Read tsonga Yeremiya 48 Bible Online

Yeremiya 48 - tsonga bible

Yeremiya 48

¹Ku vula Yehovha wa tinyimpi, Xikwembu xa Israele a ku: “U ni khombo Nebo, hikuva u onhiwile; Kiriyatayimi u khomisiwile tingana, u ngheniwile; Misigaba u khomisiwile tingana, kutani u tshoviwile.

²Ku kwetsima ka Mowabu a ka ha ri kona. Le Hexiboni, va anakanya swo biha hikwalaho ka yena, va ri: ‘Tanani hi n'wi herisa, a nga ha ti tshama a va tiko.’ Na wena, Mademeni, u ta dlawa; fumu ri ta ku fambela endzhaku.

³Nkololo wu twakala Horonayimi, i ku onha ni ku biwa lokukulu.

⁴Mowabu u tshovekile; tihuwa ta lavatsongo va yena ta twakala.

⁵Hikuva le ntsungeni wa Luhiti, va rila ni ku rila; hikuva eku rheleleni ka Horonayimi ku twiwa ku kolola ka ku onha ka valala.

⁶Tsutsumani mi hanyisa mimoya ya n'wina, mi kota swisiwana leswi hanyaka emananga.

⁷“Hikuva loko u titshembele mitirho ya wena, ni vukosi bya wena, na wena, u ta byisiwa, kutani Kemoxi u ta yisiwa eku bohiweni swin'we ni vaprista va yena ni vakulukumba va yena.

⁸Muonhi u ta nghena emutini wun'wana ni wun'wana, a ku na muti lowu nga ta pona; nkova wu ta lova, ni mananga ma ta onhiwa hilaha Yehovha a vuleke hakona.

⁹Nyikani Mowabu timpapa, leswaku a haha, a suka! Miti ya yena yi ta herisiwa, ku ta pfumala ni muaki eka yona.

¹⁰A ku rhukaniwe la nga ta endla ntirho wa Yehovha hi ku loloha; ku rhukaniwa la alelaka fumu ra yena ngati!

¹¹“Mowabu a tshama a titsakela a ha ri evutsongwaneni bya yena, a a titshamela exisenseni xa yena, a nga halatiwanga, mbita yin'wana embiteni yin'wana, a nga si ya eku bohiweni; hikwalaho ku nun'hwa ka yena ku tshame ku va kona, ku twala ka yena a ku hundzukanga.

¹²Hikwalaho, vonani, masiku ma ta, ku vula Yehovha, lawa ndzi nga ta rhuma eka wona vahalati, va ta halata timbita ta yena, kutani va faya swikutsu swa yena.

¹³Mowabu u ta khomisiwa tingana hi Kemoxi, kukota loko yindlu ya Israele yi tshama yi khomisiwa tingana hi Betele, ku tshemba ka vona.

¹⁴Mi nga vurisa ku yini, mi ku: ‘Hi tinhenha, hi hlomile ku huma nyimpi’?

¹⁵Mowabu u onhakile, miti ya yena yi tlhandluka wu ri musi; lavantshwa, lava hlawuriweke va yena va xikela eku dlayiweni, ku vula loyi vito ra yena a nga Yehovha wa tinyimpi.

¹⁶Ku onhaka ka Mowabu ku ta hatla ku fika, khombo ra yena ra hatlisa ni ku hatlisa.

¹⁷N'wina va le kusuhi na yena, hinkwenu, n'wi tweleni ku vaviseka: na n'wina hinkwenu lava tivaka vito ra yena, mi ku: ‘Yi tshovisiwile ku yini nhonga leyi ya matimba, nhonga ya vumbhurhi?’

¹⁸“Xika eku twakaleni, wena muaki, n'wana Diboni, u titshamela etorheni; hikuva muonhi wa Mowabu u ta ku hlasela, u ta mbundzuxa makhokholo ya wena.

¹⁹Yima endleleni, u languta, wena muaki wa Arowere, vutisa la balekeke, ni la poneke, u ku: ‘Ku humelele yini?’

²⁰Mowabu u khomisiwile tingana, hikuva u tshoviwile. Rilani mi kolola, mi byela Arinoni leswaku Mowabu u onhiwile.

²¹“Ku avanyisa ku fikele etikweni ra rivala, ku tile eHoloni, na Yahasa, na Mefata,

²²na Diboni, na Nebo, na Beta-Diblatayimi,

²³na Kiriyatayimi, na Beta-Gamulu, na Beta-Meyoni,

²⁴na Keriyoto, na Bosira, ni miti hinkwayo ya misava ya Mowabu, leyi nga ekusuhi, ni leyi nga ekule.

²⁵Rimhondzo ra Mowabu, ri swekiwile; ni voko ra yena, va tshovile, ku vula Yehovha.

²⁶“N'wi pyopyiseni, hikuva u tiarisele Yehovha! Mowabu u ta puluvundza emahlanteni ya yena, kutani u ta endliwa xisandzu.

²⁷Xana a ku endlanga Israele xisandzu xa wena xana? A lo khomiwa hi vukhamba leswi u n'wi nikinelaka nhloko loko u vulavula ta yena xana?

²⁸Sukelani miti ya n'wina, mi aka emaribyeni, n'wina vaaki va Mowabu, kutani mi kotisa matuva lama tiakelaka enon'wini wa bako!

²⁹“Hi twile ku tikukumuxa ka Mowabu mutikukumuxi lonkulu, ni ku tiarisa ka yena, ni ku tinyungubyisa ka yena, ni ku tikurisa ka yena, ni ku tlakuka ka mbilu ya yena.

³⁰Ndzi tiva ku kariha ka yena, ku vula Yehovha, ni vuhava bya ku tikurisa ka yena ni bya mitirho ya vona.

³¹Hikwalaho ndzi rilela Mowabu, ndzi rilela Mowabu hinkwaro; ka ririwa hikwalaho ka vanhu va Kiri-Herexe.

³²Hi mikosi ya Yazere, ndzi ta ku rilela, wena vhinya ya Sibima, wena loyi marhavi ya wena ma nga pela lwandle ku ya fika elwandle ra Yazere! Muonhi u wele emihandzwini ya yena, ni le ku tshoveleni ka yena.

³³Ku tsaka ni ku tsakisisa swi susiwile emasin'wini ni le tikweni ra Mowabu; ndzi herisile vhinyo exikhuvutweni a ka ha kandziwi hi tinsimu; i huwa, a ra ha ri risimu.

³⁴“Nkololo wa Hexiboni wu twala ku fika eEleyale; wu twakala ni ku fika eYahasi; ku suka eSowara, ku fika eHoronayimi, ni le Egilata-Xelixiya; hikuva, na wona mati ya Nimri ma onhiwile.

³⁵Ndzi ta endla leswaku Mowabu a pfumala ni un'we la nga ta tlhandlukela exivandleni lexi tlakukeke, ni ku hisela swikwembu swa yena mirhi ya risuna, ku vula Yehovha.

³⁶“Hikwalaho mbilu ya mina yi rila kukota tinanga hikwalaho ka Mowabu; mbilu ya mina yi rila kukota tinanga hikwalaho ka vanhu va Kiri-Herexe, hikuva leswi hlengeletiweke hi vona, swi lovile.

³⁷Hikuva tinhloko hinkwato ti byewuriwile, ni malebvu hinkwawo va byewurile va tlhavele mavoko hinkwawo, kutani tinguvu ta ku khwaxa ti le swisutini hinkwaswo swa vona.

³⁸Etindlwini hinkwato ta Mowabu ni le mitsendzeleni hinkwayo ya yena va kolola; hikuva ndzi fayile Mowabu kukotisa mbita leyi sandziwaka, ku vula Yehovha.

³⁹U tshovisiwe ku yini! Kololani! Mowabu u fularhele a ri ni tingana! Mowabu u sandziwile a va a chaviwa hi hinkwavo lava n'wi rhendzelaka exikarhi.”

⁴⁰Hikuva ku vula Yehovha: “Vona, u haha kukota gama, u dlamula timpapa ta yena tlhelo ra Mowabu.

⁴¹Keriyoto u khomiwile, ni makhokholo ma ngheniwile. Esikwini leri, timbilu ta tinhenha ta Mowabu ti ta kotisa mbilu ya wansati la velekaka.

⁴²Mowabu u ta herisiwa, a nga ha endli tiko hikuva u tiarisile eka Yehovha.

⁴³Nkosi wa nyimpi wu langutele muaki wa Mowabu, ni xikhele, ni rindzi, ku vula Yehovha.

⁴⁴La tsutsumaka ku chava nkosi u ta wela ekheleni, kutani la humaka ekheleni u ta phasiwa hi mitlhamu; hikuva ndzi ta tisa ehenhla ka vona, ehenhla ka Mowabu, lembe ra ku biwa ka vona, ku vula Yehovha.

⁴⁵“Vatsutsumi va yimile endzhutini wa Hexiboni; va karhele, kambe ndzilo wu hume eHexiboni, ni langavi ri hume exikarhi ka Sihoni; wu ya ematsheveni ya Mowabu ni le tinhlokweni ta vana va madzolonga.

⁴⁶U ni khombo wena Mowabu, tiko ra Kemoxi ri herile, hikuva vana va wena va xinuna va yisiwa eku bohiweni, ni vana va wena va xisati va yisiwa eku khotsiweni.

⁴⁷Hambiswiritano, ndzi ta tlherisa va le ku bohiweni va Mowabu enkarhini wa le ndzhaku, ku vula Yehovha.” Hi kona ku avanyisiwa ka Mowabu.