Read tsonga Yeremiya 40 Bible Online

Yeremiya 40 - tsonga bible

Yeremiya 40

¹Rito ri huma eka Yehovha ri ta eka Yeremiya, loko Nebuzaradani, ndhuna ya valanguteri, a n'wi tlheriserile eRhama, laha a n'wi kumeke kona a bohiwile hi tiketana, a ri exikarhi ka lava khomiweke hinkwavo va Yerusalema, ni va Yuda, va yisiwa eBabilona.

²Ndhuna ya valanguteri, a teka Yeremiya, a n'wi byela, a ku: “Yehovha Xikwembu xa wena, u vurile ku biha loku ehenhla ka xivandla lexi.

³Kutani Yehovha u ku humesile, u endlile hilaha a nga vula hakona, hikuva mi dyohele Yehovha, a mi yingisanga rito ra yena, hikokwalaho mi humeleleke hi mhaka yoleyi.

⁴Loko u ri wena, vona sweswi, ndzi tshunxa tiketana emavokweni ya wena; hambiloko u rhandza ku famba na mina eBabilona, hi nga famba, ndzi ta ku londzovota, kambe loko u nga rhandzi ku ya na mina eBabilona, u nga sala; languta, tiko hinkwaro ri le mahlweni ka wena, laha ku sasekeke, laha u rhandzaka ku ya, yana kona.

⁵Kakuloko a ha hlwela ku hlamula a ku eka yena: Tana u tlhelela eka Gedaliya, n'wana Ahikama n'wana Xafani, loyi hosi ya Babilona yi n'wi vekeke ku risa tiko ra Yuda, u tiakela na yena exikarhi ka tiko; kumbe hinkwako laha u ku vonaka leswaku ku sasekile eka wena ku ya kona, u nga famba.” Kutani ndhuna ya valanguteri, yi n'wi, nyika timbuva ni tinyiko, yi n'wi ha ndlela.

⁶Kutani Yeremiya a ya eka Gedaliya, n'wana Ahikama, eMispa, a tshama kona eka yena exikarhi ka tiko leri seleke etikweni ra Yuda.

⁷Tindhuna hinkwato ta mavandla lawa ngi ma ri enkoveni, ni vanhu va vona kuteloko va twa leswaku hosi ya Babilona yi vekile Gedaliya, n'wana Ahikama, ku risa tiko, ni leswaku a vekile emandleni ya yena vavanuna, ni vavasati, ni vana, ni swisiwana swa tiko swa lava nga yisiwangiki eku bohiweni eBabilona;

⁸va ta eka Gedaliya eMispa, a ri Iximaele, n'wana Netaniya, na Yohanani na Yonatani, vana va Kariyaka, na Seraya, n'wana Tanahumeti, ni vana va Efayi, wa Netofa, na Yezaniya, n'wana wa Mumaaka, va ri ni vanhu va vona.

⁹Kutani Gedaliya, n'wana Ahikama, n'wana Xafani, a va hlambanyela ni vanhu va vona, a ku: “Mi nga chavi ku tirhela Vakalediya; mi tiakela etikweni, mi tirhela hosi ya Babilona, hi kona mi nga ta tsaka.

¹⁰Loko ndzi ri mina vonani, ndzi ya aka eMispa, ku yima emahlweni ka Vakalediya lava nga ta ta eka hina; kutani n'wina hlengeletani vhinyo, ni mihandzu, ni mafurha, mi swi veka etimbiteni ta n'wina, kutani mi aka emitini leyi mi nga eka yona.”

¹¹Kambe Vayuda hinkwavo lava ngi va ri etikweni ra Mowabu, ni le tikweni ra vana va Amoni, ni ra Vaedomu, ni lava ngi va ri ematikweni hinkwawo ya matlhelo, va twa leswaku hosi ya Babilona yi siyele Yuda masalela ni leswaku yi vekile Gedaliya, n'wana Ahikama, n'wana Xafani, murisi wa vona.

¹²Kutani Vayuda hinkwavo va tlhelela etindhawini hinkwato leti ngi va hangalakile eka tona, va tlhelela etikweni ra Yuda eka Gedaliya eMispa, va hlengeleta vhinyo, ni mihandzu ya ku tala ngopfu.

¹³Kambe Yohanani, n'wana Kariyaka ni tindhuna hinkwato ta mavandla lawa ngi ma ri enhoveni, va ta eka Gedaliya eMispa, va ku eka yena:

¹⁴“A hi ku, wa swi tiva leswaku Baalisi, hosi ya vana va Amoni, u rhumile Iximaele, n'wana Netaniya, ku ku dlaya xana?” Kambe Gedaliya, n'wana Ahikama, a nga pfumelanga.

¹⁵Yohanani, n'wana Kariyaka, a byela Gedaliya exihundleni eMispa, a ku: “Ndzi pfumelele ku dlaya Iximaele, n'wana Netaniya, swi nga tiviwi hi munhu, a ta ku dlayela yini-ke? Vayuda hinkwavo, lava hlengeletanaka eka wena va ta hangalasela yini-ke, ni masalela ya Yuda ma ta lovela yini xana?”

¹⁶Kutani Gedaliya, n'wana Ahikama, a hlamula Yohanani n'wana Kariyaka, a ku: “U nga endli swoleswo, hikuva u hemberile Iximaele.”