Read tsonga Yeremiya 31 Bible Online

Yeremiya 31 - tsonga bible

Yeremiya 31

¹“Enkarhini wolowo, ku vula Yehovha, ndzi ta va Xikwembu xa tinxaka hinkwato ta Israele; tona, ti va tiko ra mina.”

²Ku vula Yehovha: “Tiko leri siyiweke hi matlhari, ri vonile tintswalo emananga, A hi yeni, hi ta nyika Israele ku wisa.

³“Yehovha u tikombisile eka mina a ri ekule, a ku: E-e, ndza ku rhandza hi rirhandzu leri nga heriki; hikwalaho ndzi ta ku hlayisela tintswalo ta mina!

⁴Ndzi ta ku aka, kutani u ta va u akiwile, wena, nhwanyana wa Israele! U ta va u tibombisa hi mirumba ya wena, u ta huma u famba exiyin'weni xa vatsaki.

⁵Wa ha ta rima tivhinya etintshaveni ta Samariya; varimi va tona va ta rima, va tidyela mihandzu ya tona.

⁶Hikuva siku ri kona leri valanguteri va nga tsaka huwelela ha rona entshaveni ya Efrayimi, va ku: ‘Sukani, a hi tlhandlukeni eSiyoni, eka Yehovha, Xikwembu xa hina!’ ”

⁷Hikuva Yehovha u vula a ku: “Huwelelani hi ku tsaka eka Yakobo, mi dzunisa loyi a nga lowo rhanga exikarhi ka matiko; twarisani tinsimu, mi ku: ‘Oho Yehovha, ponisa tiko ra wena, e masalela ya Israele?’

⁸“Vonani, ndzi ta va vita etikweni ra le dzongeni, ndzi va hlengeleta emakun'wini ya misava. Exikarhi ka vona ku ni lowo fa mahlo ni lowo khwita, la tikeke ni ntswendyana, swin'we va ta tlhelela halenu va tele ngopfu.

⁹Va ta, va ri karhi va rila; ndzi va fambisa va ri karhi va khongela, ndzi va yisa emilambyeni ya mati, hi ndlela yo lulama leyi va nga tiki khunguvanyeka eka yona; hikuva ndzi ta va tatana eka Israele, Efrayimi a va n'wananga wa mativula.

¹⁰“Yingisani rito ra Yehovha, n'wina matiko, mi tivisa swihlale swa le kule, mi ku: ‘La hangalaseke Israele wa n'wi hlengeleta, u ta n'wi risa kukotisa murisi la rixaka ntlhambi wa yena.’

¹¹Hikuva Yehovha u kutsule Yakobo, u n'wi lamulele emavokweni ya la n'wi hlulaka hi matimba.

¹²Va ta ta va huwelela hi ku tsaka eswitsungeni swa Siyoni; va ta tsutsumela vunene bya Yehovha, yi nga koro, ni vhinyo ni mafurha, ni leswi tswariweke hi tinyimpfu ni tihomu; mimoya ya vona yi ta kotisa ntanga lowu cheletiweke swinene, a va nga ha tshami eku vavisekeni.

¹³Hilaha vanhwanyana va nga ta tsakisisa eku cineni, ni majaha ni swikoxa swin'we; ndzi ta hundzula tingana ta vona ku tsaka, ndzi va chavelela, ndzi va tsakisa ematshan'weni ya ku vaviseka ka vona.

¹⁴Ndzi ta xurhisa mimoya ya vaprista hi mafurha, kutani tiko ra mina ri ta xurha ku nandzihaka mina, ku vula Yehovha.”

¹⁵Yehovha u vula a ku: “Huwa yi twakele eRhama, ku rila ni mikosi yo vavisa; i Rahele la rilelaka vana va yena, wa ala ku chaveleriwa ematshan'weni ya vana va yena, hikuva a va ha ri kona.”

¹⁶Ku vula Yehovha: “Miyeta rito ra wena, u nga rili ni mahlo ya wena ma nga halati mihloti, hikuva mitirho ya wena yi ta va ni hakelo ku vula Yehovha: Va ta tlhela etikweni ra valala.

¹⁷Ku tshemba ku; kona emikarhini ya wena leyi nga ta ta, ku vula Yehovha: vana va wena va ta vuyela emindzilekaneni ya vona.

¹⁸“Ndzi twile Efrayimi loko a tirilela, a ku: ‘U ndzi holovele hi ku holova loku kotisaka xinkuzana lexi nga siki dyondzisiwaka: Ndzi tlherisele eka wena, hi kona ndzi nga ta tlhela; hikuva u Yehovha, Xikwembu xanga!

¹⁹Hikuva loko ndzi hundzukile, ndza tisola, loko ndzi tivurile, ndzi tiba ndzhumbi; ndzi va ni tingana, ndzi kanakana, hikuva ndzi rhwele nandzu wa vuntshwa bya mina.’

²⁰“Xana Efrayimi i n'wana la rhandziwaka eka mina xana, kumbe n'wana loyi ndzi n'wi tsakelaka xana? Hikuva hi masiku loko ndzi n'wi vula, ndzi anakanya yena hi ku tlurisa; hikwalaho marhumbu ya mina ma pfumaka hikwalaho ka yena; kunene ndzi ta n'wi tsetselela, ku vula Yehovha.

²¹“U tiyimisela rihika, u titlhomela swikombandlela, langutisa ndlela ni mitila leyi u fambaka ha yona, vuya nhwanyana wa Israele, vuyela emitini leyi nga ya wena.

²²U ta pepetseka ku yisa kwihi, wena nhwanyana la tiarisaka? Hikuva Yehovha u ta vumba xilo lexintshwa emisaveni: wansati u ta rhendzela wanuna exikarhi.”

²³Ku vula Yehovha wa mavandla, Xikwembu xa Israele: “Va ha ta vula marito lawa emisaveni ya Yuda, ni le mitini ya kona, loko ndzi tlherisile varikwavo lava nga eku bohiweni, va ku: ‘Yehovha a a ku katekise, vuako byo lulama, ntshava leyi hlawuriweke!’

²⁴Va Yuda va ta tiakela kona swin'we ni va miti hinkwayo ya vona, varimi ni vafambisi va mitlhambi.

²⁵Hikuva ndzi ta horisa moya lowu nga ni torha, ni moya wun'wana ni wun'wana lowu tsaneke, ndzi wu xurhisa.”

²⁶Kavaloko ndzi pfuka, ndzi languta; kutani vurhongo bya mina a byi ri lebyo nandziha.

²⁷“Vonani, ku vula Yehovha, ma ta masiku lawa ndzi nga ta byalela yindlu ya Israele, ni yindlu ya Yuda mbewu ya vanhu, ni mbewu ya swifuwo.

²⁸Kutani, kukotisa leswi ndzi tshamaka ndzi va langutela ku yimbula, ni ku hahlula, ni ku mbundzuxa, ni ku onha, ni ku endla swo biha, na kona ndzi ta va langutela ku aka, ni ku simeka, ku vula Yehovha.

²⁹Enkarhini wolowo, a va nga ha tshami, va ku: ‘Vatatana va dyile mihandzu leyo bava kutani meno ya vana ma rherhemela.’

³⁰Kambe un'wana, ni un'wana u ta fa hi ku homboloka ka yena, un'wana ni un'wana la dyaka mihandzu leyo bava, meno ya yena ya ta rherhemela.

³¹“Vonani, ku vula Yehovha, ma ta ta masiku lawa ndzi nga ta endla ha wona ntwanano lowuntshwa ni yindlu ya Israele ni yindlu ya Yuda.

³²Ku nga ri kukota ntwanano lowu ndzi wu endleke na vatata wa vona siku ndzi va khomaka hi voko ku va humesa etikweni ra Egipta, va nga lava nga tshova ntwanano wa mina, kasi a ndzi ri n'wini wa vona, ku vula Yehovha.

³³Kambe hi lowo ntwanano lowu ndzi nga ta wu endla ni yindlu ya Israele endzhaku ka masiku lawa, ku vula Yehovha: Ndzi ta veka nawu wa mina exikarhi ka vona, ndzi wu tsala etimbilwini ta vona, ndzi va Xikwembu xa vona, vona va va tiko ra mina.

³⁴A va nga ha dyondzisi un'wana ni un'wana nakulobye; a ku na munhu la nga ta dyondzisa warikwavo, a ku: ‘Tiva Yehovha!’ Hikuva va ta ndzi tiva hinkwavo, ku sungula hi lontsongo eka vona, ku yisa eka lonkulu, ku vula Yehovha; hikuva ndzi ta va tshikela ku homboloka ka vona, a ndzi nga ha anakanyi xidyoho xa vona.”

³⁵Hikuva, ku vula Yehovha, la vekeke dyambu leswaku ku va ku vonakala ninhlekanhi, la vekeke n'weti ni tinyeleti leswaku ti voninga vusiku, la pfuxaka lwandle kutani magandlati ya rona ma va ma pfuma: Yehovha wa mavandla, hi rona vito ra yena.

³⁶“Loko milawu yoleyo yi nga hundzuka emahlweni ka mina, ku vula Yehovha, na rona rixaka ra Israele ri ta tshika ku va tiko emahlweni ka mina hilaha ku nga heriki.”

³⁷Ku vula Yehovha: “Loko ku nga pimiwa matilo ya le henhla laha ma fikaka kona, ni masungulo ya misava ya le hansi laha ma helelaka kona, ndzi ta tshika rixaka hinkwaro ra Israele hikwalaho ka hinkwaswo leswi va swi endleke, ku vula Yehovha.”

³⁸“Vonani, ku vula Yehovha, ma ta masiku lawa muti wu nga ta akeriwa Yehovha ha wona, ku suka ekhokholweni ra Hananele ku yisa enyangweni ya yinhla.

³⁹Pindza ra mpimo ri ta suka kona ri languta exitsungeni xa Garebe, ri rhendzeleka ku fika eGowa.

⁴⁰Nkova hinkwawo wa mitsumbu ni wa nkuma, ni masimu hinkwawo, ku yisa enambyaneni wa Kedroni ku fika eyinhleni ya nyangwa ya tihanci, hitlhelo ra vuxa, ku ta hlawuleriwa Yehovha; a ku nga ha mbundzuxiwi, a ku nga ha onhiwi hilaha ku nga heriki.”