Read tsonga Yeremiya 6 Bible Online

Yeremiya 6 - tsonga bible

Yeremiya 6

¹“Vana va Benjamini, balekani exikarhi ka Yerusalema, mi yimba nanga eTekowa, yimisani xikombiso eBeta-Hakereme, hikuva khombo ri huma etlhelo ra n'walungu, ni ku onha lokukulu.

²Ndzi ya onha n'wana Siyoni, la sasekeke, la hanyaka hi leswo nandziha.

³Varisi va ta ta eka yena ni mitlhambi ya vona, va ta tlhoma mitsonga ya vona ku n'wi rhendzela; un'wana ni un'wana a dyisela endhawini ya yena.

⁴Sungulani ku lwa na yena; pfukani-ke hi khandziya ninhlekanhi! Hi ni khombo hina, hikuva dyambu ra pela, ni mindzhuti ya madyambu yi rhendzelekile.

⁵Pfukani, a hi khandziyeleni ka yena nivusiku, hi ya onha makhokholo ya yena.”

⁶Hikuva Yehovha wa tinyimpi a ku: “Tsemani mirhi, mi biyela Yerusalema, hi rihlampfu leri tlakukeke; hi wolowo muti lowu fanekelaka ku tshinyiwa; exikarhi ka wona ku tele ku xanisa.

⁷Kukotisa loko xihlovo xi humesa mati ya xona, wu humesa vumbabva bya wona hi mukhuva wolowo, ku wonga ni ku onha swi ri karhi swi twakala eka wona; timbanga ni mabibi ya mbilu swi le mahlweni ka mina hi masiku.

⁸Yerusalema, hundzuka, leswaku kumbe moya wa mina wu nga ku fularheli, leswaku kumbe ndzi nga ku hundzuri rhumbi, tiko leri nga riki na vanhu.”

⁹Yehovha wa tinyimpi u vula a ku: “Va ta nkun'hurisa masalela ya Israele kukotisa loko ku nkun'hurisiwa vhinya. Engeta u yisa voko ra wena evhinyeni hilaha mukun'huri a endlaka hakona.”

¹⁰Ndzi nga vita mani, kumbe ndzi nga vutisa mani, leswaku va ta yingisa? Langutani, ndleve ya vona a yi yimbanga, kutani va tsandzeka ku hlayisa timhaka, langutani, rito ra Yehovha ri hundzukile xisandzu exikarhi ka vona, a va ha titsakeri ha rona.

¹¹Ndzi tele hi mahlundzu ya Yehovha, ndzi karhele ku ma sivela. “Ma halatela eka vana va entsendzeleni, ni le nhlengeletanweni ya majaha; hikuva wanuna u ta khomiwa swin'we ni nsati; la dyuhaleke ni la heteke masiku ya yena.

¹²Tindlu ta vona ti ta fumiwa hi van'wana, na wona masimu ni vasati va vona, hikuva ndzi ta tshambuluta voko ra mina eka vaaki va tiko,” ku vula Yehovha.

¹³“Hikuva va tinyiketile ku navela ka ku fuwa hinkwavo, lontsongo ni lonkulu, muprofeta ni muprista, un'wana ni un'wana va endla e vunwa.

¹⁴Kutani va ongola hi ku vevuka mbanga ya n'wana wa tiko ra mina. Va ku: ‘Ku rhurile, ku rhurile!’ Kasi a ku na ku rhula.

¹⁵Va ta khomisiwa tingana, hikuva va ri karhi va endla leswo biha. Yo! A va tivi ku khomisiwa hi tingana, a va twi ku vaviseka hi tingana, hikwalaho va ta wa ni lava waka: Siku ndzi va tshinyaka, va ta wisiwa,” ku vula Yehovha.

¹⁶Yehovha u vula a ku: “Yimani etindleleni mi languta kutani mi vutisa tindlela ta khale; vutisani mi ku: ‘Ndlela leyo saseka hi yihi-ke?’ Kutani mi famba ha yona, mi ta kumela mimoya ya n'wina ku wisa. Kambe va hlamula, va ku: ‘Hi nga ka hi nga fambi kona.’

¹⁷Ndzi vekile ka n'wina valanguteri lava nge: ‘Yingisani rito ra nanga!’ Va ku: ‘Hi nga ka hi nga yingisi.’

¹⁸Hikwalaho yingisani, n'wina matiko! Kutani wena nhlengeletano ya matiko u tiva leswi nga ta va humelela.

¹⁹Wena misava, yingisa! Langutani, ndzi ta tisela tiko leri khombo, yi nga mihandzu ya miehleketo ya vona, hikuva a va yingisanga marito ya mina, kutani va sandzile nawu wa mina.

²⁰Mirhi ya risuna leyi humaka eXeba yi nga va yini ka mina ni rihlanga leri nun'hwelaka ra matiko ya le kule, ndzi nga ri endla yini? Tiholokosta ta n'wina a ti ndzi tsakisi, ni magandzelo ya n'wina a ma ndzi nandziheri.”

²¹Hikwalaho, Yehovha u vula a ku: “Langutani ndzi ta vekela tiko leri e xikhunguvanyiso, kutani vatatana ni vana va ta khunguvanyeka hinkwavo; loyi a nga warikwavo ni loyi a nga nakulobye va ta lova swin'we.”

²²Yehovha u vula a ku: “Vonani, tiko ra huma etlhelweni ra n'walungu tiko lerikulu ri humelela, ri huma emakumu ya misava;

²³va tamele gadzi ni fumu, va kariha ngopfungopfu, a va na ku tsetselela: rito ra vona ri pfuma kukotisa lwandle va khandziyile tihanci, va hlomile kukotisa loko a ri munhu un'we la ku hlaselaka, wena, n'wana Siyoni.

²⁴Hi twile mpfumawulo wa rona, kutani mavoko ya hina ma herile matimba; khombo ri hi khomile, hi vaviseka kukotisa la velekaka.

²⁵Mi nga tshuki mi huma emasin'wini, mi nga tshuki mi famba etindleleni, hikuva fumu ra nala ri kona; ka chavisa ematlhelo hinkwawo.

²⁶N'wana wa tiko ra mina, tibohe duku lero khwaxa, u vumbuluka enkumeni, u tirilela kukotisa loko va rilela n'wana la nga swakwe, u ba nkosi lowukulu wa ku vaviseka hikuva muonhi u ta hi humelela hi xipuku.

²⁷“Ndzi ku vekile ku va mukambi wa tiko ra mina, ni ku va khokholo leri tiyeke, leswaku u tiva ni ku ringa ku famba ka vona.

²⁸I vahundzuki ni lava tiarisaka hinkwavo, va tshama va lumbeta; i koporo ni nhumbu; i vaonhi hinkwavo.

²⁹Muhlanga wa hisa, loti yi herisiwe hi ndzilo; munyukisi u nyukisa mahala, hikuva lavo biha a va hambani.

³⁰Va ta vuriwa silivhere leyi tshikiweke hikuva Yehovha u va tshikile.”