Read tsonga Yeremiya 24 Bible Online

Yeremiya 24 - tsonga bible

Yeremiya 24

¹Kuteloko Nebukadnetsara, hosi ya Babilona, a khome Yekoniya, n'wana Yoyakimi, hosi ya Yuda ni vakulukumba va Yuda, ni vavatli, ni vafuri va le Yerusalema, a va yisa eBabilona, Yehovha a ndzi kombisa swikombiso, a swi ri swirhundzu swimbirhi swa makuwa, swi vekiwile emahlweni ka tempele ya Yehovha.

²Xirhundzu xin'wana a xi ri ni makuwa yo nandziha, kukotisa makuwa ya swirhangana, xirhundzu xin'wana xi ri ni makuwa yo biha ngopfu, lama nga dyekiki hi ku biha ka wona.

³Yehovha a ku eka mina: “U vona yini, Yeremiya?” Ndzi ku: “Ndzi vona makuwa; makuwa layo nandziha, ma nandziha ngopfu; layo biha, wona, ma biha ngopfu, a ma na ku dyiwa hikuva ma bihile.”

⁴Kutani rito ra Yehovha ri ta eka mina, ri ku:

⁵“Ku vula Yehovha Xikwembu xa Israele: Kukotisa loko makuwa lawa ma nandziha, va Yuda lava khomiweke, valavo ndzi va suseke exivandleni lexi, ndzi va yisa etikweni ra Vakalediya, ndzi ta va languta ku va endla swinene.

⁶Ndzi ta va languta hi tihlo lerinene ndzi va tlherisela etikweni lero ndzi va akisa, ndzi nga va onhi; ndzi va byala, ndzi nga va tsuvuri.

⁷Ndzi ta va nyika timbilu leti tivaka leswaku ndzi Yehovha; ri ta va tiko ra mina, mina ndzi va Xikwembu xa vona hikuva va ta hundzukela ka mina hi timbilu hinkwato ta vona.

⁸“Kutani kukotisa sweswi endliwaka eka makuwa layo biha, lama nga dyiwiki hikuva ma bihile, ku vula Yehovha, ndzi ta endla sweswo eka Sedekiyasi, hosi ya Yuda, ni ka tindhuna ta yena, ni ka nsalo wa Yerusalema, lowa ha seleke etikweni lero, ni ka lava akeke etikweni ra Egipta.

⁹Ndzi ta va nyiketa eku xanisekeni ni le makhombyeni, eku fumeni hinkwako ka misava, va ta va xisandzu, va soriwa, va va xikombiso ni ku rhukaniwa ematlhelweni hinkwawo, laha ndzi nga ta va hangalasela kona.

¹⁰Ndzi ta rhuma matlhari exikarhi ka vona, ni ndlala, ni ntungu; va ta hela etikweni leri ndzi tshamaka ndzi ri nyika vona, ni vatata wa vona.”