku biha kwihi eka mina xana? Leswi va tshamaka va hambana na mina, va fambela vuhava, kutani va hundzuka swahava.

⁶A va vulangi, va ku: ‘U kwihi Yehovha, la hi humeseke etikweni ra Egipta, la hi fambiseke emananga, etikweni lero kwalala, ra mikova, tiko leri omeke ra ndzhuti wa rifu, tiko leri nga riki na muhundzi, ni muaki?’

⁷Ndzi mi tisile etikweni ra ndzalo, leswaku mi ta dya mihandzu ya rona ni mafurha ya rona, kambe mi nghenile, kutani mi dyuhata tiko ra mina, ni ndzhaka ya mina mi yi endla manyala.

⁸Vaprista a va vulanga, va ku: ‘U kwihi Yehovha?’ Ni vatameri va nawu a va ndzi tivanga; varisi va ndzi hundzukela, ni vaprofeta va profeta ha Baali, kambe va landza lava nga pfuniki nchumu.

⁹“Hikwalaho ndza ha ta mi tengisa,” ku vula Yehovha; “kambe ndzi ta tengisa ni vatukulu va n'wina.

¹⁰Pelelani eswihlaleni swa Kitimi, mi ta languta; rhumelani eKedari, mi tsundzuka swinene, mi languta loko mhaka leyo tano yi tshama yi va kona.

¹¹Haa! Xana tiko ri nga va kona leri tshikaka Xikwembu xa rona, ku teka swin'wana, kasi swona a hi swikwembu xana? Kambe tiko ra mina ri tshikile ku kwetsima ka rona, ri tifuwisa hi leswi nga riki nchumu!

¹²N'wina matilo, tanani mi hlamala hi mhaka leyi, mi ta rhurhumela, mi titivala,” ku vula Yehovha!

¹³“Hikuva tiko ra mina ri dyohile kambirhi: va ndzi tshikile, mina ndzi nga nseledyana ya mati lama pfelelaka kambe va ticelele swihlovo, le swi handzukeke, leswi nga kotiki ku hlayisa mati.

¹⁴“Xana Israele i khumbi leri xaviweke, kumbe la velekiweke endlwini xana? U byisiwile hikwalaho ka yini?

¹⁵Tinghala ta n'wi mpfandzela, ti pfumisa marito ya tona, kutani ti handzula tiko ra yena, ku va ku onhaka ntsena; miti ya yena yi hisiwile, yi pfumarile vaaki.

¹⁶Hambi va ri vana va Nofu ni va Tahapanese, va ta ku fayetela rhavarhava.

¹⁷“A ndzi ku, u humeleriwa hi sweswo hi leswi u tshikeke Yehovha, Xikwembu xa wena; siku a ku fambiseke endleleni.

¹⁸Kutani sweswi u fambela yini hi ndlela ya Egipta, ku ya nwa mati ya Nilo? U fambela yini hi ndlela ya Asiriya, ku nwa mati ya nambu?

¹⁹U ta holoveriwa hi ku biha ka wena, u ta biwa hi ku hundzuka ka wena; u ta tiva, u va u vona leswaku ku tshika Yehovha, Xikwembu xa wena, ni ku ka u nga n'wi chavi, i mhaka leyo biha,” ku vula Hosi, Yehovha wa tinyimpi.

²⁰“Hikuva khale u tshovile joko ra wena, u tshunxile mapindza ya wena, kambe u ku: ‘A ndzi nga ha tirhi!’ hilaha u tinyikeke vuoswi eswitsungeni hinkwaswo leswi tlakukeke ni le hansi ka mirhi hinkwayo leyi nga ni matluka.

²¹Kasi mina, a ndzi ku simekile, u ri vhinya leyi hundzisaka hi ku saseka, wa rixaka lerinene; u tihundzurise ku yini leswaku u va vhinya ya rixaka rimbe eka mina-ke?

²²Hambi u nga tihlantswa hi nitra, kutani u teka xisibi lexo tala, ku biha ka wena ku nga ka ku nga suki emahlweni ka mina,” ku vula Hosi Yehovha.

²³“U nga vurisa ku yini leswaku a ndzi tinyamisanga, a ndzi landzanga Baali xana? Languta mitila ya wena erivaleni; anakanya leswi u swi endleke, wena kamela ra matsambo leri tsutsumelaka lahaya ni lahaya.

²⁴U mangwa leyi toloveleke mananga, yi nun'hwetela moya hi ku navela ka yona; eku tsutsumeni ka yona yi nga kota hi mani xana? Leti ti yi lavaka ti nga ka ti nga tikarhati, ti ta yi kuma hi n'hweti ya yona.

²⁵Hiteka leswaku nenge wa wena wu nga fambi ntsena, ni nkolo wa wena wu nga omi, u ri karhi u vula leswaku ndzi rhandzile swikwembu swa vamatiko, kambe ndza ha ta swi landzela.

²⁶“Hilaha khamba ri khomisiwaka tingana loko ri khomiwa, yindlu ya Israele yi ta khomisiwa tingana hi mukhuva wolowo, yona ni tihosi ta yona ni vakulukumba va yona, ni vaprista va yona, ni vaprofeta va yona;

²⁷va nga lava nge eka murhi: ‘U tatana,’ ni ka ribye va ku: ‘Hi velekiwe hi wena.’ Hikuva va ndzi kombile xikosi, wu nga ri mombo hambi siku va humeleriwaka hi khombo, va ku: ‘Yima, u hi ponisa!’

²⁸Swi kwihi swikwembu swa wena leswi u tiendleleke swona? A swi yime swi ku pfuna hi siku ra khombo; hikuva wena Yuda, nhlayo ya swikwembu swa wena yi fana ni ya miti ya wena!

²⁹“Mi tenga yini na mina, n'wina lava ndzi tshikeke hinkwenu,” ku vula Yehovha.

³⁰“Ndzi tshinyile vana va n'wina mahala, a va amukelanga ku layiwa; fumu ra n'wina ri dlayile vaprofeta va n'wina kukotisa nghala leyi handzulaka!

³¹N'wina va rixaka leri, yingisani rito ra Yehovha! Xana ndzi ve tiko leri nga mananga eka Israele, kumbe tiko ra munyama lowa ntima? Tiko ra mina ri vulisa ku yini, loko ri ku: ‘Hi ta tsutsumela lahaya ni lahaya, a hi nga ha tlheleri eka wena.’

³²Xana wanhwana a nga rivala vubombi bya yena, kumbe mutekiwa mavamba ya yena xana? Kambe tiko ra mina ri ndzi rivarile hi masiku lama nga heriki.

³³“U tlharihile swonghasi etindleleni ta wena ku lava leswi u swi rhandzaka hilaha u titoloveteke ni ku dlaya.

³⁴Kasi ni le madziveni ya nguvu ya wena, ku kumiwa ngati ya swisiwana leswi nga riki na nandzu, lava u nga va khomangiki va boxa yindlu ya wena, kambe u va dlayile hikwalaho ka mikhuva ya wena hinkwayo.

³⁵Hambiswiritano, u ri: ‘E-e, a ndzi na nandzu. Hakunene ku kariha ka yena ku hambukile!’ Languta, ndzi ku tengisa hikuva u ri: ‘A ndzi dyohanga.’

³⁶U phikelela hikwalaho ka yini ku hambuka ndlela ya wena? U ta khomisiwa tingana hi Egipta, kukota loko wa ha khomisiwile tingana i Vaaxuru.

³⁷Na swona u ta huma kona, u rhwele mavoko ya wena enhlokweni, hikuva Yehovha u sandza lava u va tshembeke, kambe u nga ka u nga kumi ku tsaka eka vona.”